گردشی قرضے نال نبڑݨ دا منصوبہ بہوں وݙی کامیابی اتے اجتماعی کوششاں دا نتیجہ اے، آئی ایم ایف دی مینجنگ ڈائریکٹر پاکستان دی معاشی بہتری دی تعریف کیتی اے، وزیراعظم شہباز شریف دا سرکلر ڈیٹ فنانسنگ دی سہولت دی افتتاحی تقریب توں ورچوئل خطاب

نیو یارک۔25ستمبر (اے پی پی) وزیراعظم محمد شہباز شریف گردشی قرضے نال نبڑݨ دے منصوبے کوں بہوں وݙی کامیابی اتے اجتماعی کوششاں دا نتیجہ قرار ݙیندیں ہوئیں آکھیا جو ڈسٹری بیوشن لائناں کوں چنڳا بݨاوݨ اتے لائن لاسز تے قابو پاوݨ ہک وݙا چیلنج اے، آئی ایم ایف دی مینجنگ ڈائریکٹر پاکستان دی معاشی بہتری دی تعریف کیتی اے اتے سیلاب پاروں تعاون دا یقین ݙیوائے، معاشی اشاریاں اچ بہتری، ایف بی آر، بجلی اتے آئی ٹی دے شعبیاں اچ بہتری بہوں اہم پیش رفت اے، ہمت اتے حوصلے نال اڳوں ودھوں تاں ملک اوکھ توں نِکل آسی۔ انہاں اے ڳالھیں خمیس کوں پاکستان اچ شعبہ توانائی دے گردشی قرضے دے مُکاوݨ کیتے نویں طے شدہ مالیاتی منصوبے (سرکلر ڈیٹ فنانسنگ دی سہولت) دی افتتاحی تقریب توں ورچوئل خطاب کریندیں ہوئیں کیتی۔ وزیراعظم آکھیا جو گردشی قرضہ مسلسل ودھدا پیا ہئی اتے اے اساݙے وسائل نگلیندا پیا ہئی، گردشی قرضے دے مسئلے نال نبڑݨ بہوں وݙی کامیابی اے، گردشی قرضے دا منصوبہ اجتماعی کوششاں دا نتیجہ اے، ایں دا سہرا ٹاسک فورس دے سِر اے، وزیر توانائی دی سربراہی اچ ٹاسک فورس مستعدی نال کم کیتے، آئی پی پیز نال مذاکرات ہک بہوں وݙا چیلنج ہئی، ٹاسک فورس آئی پی پیز نال کامیاب مذاکرات کیتے، ساریاں آپݨی آپݨی ذمہ واریاں بھرپور طریقے نال نبھائن، سارے متعلقہ فریقین دا ایں اچ وݙا اتے مثالی کردار اے، فیلڈ مارشل سید عاصم منیر دی بھرپور حمایت نال اساکوں کامیابی ملی اے۔ وزیراعظم آکھیا جو آئی ایم ایف دی مینجنگ ڈائریکٹر نال ملاقات تھئی اے، انہاں پاکستان دی معاشی بہتری دے حوالے نال کارکردگی اتے تِکھے اصلاحات دی تعریف کیتی اے، پہلی واری آئی ایم ایف دی کہیں مینجنگ ڈائریکٹر ایں تعریف کیتی اے جو پاکستان معاشی بہتری کیتے مثالی اقدامات کیتے ہن اتے سنجیدگی نال اصلاحات کیتی ویندی پئن، انہاں سیلاب دا وی ذکر کیتا اتے ایں توں نقصانات تے افسوس دا اظہار کیتا، انہاں ایں بارے تعاون دا یقین ݙیوایا جو اساں ایں کیتے وی تیار ہیسے۔ وزیراعظم آکھیا جو ایں خلوص نال اگر اساں اقدامات جاری رکھوں تاں اڳوں وی کامیابیاں حاصل تھیسن، ایں دا سارا کریڈٹ ٹیم پاکستان کوں ویندے۔ وزیراعظم آکھیا جو اڳلا مرحلہ ہݨ ڈسٹری بیوشن کمپنیاں دی نجکاری اے، ڈسٹری بیوشن لائناں کوں چنڳا بݨاوݨ اتے لائن لاسز تے قابو پاوݨ ہک وݙا چیلنج اے، اڳلے مرحلے اچ لائن لاسز دے مسئلے تے توجہ ݙیتی ونجے۔ وفاقی وزیر خزانہ محمد اورنگزیب آکھیا جو گردشی قرضے دے مُکاوݨ کیتے گزریل ہک سال توں کوششاں جاری ہن، گردشی قرضے دے مُکاوݨ دی سکیم اہم سنگ میل اے، گردشی قرضے دے مُکاوݨ دے توانائی دے شعبے تے دور رَس اثرات تھیسن۔ صدر حبیب بینک آکھیا جو ایچ بی ایل کیتے اے ہک بہوں اہم موقع اے۔ صدر و سی ای او پنجاب بینک ظفر مسعود آکھیا جو پاکستان دے بینکاری نظام اچ اے تاریخی ٹرانزیکشن اے، گردشی قرضے دے مُکاوݨ دا منصوبہ اہم پیش رفت اے، گردشی دے مُکاوݨ کیتے کوئی نواں ڈیٹ سروس سر چارج کائنی لاتا ویندا پیا، پالیسی ریٹ گھٹ تھیوݨ نال چھ سال دے اندر قرض ادا تھی ویسی، گردشی قرضے دی ادائیگی بینکاں تے مسلط کیتے ونجݨ دا تاثر درست کائنی، گردشی قرضہ ادائیگی دے منصوبے اچ ساریاں کیتے مراعات شامل ہن۔ چیئرمین نجکاری کمیشن محمد علی آکھیا جو گردشی قرض ادائیگی دا منصوبہ مشاورت نال وضع کیتا ڳیا، وفاقی وزیر پاور ڈویژن اویس لغاری دی قیادت اچ توانائی دا شعبہ بہتری دی راہ تے ڳامزن اے، توانائی دے شعبے اچ اہم اصلاحات گھن آئی ویندی پئن۔ واضح رہوے جو حکومت پاکستان 18 بینکاں دے کنسورشیم دے نال مِل تے توانائی دے شعبے دے گردشی قرضیاں دے بحران نال نبڑݨ کیتے 1.225 ٹریلین سرکلر ڈیٹ فنانسنگ دی سہولت دا معاہدہ طے کیتے۔ ایں تاریخی منصوبے دے حوالے نال تقریب اچ وزیراعظم محمد شہباز شریف نیویارک توں بذریعہ ویڈیو لنک شرکت کیتی جݙاں جو وزراء، وݙے سرکاری حکام، ریگولیٹرز، بین الاقوامی شراکت داراں اتے پاور سیکٹر دے اداریاں دے سی ای اوز وزیراعظم ہاؤس اچ تقریب اچ شرکت کیتی۔ ایں منصوبے دی کلیدی خوبیاں اچ کراچی انٹربینک آفرڈ ریٹ (KIBOR) مائنس 0.9 فیصد تے فنانسنگ، 6 سال دی ادائیگی دی مدت اتے ریونیو سٹریم دے طور تے ڈیٹ سروس سرچارج (ڈی ایس ایس) شامل ہن۔ نواں منصوبہ چھی سال توں وی گھٹ ویلھے اچ قرض مُکیسی اتے صارفین کوں 350 ارب روپے دی بچت ݙیسی۔ ایں سہولت دا مقصد گردشی قرضے کوں گھٹ کرݨ اے اتے دیر نال ادائیگی دے مہانگے سرچارجز دے تدارک دے ذریعے صارفین کیتے 350 ارب روپے دی بچت ݙیوݨ اے۔ پاور ہولڈنگ لمیٹڈ دے قرضیاں کوں ریٹائر کرݨ کیتے 659 بلین روپے استعمال کیتے ڳئے جݙاں جو باقی رقم آئی پی پیز/جی پی پیز کیتے رکھی ویسی تاں جو بجلی دے صارفین کیتے ودھ توں ودھ بچت کیتی ونڄ سڳے۔