پولیو دے انسداد کیتے پولیو ورکرز دی خدمات کوں سراہندوں، انہاں دی محنت اتے حکومتی اقدامات پاروں جلدی پاکستان توں پولیو دا خاتمہ تھیسی، وزیراعظم محمد شہباز شریف

اسلام آباد۔24اکتوبر (اے پی پی) وزیراعظم محمد شہباز شریف پولیو دے انسداد کیتے پولیو ورکرز دی خدمات دی تعریف کریندیں ہوئیں آکھیا جو انہاں دی محنت اتے حکومتی اقدامات پاروں جلدی پاکستان توں پولیو دا خاتمہ تھیسی۔ او جمعہ کوں انسداد پولیو دے عالمی ݙینھ دی مناسبت نال تھیوݨ آلی تقریب توں خطاب کریندے پئے ہن ۔ ایں موقع تے وفاقی وزیر صحت سید مصطفیٰ کمال، وفاقی وزیر اطلاعات و نشریات عطاء اﷲ تارڑ، وزیراعظم دی فوکل پرسن برائے انسداد پولیو عائشہ رضا فاروق، انسداد پولیو کیتے معاونت فراہم کرݨ آلے اداریاں دے حکام اتے  پورےملک توں منتخب پولیو ورکرز وی موجود ہن ۔ وزیراعظم انسداد پولیو کیتے وفاقی وزیر صحت، متعلقہ حکام اتے عالمی شراکت داراں دی کوششاں کوں لائق تحسین قرار ݙیندیں ہوئیں آکھیا جو ملک توں پولیو دے مکمل خاتمے کیتے پرعزم ہیسے۔ انہاں پولیو ورکرز دی جرأت، لگن اتے جذبے کوں خراج تحسین پیش کریندیں ہوئیں آکھیا جو بعض اوقات او آپݨی جاناں خطرے اچ پا تے اوکھی حالات اتے علاقیاں اچ انسداد پولیو کیتے خدمات سرانجام ݙیندے پئنِ، انہاں دی کوششاں پاروں پاکستان توں جلدی پولیو دا خاتمہ تھیسی۔ وزیراعظم آکھیا جو او آپݨی، پوری قوم اتے حکومت ولوں پولیو ورکرز دا شکریہ ادا کریندن ۔ انہاں آکھیا جو یوم انسداد پولیو تے تقریب دا انعقاد ایں مرض دی روک تھام کیتے حکومتی عزم دا مظہر اے۔ انہاں آکھیا جو پولیو دے خاتمے کیتے سرگرداں وڈے پاکستانی آپݨی زندگیاں ملک کیتے وقف کیتی۔ انہاں ڈبلیو ایچ او، یونیسف، بل گیٹس فاؤنڈیشن اتے سعودی عرب سَمیت سارے شراکت داراں دا خاص طور تے شکریہ ادا کیتا جیہڑے پاکستان توں پولیو دے خاتمے کیتے وݙی رقم خرچ کریندے پئن ۔ ایں توں پہلے وزیراعظم انسداد پولیو کیتے نمایاں خدمات انجام ݙیوݨ آلے پولیو ورکرز اچ شیلڈز تقسیم کيتی۔ انہاں اچ پنجاب، خیبرپختونخوا، بلوچستان، سندھ، آزاد جموں تے کشمیر اتے گلگت بلتستان سودھے ملک دے سارے صوبیاں اتے علاقیاں توں تعلق رکھݨ آلے پولیو ورکرز شامل ہن۔