پاکستان اتے قطر وچال چھیویں سانجھے وزارتی کمیشن دا اجلاس، ݙوہیں ملکاں وچال اہم پروٹوکولز تے دستخط

اسلام آباد۔23اکتوبر(اے پی پی)پاکستان اتے قطر دیاں حکومتاں وچال اقتصادی اتے تکنیکی تعاون دے معاہدے دے تحت ݙوہیں ملکاں وچال سانجھا وزارتی کمیشن (جے ایم سی) دا چھیواں اجلاس 22 اتے 23 اکتوبر 2025 کوں اسلام آباد اچ کامیابی نال منعقد تھیا۔ وزارت اقتصادی امور ڈویژن دی طرفوں جاری بیان موجب پہلے ݙینھ 22 اکتوبر کوں تکنیکی سیشن تھیا جِتھاں ݙوہیں ملکاں دے وفداں مختلف شعبیں اچ تعاون دے تکنیکی پہلواں تے ڳالھ مہاڑ کیتی۔ ٻئے ݙینھ 23 اکتوبر کوں وفاقی وزیر تجارت جام کمال خان اتے قطر دے وزیر تجارت و صنعت شیخ فیصل بن ثانی بن فیصل آل ثانی مختلف شعبیں اچ تعاون کوں تکڑا کرݨ کیتے کئی پروٹوکولز تے دستخط کیتے۔ سیشن اچ ݙوہیں وزراء آپݨیاں تقریراں اچ ݙو طرفہ تجارت اتے اقتصادی تعاون کوں ودھاوݨ دے عزم دا اعادہ کیتا اتے ݙوہیں ملکاں دے بھرپی دے تعلقات کوں تجارت، سرمایہ کاری اتے سانجھے منصوبیں کیتے استعمال کرݨ دی اہمیت تے زور ݙتا۔ وزارت اقتصادی امور دے سیکرٹری محمد حمیر کریم پرامید انداز اچ آکھیا جو چھیواں جے ایم سی پاک-قطر دے تجارتی اتے اقتصادی تعلقات کوں مضبوط کرݨ اچ ہک سنگ میل ثابت تھیسی۔ انہاں تعاون کوں ودھاوݨ اچ کمیشن دے کردار اتے قطری سرمایہ کاری کیتے سازگار ماحول پیدا کرݨ دے پاکستان دے عزم کوں اُجاگر کیتا۔ تجارت، معیشت اتے سرمایہ کاری دے شعبے اچ طے پاوݨ آلے پروٹوکولز دے تحت ݙوہیں ملکاں امیرِ قطر دے ایں وژن کوں عملی جامہ پواوݨ دے عزم دا اظہار کیتے جِتھاں قطر انویسٹمنٹ اتھارٹی (کیو آئی اے) یا ٻئے سرمایہ کاری ذرائع دے ذریعے پاکستان اچ 3 ارب ڈالر دی سرمایہ کاری کیتی ویسی۔ ایں ضمن اچ پاکستان دی خصوصی سرمایہ کاری سہولت کونسل (ایس آئی ایف سی) اتے کیو آئی اے وچال براہ راست رابطے کوں مضبوط بݨاوݨ تے زور ݙتا ڳئے تاں جو سرمایہ کاری دے عمل کوں سُوکھا بݨایا ونڄ سڳے اتے قطری سرمایہ کاراں کیتے سازگار ماحول ݙتا وںڄ سڳے۔ ایس آئی ایف سی کوں ہک کلیدی پلیٹ فارم دے طور تے اُجاگر کیتا ڳئے جیڑھا ترجیحی شعبیں اچ سرمایہ کاری کوں ودھارا ݙیوݨ، مربوط تعاون ݙیوݨ اتے قطری کاروباری اداریں کیتے پورا سہولت کاری کوں یقینی بݨیندا پئے ۔ ٹرانسپورٹ دے شعبے اچ پروٹوکولز اچ پبلک ٹرانسپورٹ سسٹمز جِݙاں ریل، بساں اتے میٹرو اچ تعاون ودھاوݨ اتے سبز ٹیکنالوجیز جِڈاں برقی ڳاݙیاں، خودکار ڳاݙیاں اتے ہائیڈروجن ایندھن کوں ترجیح ݙیوݨ تے اتفاق تھیا۔ پاکستان  کھاریاں-راولپنڈی موٹروے اتے کراچی-حیدرآباد موٹروے جِیڑھے سڑک دے منصوبیں اچ قطری سرمایہ کاری دے مواقع اُجاگر کیتے جیڑھے پبلک پرائیویٹ پارٹنرشپ یا براہ راست فنانسنگ دے ذریعے ممکن ہن۔ ݙوہیں فریقاں زمینی ٹرانسپورٹ اتے بندرگاہواں اچ تعاون کیتے ہک مسودہ مفاہمت نامے تے غور کرݨ تے وی اتفاق کیتا۔ ایوی ایشن دے شعبے اچ ݙوہیں فریقاں 2026 دی پہلی سہ ماہی اچ ایوی ایشن تعلقات کوں مضبوط کرݨ کیتے ݙو طرفہ ایروناٹیکل اتھارٹیز دی مشاورت طے کرݨ دا عزم کیتا۔ تعلیم اتے صحت دے شعبیں اچ تعاون وی اجلاس دا مرکزی موضوع رہیا اتے باقاعدہ پروٹوکولز اچ ایں دا ذکر موجود اے۔ ݙوہیں ملکاں  وچال تعلیم متعلق ایگزیکٹو پروگرام دے مجوزہ مسودے تے وی ڳالھ مہاڑ کیتی ڳئی جِتھاں تعلیم، اعلیٰ تعلیم اتے سائنسی تحقیق اچ تعاون کوں ودھارا مِلسی۔ ایں توں علاوہ قطر دی وزارت تعلیم اتے پاکستان دی نیشنل ووکیشنل اینڈ ٹیکنیکل ٹریننگ کمیشن دے وچال ہک مجوزہ مفاہمتی یادداشت تے وی غور تھیا۔ صحت دے شعبے اچ موجودہ مفاہمت نامے کوں فعال کرݨ کیتے ہک سانجھی ورکنگ کمیٹی قائم کیتی ڳئی جیڑھی سانجھے پروگراماں کوں نافذ کریسی، پاکستانی طبی پیشہ ور لوکاں کوں قطر دے حماد میڈیکل کارپوریشن اچ شامل کرݨ اتے صحت دے شعبے اچ مہارت، کامیابیاں اتے اقدامات دے تبادلے دی سہولت ݙیسی۔ ایں توں علاوہ دوا سازی اتے طبی آلات دی آپت دی شناخت دے امکانات کوں وی تلاش کیتا ویسی تاں جو مارکیٹ تئیں رسائی سُکھی تھیوے۔ ثقافت اتے میڈیا دے شعبے اچ پروٹوکولز دے تحت پہلے توں تصدیق شدہ اداریں اتے ثقافتی اداریں کیتے فاسٹ ٹریک سسٹم قائم کیتا ڳئے جِتھاں کثیر الدخول ویزیں اتے قلیل مدتی ثقافتی و تعلیمی تبادلیں کیتے سوکھاعمل شامل اے۔ ݙوہیں ملکاں  فلم، عجائب گھراں اتے ثقافتی ورثے اچ تعاون کیتے ہک رولنگ ’’ایئر آف کلچر‘‘ پروگرام شروع کرݨ تے وی اتفاق کیتا۔ میڈیا دے شعبے اچ قطر نیوز ایجنسی اتے ایسوسی ایٹڈ پریس آف پاکستان (اے پی پی) وچال تعاون اتے خبراں دے تبادلے دے معاہدیں کوں حتمی شکل ݙتی ڳئی، دستاویزی فلماں، ڈرامیں اتے ثقافتی پروگراماں دی سانجھی پروڈکشن دی حوصلہ افزائی کیتی ڳئی اتے میڈیا ٹیماں کیتے آپسی تکنیکی اتے تربیتی سہولتاں ݙیوݨ تے زور ݙتا ڳیا۔ ایں توں علاوہ پاکستان براڈکاسٹنگ کارپوریشن اتے قطر ریڈیو وچال ثقافتی پروگراماں دے تبادلے کوں ترجیح ݙتی ڳئی۔ مواصلات اتے انفارمیشن ٹیکنالوجی دے شعبے اچ پروٹوکولز اچ ای-گورنمنٹ، سمارٹ سٹیز، ڈیجیٹل معیشت اتے ڈیجیٹل تبدیلی اچ ݙو طرفہ تعلقات کوں مضبوط کرݨ دی اہمیت تے زور ݙتا ڳیا۔ قطر سائنس اینڈ ٹیکنالوجی پارک اتے پاکستان دی سپیشل ٹیکنالوجی زونز اتھارٹی دے وچال تعاون کوں ترجیح ݙتی ڳئی اتے پاکستانی سٹارٹ اپس کوں قطر دے ٹیک ریگولیٹری ماحول اتے مراعات توں آگاہ کرݨ کیتے ورکشاپاں دے انعقاد تے وی اتفاق تھیا۔ مزدور امور دے حوالے نال پروٹوکولز اچ قطر دی لیبر مارکیٹ دیاں ضرورتاں کوں پورا کرݨ کیتے ہنرمند پاکستانی کارکناں دی تعیناتی تے زور ݙتا ڳیا جیڑھا 1987 دے پاکستانی کارکناں دی قطر اچ ملازمت دے معاہدے دی بنیاد تے ہوسی اتے بہترین طریقیں دے تبادلے کیتے لیبر تعاون تے ہک نویں مفاہمت نامے کوں وقتی حتمی شکل ݙیوݨ تے اتفاق تھیا۔ ݙوہیں وفداں اجلاس دے مثبت نتیجے تے اطمینان ظاہر کیتا اتے جے ایم سی دے فیصلیں دے عملی نفاذ کوں یقینی بݨاوݨ کیتے مسلسل رابطیں دی اہمیت تے زور ݙتا۔ ستواں جے ایم سی اجلاس 2026 اچ منعقد تھیسی جیں دیاں تاریخاں اتے مقام سفارتی ذرائع توں طے کیتے ویسن۔ پاکستان دی وزارت اقتصادی امور قطر دے نال مضبوط اقتصادی اتے تکنیکی تعاون کوں ودھارا ݙیوݨ کیتے پرعزم اے، جیڑھا ݙوہیں ملکاں کیتے خوشحالی اتے ترقی دا سبب بݨسی۔