پولینڈ دے نائب وزیراعظم رادوسلو سکورسکی دا انسٹی ٹیوٹ آف سٹریٹجک سٹڈیز اچ ”پولینڈ دی کامیابی دی کہانی: اُبھردے ملکاں کیتے ہک پیغام“ دے موضوع تے لیکچر

اسلام آباد۔23اکتوبر(اے پی پی)پولینڈ دے نائب وزیراعظم اتے وزیر خارجہ رادوسلو سکورسکی انسٹی ٹیوٹ آف سٹریٹجک سٹڈیز اسلام آباد اچ ”پولینڈ دی کامیابی دی کہانی: اُبھردے ملکاں کیتے ہک پیغام“ دے موضوع تے لیکچر ݙتا۔ تقریب دا اہتمام انسٹی ٹیوٹ آف سٹریٹجک سٹڈیز اسلام آباد سنٹر فار سٹریٹجک پرسپیکٹیو (سی ایس پی) پولش انسٹی ٹیوٹ آف انٹرنیشنل افیئرز (پی آئی ایس ایم) دے تعاون نال کیتا ہئی۔ تقریب اچ سفارت کاراں، پالیسی سازاں، ماہرین تعلیم اتے تھنک ٹینکس، سول سوسائٹی اتے میڈیا دے نمائندیں شرکت کیتی۔ ایں توں پہلے آئی ایس ایس آئی پولینڈ اچ قائم یورپی تھنک ٹینک پولش انسٹی ٹیوٹ آف انٹرنیشنل افیئرز دے نال مفاہمت دی ہک یادداشت تے دستخط کیتے۔ دستخط دفتر خارجہ اچ تھئے جِتھاں ڈائریکٹر جنرل انسٹی ٹیوٹ آف سٹریٹجک سٹڈیز اسلام آباد سہیل محمود اتے ڈائریکٹر پولش انسٹی ٹیوٹ آف انٹرنیشنل افیئرز ڈاکٹر جاروسلاو چاویک کارپوویچ پاکستان دے نائب وزیراعظم اتے وزیر خارجہ سینیٹر محمد اسحاق ڈار اتے انہاں دے پولش ہم منصب رادوسلو سکورسکی دی موجودگی اچ دستاویز تے دستخط کیتے۔ آپݨے خطاب اچ پولینڈ دے نائب وزیراعظم اتے وزیرخارجہ پولینڈ دی تاریخی تبدیلی اتے ترقی پذیر ملکاں کیتے اُنہاں دے وسیع تر اثرات دا ذکر کیتا۔ چار ݙھاکے پہلے پاکستان دے آپݨے ابتدائی دورے کوں یاد کریندے انہاں ݙوہیں ملکاں وچال پراݨی یاری اتے سوویت قبضے دے خلاف افغان مزاحمت دے دوران پاکستان دے اہم کردار بارے گرمجوشی نال ڳالھ کیتی۔ کمیونزم دے بعد دی معیشت توں یورپ دیاں سَاریں توں ودھ متحرک ریاستاں وچوں ہک تئیں پولینڈ دے سفر دا خاکہ ݙسیندے انہاں آپݨے ملک دی کامیابی دا سہرا اوکھی لیکن فیصلہ کن اصلاحات، ادارہ جاتی جدت اتے ہک مستحکم بین الاقوامی ماحول کوں قرار ݙتا۔ انہاں ݙسایا جو 1989 دے بعد توں پولینڈ دی فی کس جی ڈی پی اچ ترائے توں ودھ ودھارا تھئے اتے ملک دی اقتصادی تبدیلی جغرافیائی اتے سماجی طور تے متوازن رہی اے۔ انہاں آکھیا جو پولینڈ دا تجربہ درمیانے درجے دیاں ریاستاں کیتے تحریک دا کم کرسڳدے جِتھاں پائیدار ترقی اتے عالمی مطابقت حاصل کرݨ کیتے کوششاں جاری ہن۔ نائب وزیر اعظم اتے وزیرخارجہ رادوسلو سکورسکی وسیع تر جغرافیائی سیاسی تناظر تے روشنی پیندے آکھیا جو ودھدی ہوئی پولرائزیشن اتے بین الاقوامی قانون کوں لاحق چیلنج وچال دنیا ہک دوراہے تے کھڑی اے۔ انہاں خودمختاری، مکالمے اتے کثیر جہتی تعاون تے مبنی ”قاعدیں تے مبنی بین الاقوامی آرڈر“ کیتے نویں عزم دا مطالبہ کیتا۔ عالمی بحراناں تے پولینڈ دے موقف دا ذکر کریندے انہاں فلسطینی عوام دے حق خود ارادیت اتے ݙو ریاستی حل کیتے پولینڈ دی حمایت دے نال نال روسی جارحیت دے مقابلے اچ یوکرین کیتے اُنھاں دی مسلسل حمایت اتے مدد بارے شرکا کوں ݙسایا۔ ݙو طرفہ تعلقات تے انہاں پولینڈ اتے پاکستان وچال ودھدی ہوئی اقتصادی اتے تجارتی شراکت داری تے زور ݙتا جیڑھی اڄوکے سالانہ حجم اچ ہک ارب ڈالر توں ودھ ڳئی اے۔ انہاں پاکستان اچ پولینڈ دی تیل اتے گیس کمپنی اورلین دی تقریباً ترائے ݙھاکیں توں موجودگی کوں پائیدار تعاون دی علامت دے طور تے اُجاگر کیتا اتے توانائی، کان کنی، پاݨی دے انتظام، فوڈ پروسیسنگ اتے فنٹیک اچ نویں موقع دی نشاندہی کیتی۔انہاں آکھیا جو پولینڈ پاکستان دے نال آپݨے ترقیاتی تجربے اتے تکنیکی مہارت خصوصاً قابل تجدید توانائی اتے پائیدار صنعت اچ اشتراک کرݨ کیتے تیار اے۔ ایں توں پہلے آپݨے ریمارکس اچ ڈی جی انسٹی ٹیوٹ آف سٹریٹجک سٹڈیز اسلام آباد سہیل محمود نائب وزیراعظم سکورسکی دا خیرمقدم کیتا اتے سرد جنگ مکاوݨ دے بعد پولینڈ دی نمایاں تبدیلی دی تعریف کیتی۔ انہاں پولینڈ کوں یورپ دی ساریں توں کامیاب تبدیلی دیاں کہانیاں وچوں ہک قرار ݙتا، ہک ایجھا ملک جیڑھے ہک مضبوط اتے ریزیلنٹ ریاست دے طور تے اُبھرݨ کیتے اقتصادی نظم و ضبط، ادارہ جاتی اصلاحات اتے سٹریٹجک دور اندیشی کوں یکجا کیتے۔ سہیل محمود آکھیا جو ہک انتہائی اوکھے عالمی ماحول اچ پاکستان آپݨے اہم جغرافیہ، فوجی صلاحیت اتے سفارت کاری توں فیدہ چیندے نویں تزویراتی اہمیت حاصل کرݨ کیتے مہارت نال کَم کیتے۔ ایں موقع تے خطاب کریندے ڈائریکٹر پولش انسٹی ٹیوٹ آف انٹرنیشنل افیئرز ڈاکٹر جاروسلاو چاویک کارپوویچ پولش انسٹی ٹیوٹ آف انٹرنیشنل افیئرز اتے انسٹی ٹیوٹ آف سٹریٹجک سٹڈیز اسلام آباد وچال شراکت داری دی تعریف کیتی ایں کوں پولینڈ اتے پاکستانی تعلیمی تعاون اچ ہک نویں اتے امید افزا باب دا آغاز قرار ݙتا۔ انہاں آکھیا جو پولینڈ اتے پاکستان، ݙوہیں بین الاقوامی برادری دے ذمہ وار ارکان دے طور تے عالمی امن کوں ودھارا ݙیوݨ اتے قاعدیں تے مبنی بین الاقوامی نظم برقرار رکھݨ اچ تعمیری کردار ادا کریندن۔ لیکچر دے بعد ہک انٹرایکٹو سوال و جواب دا سیشن تھیا، بعد اچ معزز مہمان کوں سووینئر پیش کیتا ڳیا۔