سلامتی کونسل دے غیر مستقل رکن دے طور تے پاکستان ودھ پرامن، انصاف پسند اتے خوشحال دنیا دی تعمیر اچ آپݨا کردار ادا کرݨ کیتے پرعزم اے، نائب وزیر اعظم اتے وزیر خارجہ سینیٹر محمد اسحاق ڈار دا سنیھا

اسلام آباد۔24اکتوبر (اے پی پی) نائب وزیر اعظم اتے وزیر خارجہ سینیٹر محمد اسحاق ڈار آکھیا جو پاکستان 26 – 2025 دی مدت کیتے اقوام متحدہ دی سلامتی کونسل دے غیر مستقل رکن دے طور تے ہک ودھ پرامن، انصاف پسند اتے خوشحال دنیا دی تعمیر اچ آپݨا کردار ادا کرݨ کیتے پرعزم اے۔ جمعہ کوں دفتر خارجہ موجب اقوام متحدہ دے ݙینھ دے موقع تے آپݨے سنیھے اچ نائب وزیراعظم آکھیا جو پاکستان ایں ڳالھ دا اعادہ کریندے جو او اقوام متحدہ دے رکن ملکاں اتے اقوام متحدہ دے نظام دے نال رَل تے کَم کرݨ کیتے تیار اے تاںجو امن، ترقی اتے انسانی وقار دی خاطر اقوام متحدہ دے چارٹر دے وعدے کوں تقویت مِلی ۔ انہاں آکھیا جو پاکستان اقوام متحدہ دے چارٹر دی 80ویں سالگرہ دے موقع تے کثیرالجہتی کیتے آپݨی ثابت قدمی دے عزم دا اعادہ کریندیں ہوئیں بین الاقوامی برادری دے نال شامل اے، اساں کوں یقین اے جو اقوام متحدہ دنیا دے سَبھ توں ودھ نمائندہ کثیرالجہتی ادارے دے طور تے سانجھے عالمی چیلنجز جِتھ بین الاقوامی امن اتے سلامتی کوں لاحق سنگین خطرے، سَبھ توں اُچی انسانی بحران، مسلسل ترقی دا خلا اتے موسمیاتی بحران توں نبڑن کیتے منفرد ادارہ اے۔ نائب وزیراعظم سینیٹر محمد اسحاق ڈار آکھیا جو بانی پاکستان قائداعظم محمد علی جناح دے وژن دی رہنمائی اچ پاکستان دی خارجہ پالیسی اقوام متحدہ دے چارٹر دے اصُولاں جِتھ ریاستاں دی خودمختار مساوات، عدم مداخلت، حق خود ارادیت اتے تنازعات دے پرامن حل شامل ہن، دے نال مضبوطی نال جُڑی ہوئی اے۔ انہاں آکھیا جو اساݙی تاریخ تصادم تے سفارت کاری، تنہائی تے مشغولیت اتے پولرائزیشن تے شراکت داری دی مسلسل ترجیح دی عکاسی کریندی اے۔ نائب وزیراعظم آکھیا جو کثیرالجہتی توں اساݙا وابستگی دا اظہار اقوام متحدہ دے نظام اچ کئی دہاڑیاں دی فعال شمولیت توں تھیندا پئے، پاکستان 1960 توں اقوام متحدہ دے امن آپریشنز اچ سَبھ توں ودھ فوجی تعاون کرݨ آلے ملکاں اچوں ہک اے اتے سَبھ توں پراݨے امن مشن اچوں ہک اقوام متحدہ دے ملٹری آبزرور گروپ انڈیا اتے پاکستان (یو این ایم او جی آئی پی) دا میزبان اے۔ انہاں آکھیا جو اقوام متحدہ دا چارٹر بین الاقوامی قانون اتے خود ارادیت برقرار رکھݨ دے اساݙے اجتماعی عزم دی توثیق کریندے، انہاں ایں ڳالھ تے افسوس کیتا جو ایں نظریات دی سَبھ توں ودھ بھارت دے غیر قانونی طور تے زیر تسلط جموں تے کشمیر اتے فلسطین اچ مسلسل خلاف ورزی کیتی ویندی پئی اے۔ نائب وزیراعظم سینیٹر محمد اسحاق ڈار آکھیا جو اقوام متحدہ دی سلامتی کونسل دی متعلقہ قرارداداں دے ذریعے کشمیری عوام دے حق خود ارادیت دی جائز خواہشاں کوں بھارت ولوں وحشیانہ جبر دے ذریعے مسترد کیتا ویندا پئے، ایں طرح غزہ اساݙی سانجھی انسانیت اتے عالمی ضمیر دا قبرستان بن ڳئے۔ انہاں آکھیا جو اقوام متحدہ دی سلامتی کونسل دے غیر مستقل رکن دے طور تے پاکستان ہک زیادہ پرامن، انصاف پسند اتے خوشحال دنیا دی تعمیر اچ آپݨا کردار ادا کرݨ کیتے پرعزم اے۔ نائب وزیر اعظم آکھیا جو پاکستان ایں سال جولائی اچ سلامتی کونسل دی آپݨی صدارت دے دوران اتفاق رائے بݨاوݨ اچ ساکھ بݨائی، اقوام متحدہ دے چارٹر دے اُصولاں کوں فروغ ݙیوݨ اچ اساݙے فعال کردار دے نال اساںکوں اِیجھے نتیجیاں کیتے کَم کرݨ دے قابل ٻݨیندے جیہڑے اقوام متحدہ دی وسیع تر رکنیت دی خواہشاں اتے ترجیحات دی عکاسی کریندن۔