وزیر خزانہ محمد اورنگزیب نال ہالینڈ دے سفیردی ملاقات

اسلام آباد۔23اکتوبر(اے پی پی)وفاقی وزیر خزانہ و محصولات سینیٹر محمد اورنگزیب آکھیے جو پاکستان کھپت تے مبنی نمو توں نکل تے سرمایہ کاری اتے برآمدات تے مبنی ترقی آلے پاسے ٹردا پئے۔ اے ڳالھ  پاکستان اچ ہالینڈ دے سفیر رابرٹ جان سیگرٹ نال ملاقات اچ آکھی۔ وزیر خزانہ سفارتی تعیناتی تے انہاں کوں خوش آمدید آکھیا اتے پاکستان اتے نیدرلینڈز وچال طویل مدتی ، تاریخی اتے دوستانہ تعلقات دی تعریف کیتی ۔ انہاں ترقی، تجارت اتے نجی شعبے تے مبنی اقدامات اچ نیدرلینڈز دی مستقل حمایت تے شکریہ ادا کیتا۔ وزیر خزانہ ݙسایا جو پاکستان معیشت دے استحکام دے اوکھے دور توں لَنگھݨ دے بعد ہݨ پائیدار استحکام ول پیشرفت کیتی اے، جِتھاں سرمایہ کاری اتے ڈھانچہ جاتی اصلاحات تے خاص توجہ ݙتی ویندی پئی اے۔ گزریل ݙو سالاں توں پاکستان دے معاشی اشاریے اچ نمایاں بہتری آئی اے اتے ترائی عالمی ریٹنگ ایجنسی معاشی پیش منظر کوں چنڳا قرار ݙتے۔ وزیر خزانہ سفیر کوں آئی ایم ایف پروگرام اچ پیش رفت دا ݙسیندے آکھیے جو آئی ایم ایف دی انتظامیہ پاکستان دے اصلاحاتی عمل خاص کر ٹیکس اصلاحات، توانائی دے شعبے اچ استحکام، سرکاری اداریں اچ گورننس دی بہتری اتے نجکاری دے جاری ایجنڈے دے حوالے نال آپݨِا اعتماد ظاہر کیتے۔ انہاں آکھیا جو حکومت دا بنیادی فوکس سرمایہ کاراں دا اعتماد بحال کرݨ اتے نجی شعبے کیتے سازگار ماحول پیدا کرݨ اے، غیر ملکی سرمایہ کاراں کوں منافع دی منتقلی متعلق پابندیاں اچ نرمی کیتی ڳئی اے اتے ہݨ منافع اتے ڈیویڈنڈز دی ترسیل معمول موجب جاری اے ۔ انہاں مزید آکھیا جو پاکستان ہݨ کھپت تے مبنی نمو توں نکل تے سرمایہ کاری اتے برآمدات تے مبنی ترقی ول ڳامزن اے تاں جو ماضی دے ول ول تھیوݨ آلے معاشی لہہ چڑھ دے چکر کوں بھنیا ونڄ سڳے۔ وزیر خزانہ آکھیا جو سرمایہ کاری دے وݙے موقع خلیجی ملکاں، یورپ، امریکہ اتے چین دے سرمایہ کاراں کیتے یکساں طور تے موجود ہن جِتھاں معدنیات، زراعت، آئی ٹی، بنیادی ڈھانچے اتے ادویات سازی دے شعبے نمایاں ہن۔ انہاں آکھیا جو ہݨ پاکستان آپت دی تجارت اتے سرمایہ کاری دی شراکت داریاں دے ذریعے پائیدار غیر ملکی سرمایہ کاری دے پاسے ودھدا پئے تاں جو ٻاہرلے قرضیں اتے ݙو طرفہ ڈیپازٹس تے انحصار گھٹ ہووے۔ وزیر خزانہ مزید ݙسایا جو حکومت ٹیکس دے دائرے کوں وسیع کرݨ، غیر رسمی معیشت کوں گھٹ کرݨ اتے تجارت، جائیداد اتے زرعی شعبیں اچ مساوی ٹیکسیشن دے نفاذ کیتے کوششاں کریندی پئی اے۔ انہاں ݙسایا جو مصنوعی ذہانت تے مبنی ڈیجیٹل ریونیو مانیٹرنگ سسٹم متعارف کروایا ڳئے تاں جو مختلف شعبیں اچ مالی لیکجز کوں روکیا ونڄ سڳے۔ انہاں مزید ݙسایا جو سرکاری اداریں دی اصلاحات وفاقی محکمیں دے حجم اچ کمی اتے منتخب اداریں دی نجکاری تے عمل جاری اے۔ حالی ہک مالیاتی ادارے دی کامیاب نجکاری مکمل تھئی ڳئی اے جݙاں جو بجلی دی تقسیم کار کمپنیاں دی نجکاری دے معاملات آوݨ آلے مرحلے اچ شامل ہن۔ وزیر خزانہ نیدرلینڈز دے برآمدات تے مبنی معاشی ماڈل دا حوالہ ݙیندے ہوئیں آکھیا جو پاکستان کوں وی آپݨیاں صنعتاں دی عالمی مسابقت اچ بہتری گھن آوݨی ہوسی ۔ انہاں ݙسایا جو پاکستان اڳلے چار توں پنج سالاݨ اچ بتدریج اضافی کسٹم ڈیوٹیاں اچ کمی دا عمل شروع کیتے تاں جو پراݨی تجارتی رکاوٹاں کوں ختم کیتا ونڄ سڳے اتے برآمدات تے مبنی معیشت کوں ودھارا ݙتا ونڄ سڳے۔ ایں موقع تے ہالینڈ دے سفیر پاکستان دے نال ݙو طرفہ تجارت اتے سرمایہ کاری دے تعلقات کوں ٻیا ودھاوݨ دے عزم دا اعادہ کیتا۔ انہاں ݙسایا جو ایں ویلھے تقریباً 50 ڈچ کمپنیاں پاکستان اچ کَم کریندیاں پئن اتے نیدرلینڈز زراعت، آئی ٹی، ٹیکسٹائل اتے ٻئے شعبیں اچ سرمایہ کاری دے نویں موقع لبھݨ اچ دلچسپی رکھیندے۔ انہاں نیدرلینڈز دے ڈویلپمنٹ فنانس انسٹی ٹیوشن دے کردار دا وی حوالہ ݙتا جیڑھا مستقبل اچ پاکستان اچ سرمایہ کاری دے منصوبیں اچ تعاون ݙے سڳدے۔ سفیر پاکستان دے جی ایس پی پلس اسٹیٹس کوں برآمدی شعبے کیتے انتہائی اہم قرار ݙتا اتے ایں حوالے نال پاکستان دی فعال سفارتی کوششاں دی تعریف کیتی ۔ انہاں حکومت دے ایں عزم دا وی اعتراف کیتا جو او نویں جی ایس پی پلس سائیکل دے آغاز نال مثبت اتے تعمیری رابطہ برقرار رکھیسی۔ سینیٹر محمد اورنگزیب یقین ݙیوائے پاکستان آپݨیایاں اصلاحاتی اتے تعمیلی ذمہ واریاں کوں پورا کرݨ کیتے پرعزم اے اتے یورپی یونین اتے اوندے رکن ملکاں سَودھے نیدرلینڈز دے نال مسلسل رابطے اچ رہسی۔ فریقین ایں عزم دا اظہار کیتا جو او آپت دے اقتصادی، تجارتی اتے سرمایہ کاری تعاون کوں ٻیا ودھاوݨ کیتے سانجھے طور تے کَم جاری رکھیسن۔