واشنگٹن، 26 ستمبر (اے پی پی) وزیراعظم محمد شہباز شریف امریکی صدر ڈونلڈ ٹرمپ کوں امن دا علمبردار قرار ݙیندیں ہوئیں آکھیا جو انہاں پاروں پاکستان تے بھارت وچال جنگ بندی ممکن تھئی، انہاں دی قیادت اچ پاک امریکہ تعلقات ٻئے مضبوط تھیسن۔ وزیراعظم امریکی کمپنیاں کوں پاکستان دے زراعت، انفارمیشن ٹیکنالوجی، معدنیات تے توانائی دے شعبیاں اچ سرمایہ کاری دی دعوت ݙتی تے ڈوہیں ملکاں وچال سیکیورٹی تے انٹیلی …
وزیراعظم شہباز شریف دی امریکی صدر نال ملاقات، ٹرمپ کوں امن دا علمبردار قرار ݙتا
واشنگٹن، 26 ستمبر (اے پی پی) وزیراعظم محمد شہباز شریف امریکی صدر ڈونلڈ ٹرمپ کوں امن دا علمبردار قرار ݙیندیں ہوئیں آکھیا جو انہاں پاروں پاکستان تے بھارت وچال جنگ بندی ممکن تھئی، انہاں دی قیادت اچ پاک امریکہ تعلقات ٻئے مضبوط تھیسن۔ وزیراعظم امریکی کمپنیاں کوں پاکستان دے زراعت، انفارمیشن ٹیکنالوجی، معدنیات تے توانائی دے شعبیاں اچ سرمایہ کاری دی دعوت ݙتی تے ڈوہیں ملکاں وچال سیکیورٹی تے انٹیلی جنس تعاون کوں ٻئیا ودھاوݨ تے زور ݙتا۔ وزیراعظم آفس دے میڈیا ونگ موجب وزیراعظم محمد شہباز شریف دی وائٹ ہاؤس اچ امریکی صدر ڈونلڈ جے ٹرمپ نال ملاقات تھئی جیندے اچ پاک فوج دے سربراہ فیلڈ مارشل عاصم منیر نشانِ امتیاز (ملٹری)، ہلالِ جرأت وی موجود ہن۔ بیان موجب ملاقات ٻہوں پرتپاک تے خوشگوار ماحول اچ تھئی۔ وزیراعظم صدر ڈونلڈ ٹرمپ کوں “امن دا علمبردار” قرار ݙیندیں ہوئیں دُنیا بھر اچ تنازعات دے خاتمے کیتے انہاں دی مخلصانہ کوششاں دی تعریف کیتی۔ انہاں صدر ٹرمپ دی جرأت مندانہ تے فیصلہ کن قیادت دی تعریف کیتی جئیں پاروں پاکستان تے بھارت وچال جنگ بندی ممکن تھئی تے خطہ ہک وݙے بحران توں بچ ڳیا۔ وزیراعظم مشرقِ وسطیٰ دی صورتحال تے ڳالھ مُہاڑ کریندیں ہوئیں غزہ اچ فوری جنگ بندی تے امن دے قیام کیتے صدر ڈونلڈ ٹرمپ دی کوششاں، بالخصوص ایں ہفتے نیو یارک اچ مسلم دُنیا دے رہنماواں کوں غزہ تے مغربی کنارے سودھے مشرق وسطیٰ اچ امن دی بحالی کیتے جامع مشاورت کیتے مدعو کرݨ دی تعریف کیتی۔ وزیراعظم ایں سال دے آغاز اچ پاکستان تے امریکہ وچال طے تھیوݨ آلی ٹریفک ایڈ ایسٹ انتظامات (TRA) تے وی صدر ٹرمپ دا شکریہ ادا کیتا۔ انہاں پاکستان تے امریکہ وچال طویل المدت شراکت داری دا ذکر کریندیں ہوئیں ایں امید دا اظہار کیتا جو صدر ٹرمپ دی قیادت اچ ڈوہیں ملکاں دے آپسی مفاد اچ پاک امریکہ تعلقات ٻئے مضبوط تھیسن۔ ایں موقعے تے انہاں امریکی کمپنیاں کوں پاکستان دے زراعت، انفارمیشن ٹیکنالوجی، معدنیات تے توانائی دے شعبیاں اچ سرمایہ کاری دی دعوت ݙتی۔ ڈوہیں رہنماواں علاقائی سلامتی تے انسدادِ دہشت گردی تے تعاون ودھاوݨ تے وی ڳالھ مُہاڑ کیتی۔ وزیراعظم انسدادِ دہشت گردی اچ پاکستان دے کردار کوں صدر ٹرمپ ولوں ملݨ آلی کھلی حمایت تے شکریہ ادا کیتا تے سیکیورٹی تے انٹیلی جنس تعاون کوں ٻئیا ودھاوݨ تے زور ݙتا۔ بیان دے مطابق وزیراعظم صدر ڈونلڈ ٹرمپ کوں گرمجوشی نال مناسب ویلھے تے پاکستان دے سرکاری دورے دی دعوت وی ݙتی۔
