وفاقی وزیر ریلوے دی ایرانی وزیر نال ملاقات، ریلوے تعاون تے فریٹ ٹرین دی بحالی تے اتفاق

اسلام آباد۔24 اکتوبر(اے پی پی) وفاقی وزیر ریلوے محمد حنیف عباسی اسلام آباد وچ منعقدہ ریجنل ٹرانسپورٹ منسٹرز کانفرنس دے ݙوجھے ݙینھ ایرانی وزیر روڈز اینڈ اربن ڈویلپمنٹ فرزانہ صادق نال ملاقات کیتی۔ ملاقات وچ ݙوہیں ملکاں وچال ݙو پاسے ریلوے تعاون، فریٹ آپریشنز تے تجارتی رابطے تے تفصیلی ڳالھ مہاڑ تھئی۔ وزیر ریلوے محمد حنیف عباسی ایرانی وفد دے آوݨ تے شکریہ ادا کریندے آکھیے جو پاکستان اسلامی جمہوریہ ایران نال بھرپی آلے تعلقات کوں اہمیت ݙیندے۔ انہاں آکھیے جو ݙوہیں ملکاں دے تعلقات وچ نمایاں بہتری آئی اے تے ریلوے دے شعبے وچ تعاون دے نویں دروا تھیندے پئن۔ ݙوہیں ملکاں ریلوے دے شعبے وچ مشترکہ ایکشن پلان تے اتفاق کیتا تے انفراسٹرکچر تے آپریشنز وچ اشتراک ودھاوݨ تے غور کیتا۔ ملاقات وچ فیصلہ کیتا ڳیا جو اسلام آباد-تہران-استنبول (آئی ٹی آئی) فریٹ ٹرین دسمبر 2025ء وچ ولدا چلائی ویسی تاں جو خطے دے ملکاں وچال تجارتی رابطے کوں تقویت مل سڳے۔ ایرانی وزیر فرزانہ صادق آکھیا جو وسطی ایشیائی ملک ایران دے ذریعے عالمی منڈیاں نال جڑدے پئن تے پاکستان تے ایران رل تے چین کوں یورپ نال جوڑݨ وچ کلیدی کردار ادا کریندے پئن۔ انہاں ریلوے رابطیں اچ ودھارے کیتے پاکستان دے کردار دی تعریف کیتی۔ محمد حنیف عباسی آکھیا جو پاکستان تے ایران دے ریلوے نظام 1917ء توں منسلک ہن جݙاں جو پاکستان دا ریلوے نظام 1861ء وچ قائم تھیا تے ایندی اپ گریڈیشن دا عمل تکھے جاری اے۔ انہاں آکھیے وزیراعظم شہباز شریف دی قیادت وچ ریلوے اصلاحات دا نواں باب شروع تھی چکئے جیندے تحت کراچی پورٹ توں فریٹ ٹرانسپورٹ دے نظام کوں مزید مضبوط بݨایا ویندا پئے۔ ملاقات وچ اتفاق کیتا ڳیا جو روہڑی توں نوکنڈی 884 کلومیٹر سیکشن تے وقتی کم شروع کیتا ویسی جݙاں جو کوئٹہ توں تافتان سیکشن دی اپ گریڈیشن اڳلے سال شروع کیتی ویسی۔ ݙوہیں ملکاں فریم ورک آف کوآپریشن دے تحت ریلوے تعاون کوں وسعت ݙیوݨ تے کمرشل سرگرمیاں وچ اشتراک کوں مضبوط بݨاوݨ تے وی اتفاق کیتا۔ انہاں توں علاوہ چابہار تے گوادر بندرگاہواں کوں ریل یا سڑک دے ذریعے جوڑݨ دے امکانات تے تفصیلی تبادلہ خیال تھیا۔ ڈوہیں ملکاں ریلوے رابطیں دے ودھارے کیتے کوآرڈینیشن میکنزم تے وی اتفاق کیتا۔ وفاقی وزیر ریلوے محمد حنیف عباسی آکھیا جو پاکستان تے ایران دے درمیان سانجھے منصوبے خطے وچ معاشی ترقی دی نویں رستے ہموار کریسن تے سانجھے تعلقات کوں ہک نویں دور وچ داخل کریسن۔