وزیراعظم دا شاہین چوک انڈر پاس دے سنگ بنیاد دی تقریب توں خطاب

اسلام آباد۔24 اکتوبر(اے پی پی) وزیراعظم محمد شہباز شریف آکھیے جو وفاقی دارالحکومت اسلام آباد وچ ترقیاتی منصوبیں دی تکمیل نال نہ صرف شہریاں کوں سہولت ملسی تے شاہراہواں تے ٹریفک رواں تھیسی بلکہ دنیا وچ ملک دا مثبت تشخص وی اجاگر تھیسی۔ انہاں اے ڳالھ اتھاں شاہین چوک انڈر پاس دے سنگ بنیاد رکھݨ دی تقریب توں خطاب کریندے آکھی۔ ایں موقع تے وفاقی وزراء، ارکان اسمبلی تے اسلام آباد دے عمائدین تے وزارت داخلہ و سی ڈی اے سودھے متعلقہ محکمیں دے اعلیٰ حکام وی موجود ہن۔ وزیراعظم تقریب توں خطاب کریندے آکھیا جو ہک ٻئے انڈر پاس دی تعمیر نال وفاقی دارالحکومت وچ اہم شاہراہواں تے ٹریفک دا دٻاؤ گھٹ تھیسی، ٹریفک جام ختم تھیسی تے گاݙیاں چلدیاں رہسن ۔ انہاں ترقیاتی منصوبیں دی تکھے تکمیل تے وزیر داخلہ تے انہاں دی ٹیم دی تعریف کریندے آکھیا جو شہر کوں مزید سوہݨا بݨاوݨ کیتے اقدامات کیتے ویندے پئن، تکھی رفتار منصوبیں دی تکمیل نال اڳوں شنگھائی تعاون تنظیم دا آندا اجلاس جیڑھا اسلام آباد وچ منعقد تھیسی، دے ذریعے اسلام آباد تے ملک دا ھک چنڳاں تے مثبت تشخص اجاگر تھیسی تے بہترین انتظامات یقینی بݨاوݨ وچ مدد ملسی۔ وزیراعظم آکھیا جو ملک دے بہترین مفاد وچ سارے منصوبیں کوں مکمل کیتا ویسی۔ وزیراعظم کوں ایں موقع تے منصوبے تے بریفنگ ݙتی ڳئی جݙاں جو انہاں نے منصوبے دا سنگ بنیاد وی رکھیا۔ وزیر داخلہ محسن نقوی تقریب توں خطاب کریندے آکھیا جو مارگلہ روڈ تے ٹریفک دا دٻاؤ ہئی جیندے تے ایں انڈر پاس نال قابو پاوݨ وچ مدد ملسی۔ انہاں ݙسیا جو الیونتھ ایونیو تے وی کم شروع کیتا ویندا پئے، وقتی مزید وݙے منصوبیں دا وی آغاز تھیسی، کشمیر چوک انڈر پاس وی تعمیر کیتا ویسی۔ ایس سی او کانفرنس کوں سامݨے رکھیندے شہر کوں سوہݨا بݨایا ویندا پئے تے عالمی معیار دے انتظامات کیتے ویندے پئن، ہک سال وچ اسلام آباد کوں جدید تے سوہݨے شہر وچ بدل ݙیسوں۔