کابینہ دی اقتصادی رابطہ کمیٹی دااجلاس، کئی وزارتاں سانڳے تکنیکی ضمنی گرانٹس دی منظوری

اسلام آباد۔24 اکتوبر (اے پی پی) کابینہ دی اقتصادی رابطہ کمیٹی (ای سی سی) وزارت دفاع تے الیکشن کمیشن سودھے کئی وزارتاں کیتے تکنیکی ضمنی گرانٹس دی منظوری ݙتی اے جݙاں جو وفاقی وزیر خزانہ و محصولات سینیٹر محمد اورنگزیب عوام دی قوت خرید دے تحفظ تے مجموعی قیمتاں دے استحکام کوں یقینی بݨاوݨ کیتے مسلسل نگرانی، متعلقہ اداریں وچال بہتر ہم آہنگی تے وقتی حکومتی اقدامات دی اہمیت تے زور ݙتے۔ انہاں اے ڳالھ اتھاں کابینہ دی اقتصادی رابطہ کمیٹی دے اجلاس دی صدارت کریندے آکھی۔ اجلاس وچ وفاقی وزیر توانائی سردار اویس احمد خان لغاری، وفاقی وزیر منصوبہ بندی، ترقی و خصوصی اقدامات احسن اقبال، وفاقی سیکریٹریز تے متعلقہ وزارتاں، ڈویژناں تے ریگولیٹری اداریں دے سینئر حکام شرکت کیتی۔اجلاس دے دوران وزارت منصوبہ بندی، ترقی و خصوصی اقدامات دے چیف اکانومسٹ ڈاکٹر امتیاز احمد ملک وچ مہانگ دے رجحانات تے قیمتاں وچ لہہ چڑھ تے تفصیلی بریفنگ ݙتی جیندے وچ نیشنل پرائس مانیٹرنگ کمیٹی دی سفارشات تے نتیجے شامل ہن۔ ڈاکٹر امتیاز کمیٹی کوں آکھیا جو ساوݨ دی اڄوکی چھل پاروں پہلے مہانگ دی شرح معتدل ہئی تاں جو ستمبر 2025ء وچ اے ودھ تے 5.6 فیصد تھی ڳئی۔ ایں اضافے دی بنیادی وجہ زرعی اراضی تے مال ڈھور کوں تھیوݨ آلا ضیان اے جئیں پاروں سپلائی چین متاثر تھئی تے خوراک دی قیمتاں وچ ودھارا تھیا، قیمتاں دے حساس اشاریے وچ وی اکتوبر دے دوران مزید اضافہ ریکارڈ کیتا ڳیا۔ انہاں پاکستان بیورو آف سٹیٹسٹکس دے اعداد و شمار دا حوالہ ݙیندے آکھیا جو مرغی، چاول تے ایل پی جی سودھے اگرچہ کجھ ضرورت دیاں چیزاں دی قیمتاں وچ کمی آئی اے تاں جو کھنڈ ، گوشت، خوردنی تیل تے گھیو جیھاں بنیادی چیزاں دیاں قیمتاں ودھئن ۔ ڈاکٹر امتیاز کمیٹی کوں آکھیا جو نیشنل پرائس مانیٹرنگ کمیٹی دی طرفوں مہانگ تے قابو پاوݨ کیتے مختلف پالیسی اقدامات زیر غور ہن جنہاں وچ عالمی قیمتاں دے اثرات تے حساسیت تے مبنی تجزیہ، وفاقی تے صوبائی اداریں دے درمیان بہتر رابطہ کاری تے چھل توں متاثرہ اضلاع دے کساناں کیتے ہدف تے مبنی زرعی قرضہ جات شامل ہن، مسابقتی کمیشن کوں خوردنی تیل تے گھیو دے شعبیں وچ ممکنہ کارٹلائزیشن دے امکانات دا جائزہ گھنݨ دی ہدایت وی کیتی ڳئی اے۔ انہاں آکھیا جو رمضان المبارک دے دوران قیمتاں دے استحکام کیتے جامع منصوبہ تیار کیتا ویندا پئے تے صوبیں کوں پاکستان بیورو آف سٹیٹسٹکس دے ڈیسیژن سپورٹ سسٹم توں فیدہ چاوݨ دی ترغیب ݙتی ویندی پئی اے تاں جو مارکیٹ مانیٹرنگ تے قیمتاں دی نگرانی کوں مزید مؤثر بݨایا ونڄ سڳے۔وزیر خزانہ ڈاکٹر امتیاز احمد دی جامع رپورٹ دی تعریف کیتی تے ساریاں متعلقہ وزارتاں تے صوبائی حکام کوں ہدایت کیتی جو مہانگ تے قابو پاوݨ تے قیمتاں دے استحکام کیتے تجویز کردہ اقدامات تے مؤثر عمل درآمد یقینی بݨایا ونڄے۔ انہاں مسلسل نگرانی، ادارہ جاتی ہم آہنگی تے وقتی اقدامات تے زور ݙیندے آکھیا جو ایں اقدامات دے ذریعے عوام دی قوت خرید دا تحفظ تے مارکیٹ وچ استحکام یقینی بݨایا ونڄ سڳدے۔اجلاس وچ وزارت تجارت دی طرفوں درآمدی پالیسی آرڈر 2022 دے تحت پری شپمنٹ انسپیکشن کوں بہتر بݨاوݨ دی سمری پیش کیتی ڳئی۔ کمیٹی تسلیم شدہ تے رجسٹرڈ پی ایس آئی ایجنسیز کوں پالیسی موجب معائنہ کرݨ دی اجازت ݙیوݨ دیاں تجویزاں دی منظوری ݙتی۔ اجلاس وچ ٹرانسفر آف ریزیڈنس، پرسنل بیگج اینڈ گفٹ سکیم دے تحت گاݙیاں دی درآمد دے طریقہ کار وچ مجوزہ ترامیم نال تعلق رکھݨ آلی وزارت تجارت دی ہک ٻئی سمری تے غور کیتا ڳیا، مختلف پہلواں تے تفصیلی غور دے بعد کمیٹی وزارت تجارت کوں متعلقہ شراکت داراں دے نال مزید مشاورت کرتے ایں تجویز کوں ولدا پیش کرݨ دی ہدایت کیتی۔اجلاس وچ وزارت تجارت دی طرفوں پیش کیتی ڳئی قیمتی دھاتاں تے زیورات دی درآمد و برآمد نال تعلق رکھݨ آلی پالیسی تے وی غور کیتا ڳیا۔ ای سی سی موجودہ فریم ورک کوں برقراررکھیندے شفافیت تے خودکار نظام وچ بہتری کیتے اقدامات دی منظوری ݙتی تاں جو کارکردگی تے ٹریس ایبلٹی وچ ودھارا تھی سڳے۔اجلاس وچ وزارت دفاع دی طرفوں ݙو سمریاں وی پیش کیتیاں ڳئیاں، پاکستان نیوی دے تحت پاکستان میری ٹائم سائنس اینڈ ٹیکنالوجی پارک دے قیام کیتے 2.500 ارب روپے دی تکنیکی ضمنی گرانٹ دی منظوری ݙتی ڳئی، فرنٹیئر ورکس آرگنائزیشن کیتے متحدہ عرب امارات وچ ایندی ٻاہرلی تعمیراتی سرگرمیاں کیتے استعمال تھیوݨ آلی اوور ڈرافٹ فسیلٹی دی ادائیگی کیتے 45 ملین درہم دے مساوی رقم دی تکنیکی ضمنی گرانٹ دی منظوری وی ݙتی ڳئی۔اجلاس وچ الیکشن کمیشن آف پاکستان دی طرفوں مقامی حکومت دے انتخابات دے خرچے پورے کرݨ کیتے 455.984 ملین روپے دی تکنیکی ضمنی گرانٹ نال تعلق رکھݨ آلی درخواست دی وی منظوری ݙتی ڳئی۔اجلاس وچ وزارت خزانہ دی طرفوں پاکستان منٹ رہائشی کالونی وچ انفرادی بجلی میٹراں دی تنصیب کیتے 112.118 ملین روپے دی تکنیکی ضمنی گرانٹ دی درخواست وی منظور کر گھدی ڳئی۔اجلاس وچ وزارت داخلہ و انسداد منشیات دی طرفوں پاکستان رینجرز (پنجاب) دے ہیڈ کوارٹرز کیتے ہیلی کاپٹر دی مرمت دے پرزہ جات دی خریداری کیتے 21.500 ملین روپے دی تکنیکی ضمنی گرانٹ نال تعلق رکھݨ آلی سمری دی منظوری وی ݙتی ڳئی۔