وزیراعظم محمد شہباز شریف نال پولینڈ دے نائب وزیراعظم / وزیر خارجہ رادوسائو سیکورسکی دی ملاقات

اسلام آباد۔23اکتوبر(اے پی پی) وزیراعظم محمد شہباز شریف پولینڈ دے نال تجارت، توانائی، دفاع، تعلیم اتے آپت دے دلچسپی دے ٻئے شعبیں اچ ݙو پاسے تعاون کوں ٻیا ودھاوݨ دی خواہش دا اظہار کریندے پولینڈ دیاں کمپنیاں کوں پاکستان اچ سرمایہ کاری کیتے دعوت ݙتی اے۔ وزیراعظم دفتردے میڈیا ونگ توں جاری بیان موجب وزیراعظم نال پولینڈ دے نائب وزیراعظم / وزیرخارجہ رادوسائو سیکورسکی وزیراعظم ہائوس اچ ملاقات کیتی۔ نائب وزیراعظم / وزیر خارجہ محمد اسحاق ڈار، سیکرٹری خارجہ آمنہ بلوچ اتے پولینڈ اچ پاکستان دے سفیر سمیع ملک وی ملاقات اچ موجود ہن۔ ملاقات اچ وزیراعظم آکھیا جو پاکستان اتے پولینڈ وچال کی ݙھاکیں تے محیط خوشگوار اتے دوستانہ تعلقات ہن۔ انہاں پولینڈ دی اعلیٰ سطح دی صنعت کاری اتے ترقی دی تعریف کیتی جیڑھی جو 1970 دے ݙھاکے توں پولینڈ دی ہک خصوصیت رہی اے۔ وزیراعظم تجارت، توانائی، دفاع، تعلیم، محنت اتے آپت دے دلچسپی دے ٻئے شعبیں اچ ݙو طرفہ تعاون کوں ٻئی وسعت ݙیوݨ دی پاکستان دی خواہش دا اظہار کیتا۔ ایں سلسلے اچ وزیراعظم پولینڈ دی کمپنیاں کوں پاکستان اچ سرمایہ کاری خصوصاً توانائی، کان کنی اتے انفارمیشن ٹیکنالوجی دے شعبیں اچ نویں موقع لبھݨ دی دعوت ݙتی۔ ملاقات اچ مشرق وسطیٰ اتے یوکرین اچ امن دیاں کوششاں سَودھے علاقائی اتے بین الاقوامی پیشرفت تے وی ڳالھ مہاڑ کیتی۔ وزیراعظم مذاکرات اتے سفارت کاری دے ذریعے جھیڑیں دے پرامن حل دی اہمیت تے زور ݙتا اتے بین الاقوامی قانون، انسانی اصُولاں اتے اقوام متحدہ دے چارٹر دی پاسداری کیتے پاکستان دے مستقل موقف کوں اُجاگر کیتا۔ وزیراعظم پولینڈ دے وزیراعظم ڈونلڈ ٹسک دے ناں تہنیتی پیغام ݙتا اتے انہاں کوں وقتی پاکستان دا سرکاری دورہ کرݨ دی دعوت ݙتی۔ پولینڈ دے نائب وزیراعظم اتے وزیرخارجہ مختلف شعبیں اچ پاکستان دے نال تعلقات کوں ٻیا ودھاوݨ کیتے پولینڈ دی بھرپور دلچسپی ظاہر کیتی ۔ انہاں ݙسایا جو پاکستان دے پیٹرو کیمیکل سیکٹر اچ پولینڈ دی سرمایہ کاری 0.5 ارب ڈالر توں ودھ اے اتے تجویز پیش کیتی جو پاکستان وی واٹر ٹریٹمنٹ اچ پولینڈ دی مہارت توں فیدہ چا سڳدے۔ انہاں علاقائی امن و استحکام دے ودھارے اچ پاکستان دے کردار دی تعریف کیتی ۔ ملاقات اچ ݙوہیں ملکاں وچال تعاون کوں ٻیا مستحکم کرݨ کیتے رابطے ودھاوݨ تے اتفاق تھیا۔ ایں توں پہلے پولینڈ دے نائب وزیراعظم / وزیر خارجہ دفتر خارجہ اچ نائب وزیراعظم و وزیر خارجہ محمد اسحاق ڈار دے نال تفصیلی ڳالھ مہاڑ کیتی، ایں موقع تے ݙوہیں ملکاں وچال مفاہمت دیاں ݙو یادداشتاں تے دستخط وی کیتے ڳئن اتے مقامی تھنک ٹینک اچ ہک سیمینار توں خطاب وی کیتا۔