پاکستان گلوبل ڈویلپمنٹ انیشی ایٹو دی مکمل حمایت دی توثیق کریندے، وزیراعظم شہباز شریف

نیویارک۔26 ستمبر (اے پی پی) وزیراعظم محمد شہباز شریف آکھیے جو پاکستان چینی صدر شی جن پنگ دے دور اندیش اقدام گلوبل ڈویلپمنٹ انیشی ایٹو (جی ڈی آئی) دا پختہ حامی اے تے اوندی مکمل حمایت دی توثیق کریندے، جی ڈی آئی 2030ء تئیں مکمل تھیوݨا اے، ایں دے اہداف دے حصول کیتے ہݨ وی کافی چیلنجز درپیش ہن، شدید موسمیاتی آفتاں، خوراک تے ایندھن دیاں ودھدیاں قیمتاں تے جغرافیائی سیاسی کشیدگی اچ ودھارے ترقی پذیر ملکاں دیاں کامیابیاں کوں ول خطرے اچ پا ݙتے، انہاں چیلنجز دا مقابلہ کرݨ کیتے مضبوط کثیر الجہتی تعاون دی لوڑھ اے۔ ہفتے کوں چین دے نائب صدر ہان ژینگ دی میزبانی اچ عالمی ترقیاتی اقدام تے اعلیٰ سطح دے اجلاس نال خطاب کریندے وزیراعظم آکھیا جو کووڈ-19 دی وبا دے عروج دے دوران 5 سال پہلے صدر شی جن پنگ عالمی ترقیاتی اقدام (گلوبل ڈویلپمنٹ انیشی ایٹو) پیش کیتا ہئی، اے ہک ایہو جیھا دور اندیش اقدام ہئی جیڑھا اپݨے ویلھے توں کتھائیں اڳوں ہئی ، اڄ دنیا صدر شی جن پنگ دے ایں فیصلے دے پسِ منظر اچ کارفرما دانائی تے بصیرت کوں تسلیم کریندی اے۔ انہاں آکھیا جو 2030ء دی ایں اقدام دی مقررہ مدت پوری تھیوݨ اچ ہݨ 4 سال رہ ڳئن جݙاں جو پائیدار ترقی دے اہداف دے حصول دے پاسے پیشرفت ہݨ وی ناکافی تے سست اے، پائیدار ترقی دے اہداف کیتے مالی وسائل دی ودھدی کمی، ول ول آوݨ آلیاں تے پہلے توں ودھ شدید موسمیاتی آفتاں، خوراک تے ایندھن دیاں ودھدیاں قیمتاں تے جغرافیائی سیاسی کشیدگی اچ ودھارے ترقی پذیر ملکاں دیاں کئی ݙہاکیں دیاں کامیابیاں کوں ہک واری ول خطرے اچ پا ݙتے، انہاں چیلنجز دا مقابلہ کرݨ کیتے مضبوط کثیر الجہتی تعاون دی لوڑھ اے۔ انہاں آکھیا جو عوامی جمہوریہ چین تے اوندے عالمی ترقیاتی اقدام ایں ضمن اچ وقتی پیشرفت کیتی، عالمی ترقیاتی اقدام دا فریم ورک پہلے ہی ترقی پذیر دنیا اچ ٹھوس تے عملی فید اچ تبدیل تھی چکے، ایں اقدام نے ساریں کیتے فیدے دی حقیقی روح موجب فیدہ پڄائے۔ وزیراعظم آکھیا جو پاکستان جی ڈی آئی دی مکمل حمایت دی توثیق کریندے کیوں جو اے یکجہتی کرۂ ارض دے جنوبی ملکاں دے تعاون تے ترقی پذیر ملکاں کیتے ٹھوس نتیجے ݙیوݨ دا ہک اہم پلیٹ فارم اے، جی ڈی آئی دے اہداف اساݙے قومی اقتصادی تبدیلی دے منصوبے دی وی تکمیل کریندن۔ وزیراعظم آکھیا جو چین دے نال اساݙا تعاون بیلٹ اینڈ روڈ اقدام دے ذریعے جاری اے، اوندے فلیگ شپ منصوبے چین پاکستان اقتصادی راہداری دے ذریعے وی جاری ہن۔ وزیراعظم آکھیا جو سی پیک ہݨ اپݨے ݙوجھے مرحلے اچ داخل تھیندا پئے، جیویں جیویں اساں 2030ء دی طرف ودھدے پیوں پاکستان جی ڈی آئی دے سارے شراکت داراں نال تعاون مزید وسیع کرݨ کیتے تیار اے، کامیاب منصوبیں کوں وݙے پیمانے تے اپݨا تے نیز تعاون دے نویں تے جدت تے مبنی شعبیں دی نشاندہی کر تے تعاون ودھیندا پئے۔ وزیراعظم آکھیا جو عالمی ترقیاتی اقدام 2030ء دے ایجنڈے تے پیش قدمی تکھی کرݨ وی ضروری اے، نال ہی نال عالمی حکمرانی اقدام، عالمی حکمرانی کیتے ہک زیادہ نمائندہ ڈھانچے دا متلاشی اے، ایہو جیھا ڈھانچہ جیڑھا ترقی پذیر ملکاں دیاں ترجیحات موجب ہووے۔ انہاں آکھیا جو سیکرٹری جنرل دے یو این 80 اقدام کوں اقوامِ متحدہ دے ترقیاتی ستون کوں تکڑا کرݨا چاہیدے، ایں اقدام کوں عملی سطح تے نتیجے ݙیوݨ دی اوندی صلاحیت کوں وی بہتر کرݨا چاہیدے۔ وزیراعظم آکھیا جو پاکستان انہاں سارے ٻہوں اہم اقدامات دا پختہ حامی اے تے رہسی۔ وزیراعظم آکھیا جو اساں اپݨے تکڑے یار چین تے گروپ آف فرینڈز دے ساتھی ممبران دے نال نال مسلسل نیڑے تعاون دے منتظر ہیسے تاں جو اساں رل تے ہک ایجھا معاشرہ تشکیل ݙیوں جیڑھاانسانیت دے سانجھے مستقبل دے تصور کوں اڳوں ودھاوے