وفاقی کابینہ تحریک لبیک پاکستان کوں کالعدم قرار ݙیوݨ دی منظوری ݙے ݙتی

اسلام آباد۔23اکتوبر(اے پی پی)وفاقی کابینہ دہشت گردی اتے پرتشدد کارروائیاں اچ ملوث ہووݨ پاروں تحریک لبیک پاکستان (ٹی ایل پی) کوں انسداد دہشت گردی ایکٹ دے تحت کالعدم قرار ݙیوݨ دی منظوری ݙے ݙتی اے۔ وفاقی کابینہ دے اجلاس دے بعد جاری اعلامیہ موجب پنجاب حکومت دی درخواست تے وزارت داخلہ ٹی ایل پی کوں کالعدم قرار ݙیوݨ کیتے سمری وفاقی کابینہ اچ پیش کیتی۔ وزیراعظم دفتر دے میڈیا ونگ توں جاری بیان موجب وفاقی کابینہ کوں ملک اچ ٹی ایل پی دی پرتشدد اتے دہشت گردانہ سرگرمیاں تے بریفنگ ݙتی ڳئی۔ اجلاس اچ حکومت پنجاب دے اعلیٰ افسراں بذریعہ ویڈیو لنک شرکت کیتی۔ اجلاس کوں کالعدم تنظیم دی پرتشدد اتے انتشار کھنڈاوݨ آلیاں کاروائیاں تے بریفنگ ݙتی ڳئی۔ اجلاس کوں ݙسایا ڳیا جو 2016 توں قائم ایں تنظیم پورے ملک اچ شرانگیزی کوں ہوا ݙتی، تنظیم دی وجہ توں ملک دے مختلف حصیں اچ شرانگیزی دے واقعات تھئے۔ کابینہ کوں ݙسایا ڳیا جو 2021 اچ وی اُوں ویلھے دی حکومت ٹی ایل پی تے پابندی لاتی ہئی جیڑھی 6 مہینے بعد ایں شرط تے ہٹائی ڳئی ہئی جو اڳوں ملک اچ بدامنی اتے پرتشدد کارروائیاں نہ تھیسن۔ تنظیم تے پابندی دی وجہ 2021 اچ ݙتی ڳئی ضمانتاں توں روگردانی وی اے۔ ماضی اچ وی ٹی ایل پی دے پرتشدد احتجاجی جلسیں اتے ریلیاں اچ سکیورٹی اہلکار اتے بے گناہ راہگیر جاں بحق تھئے ہن۔ بیان موجب وفاقی کابینہ اجلاس کوں ݙتی ڳئی بریفنگ اتے حکومت پنجاب دی سفارش دے بعد متفقہ طور تے ایں نتیجے تے پُجی جو ٹی ایل پی دہشت گردی اتے پرتشدد کارروائیاں اچ ملوث اے۔