صوبائی وزیر اطلاعات عظمی بخاری دی صدارت اچ اجلاس، صحافیاں دے مسئلیں دے حوالے نال اہم فیصلے

لاہور۔24 اکتوبر (اے پی پی) وزیراطلاعات و ثقافت پنجاب عظمی بخاری دی زیر صدارت ہک اجلاس تھیا جیندے وچ جرنلسٹ ہاؤسنگ سوسائٹی لاہور تے صحافیاں دے مسئلیں نال تعلق رکھݨ آلے اہم فیصلے کیتے ڳئے۔ اجلاس وچ فیصلہ کیتا ڳیا جو جرنلسٹ ہاؤسنگ سوسائٹی لاہور دے کمرشل ایریا دی نیلامی ایل ڈی اے دے ذریعے پی جے ایچ ایف دی نگرانی وچ شفاف انداز نال مکمل کیتی ویسی۔ ایل ڈی اے دی آرکیٹیکچرل ٹیم سائٹ دا دورہ کرتے ترقیاتی تجاویز تیار کریسی تاں جو ترقیاتی منصوبیں کوں معیار تے شفافیت نال مکمل کیتا ونڄ سڳے۔ اجلاس وچ لاہور پریس کلب ہاؤسنگ سکیم دے ترقیاتی معاملات تے ایل ڈی اے، واسا تے پی ایچ اے دی طرفوں تفصیلی بریفنگ ݙتی ڳئی۔ وزیر اطلاعات ہدایت کیتی جو سارے ترقیاتی کماں دی تکمیل مقررہ مدت وچ، معیار تے شفافیت کوں سامݨے رکھیندے یقینی بݨائی ونڄے۔ انہاں آکھیا جو پنجاب حکومت صحافی برادری کوں باعزت، محفوظ تے جدید رہائشی سہولتاں ݙیوݨ کیتے پرعزم اے۔ ایل ڈی اے شفاف پالیسی تیار کرے تاں جو وسائل دا بہتر تے منصفانہ استعمال ممکن بݨایا ونڄ سڳے۔ عظمی بخاری آکھیا جو نہر تے نویں پل دی تعمیر دا عمل وی وقتی شروع کیتا ویسی جݙاں جو واسا نامکمل پاݨی دے لنک سسٹم کوں فعال بݨاوݨ کیتے اقدامات کریسی۔ اجلاس وچ سیکرٹری اطلاعات طاہر رضا ہمدانی، ڈی جی ایل ڈی اے طاہر فاروق، ایم ڈی واسا غفران علی، صدر لاہور پریس کلب ارشد انصاری، عدنان رشید تے اسد حسین شرکت کیتی۔