وفاقی وزیر پٹرولیم ڈویژن علی پرویز ملک دی ریاست نیو سائوتھ ویلز دی وزیر نال ملاقات

سڈنی۔24 اکتوبر(اے پی پی) وفاقی وزیر پٹرولیم ڈویژن علی پرویز ملک دی ریاست نیو سائوتھ ویلز دی وزیرموسمیاتی تبدیلی، توانائی، ماحولیات تے ورثہ پینی شارپ ایم ایل سی نال ملاقات تھئی۔ ایں ملاقات وچ پاکستان تے آسٹریلیا دے درمیان توانائی تے قدرتی وسائل دے شعبیں وچ تعاون دے ودھارے دے امکانات تے ڳالھ مہاڑ تھئی ۔ وزارت پٹرولیم ڈویژن توں جاری بیان موجب ملاقات وچ قابل تجدید توانائی دے منصوبیں، خاص طور تے شمسی ٹیکنالوجی دی ترقی تے توانائی دی منتقلی دے مشترکہ چیلنجز تے توجہ مرکوز کیتی ڳئی۔ وفاقی وزیر علی پرویز ملک پائیدار تے گرین انرجی دے حل کیتے پاکستان دے عزم تے زور ݙیندے سانجھے مفاد تے مبنی شراکت داریاں تے تکنیکی تبادلے دے موقع، خصوصاً آفتاں توں بچݨ تے توانائی دے مؤثر استعمال دے شعبیں کوں اجاگر کیتا۔ ݙوہائیں فریقاں ایں ڳالھ تے اتفاق کیتا جو قابل تجدید توانائی تے وسائل دے بہتر انتظام وچ تعاون نال نہ صرف ماحولیاتی تبدیلی دے چیلنجز دا مقابلہ کیتا ونڄ سڳدے بلکہ معاشی ترقی کوں وی ودھارا ݙتا ونڄ سڳدے۔ ڳالھ مہاڑ وچ پاکستان دے معدنی وسائل دے شعبے دی ترقی تے آسٹریلوی کمپنیاں، خواہ وݙیاں ہوون یا نکیاں، کیتے سرمایہ کاری، تکنیکی مہارت تے استعداد کار وچ ودھارے دے موقع تے وی ڳالھ مہاڑ تھئی۔ اے ملاقات توانائی، ماحولیات تے پائیدار ترقی دے شعبیں وچ پاکستان تے آسٹریلیا وچال تعاون کوں مزید تکڑا بݨاوݨ دی سمت وچ ہک اہم پیش رفت ثابت تھئی۔