سارا پاکستان ہک فیملی اے، محبت، ایثار تے قربانی نال ڳھن تے امن، ترقی تے خوشحالی کوں مشعل راہ بݨاوݨ اے۔ کتھائیں وی ٻھاہ لڳے، اوںکوں رَل تے وسماوݨی پوسی، وزیر اعظم محمد شہباز شریف

اسلام آباد۔ 25 اکتوبر (اے پی پی)  وزیراعظم محمد شہباز شریف قومی یکجہتی تے ہم آہنگی دی لوڑھ تے زور ݙیندیں ہوئیں آکھیا جو سارا پاکستان ہک گھرانہ اے، کتھائیں وی سارا پاکستان ہک فیملی اے، محبت، ایثار تے قربانی نال ڳھن تے امن، ترقی تے خوشحالی کوں مشعل راہ بݨاوݨ اے۔ کتھائیں وی ٻھاہ لڳے، اوںکوں رَل تے وسماوݨی پوسی۔ اے ڳالھیں انہاں ہفتے کوں نیشنل ورکشاپ بلوچستان دے شرکا توں خطاب کریندیں ہوئیں کیتا۔ ایں موقع تے وفاقی وزرا، ارکان اسمبلی، اہل دانش اتے سرکاری افسران دی وݙی تعداد موجود ہئی ۔ وزیر اعظم محمد شہباز شریف آکھیا جو بلوچستان ملک دا رقبے دے لحاظ توں سبھ توں وݙا صوبہ اے، بلوچ رہنماواں رضا کارانہ طور تے پاکستان دے نال الحاق دا تاریخی فیصلہ کیتا ہا، ایں صوبے دی تاریخ، ثقافت اتے روایات اینکوں منفرد بݨیندی اے ۔ انہاں آکھیا جو اللہ تعالی بلوچستان کوں بے شمار قدرتی وسائل نال نوازیے، افسوس جو بلوچستان دی دولت ہݨ وی زمین دے اندر دفن اے اتے اُسے کڈھیا نئیں ونڄ سڳیا۔ انہاں آکھیا جو بلوچستان رقبے دے لحاظ توں کھلا صوبہ اے جِتھ بلوچ اتے پختون سَمیت مختلف برادریاں اتے قبیلے آباد ہن، اُنجھ اچ دیرپا ہم آہنگی قائم رہی، بلوچ عوام ہمیشہ کشادہ دل اتے مہمان نواز رہین، پنجابی مہاجرین سودھے سارے عرصے توں رَل تے ہم آہنگی نال رہندے رہین، بلوچستان دی روایات اتے ثقافت قابل فخر اے۔ وزیراعظم محمد شہباز شریف آکھیا جو رقبے اتے آبادی کیتے سڑکاں دے مضبوط انفراسٹرکچر دے بغیر تعلیم، صحت، روزگار دی سہولتاں اتے صنعت دی ترقی ممکن نئی، ڊور دراز آبادیاں تئیں بجلی اتے سڑکاں دی فراہمی وڈا مسئلہ اے، صوبے دی جغرافیائی ساخت ترقی دے پندھ کیتے چیلنج بݨ ڳئی اے۔ انہاں آکھیا جو بلوچستان دی ترقی پاکستان دی مجموعی خوشحالی نال جُڑی ہوئی ، ایں کیتے مالی وسائل دی وی لوڑھ اے۔ وزیراعظم محمد شہباز شریف یاد ݙیوایا جو 2010 اچ جݙاں او وزیر اعلیٰ پنجاب ہن تاں تریھ ݙینھ تئیں لاہور اچ این ایف سی دا اجلاس تھیا، ایں این ایف سی ایوارڈ اچ پنجاب تاریخی قربانی ݙتی، اساں پہلے پاکستانی اتے بعد اچ صوبیاں دے مکین ہیسے، صوبیاں وچال اتفاق رائے پاکستان دی مضبوطی دی بنیاد اے، ایں ایوارڈ تے اتفاق رائے دے بعد اساں ساریاں مینار پاکستان گئے اتے ایں عہد دی تجدید کیتی جو پاکستان کوں قائد دے خواباں دی تعبیر بݨیسن ۔ انہاں آکھیا جو پاکستان ہمیشہ سَبھ توں پہلے اے اوں دے بعد اساں بلوچ، سندھی، پنجابی اتے پشتون ہیسے، اج جائزہ ڳھݨا پوسی جو ݙکھاں 2018 اچ دہشت گردی دا مکمل خاتمہ کر ݙتا ڳیا ہا تاں ولا فاصلے اتے شکایتاں کیوں اتے کینویں پیدا تھئیاں، اے چبھدا ہویا سوال اے جیندے جواب لبھݨن، مسائل کوں اُنجھ دے حقیقی تناظر اچ سمجھݨے پوسن اتے ساریاں کوں رَل تے ملکی ترقی اچ آپݨا کردار ادا کرݨا پوسی۔ انہاں دا آکھݨ ہا جو صوبیاں وچال اتفاق رائے پاکستان دی مضبوطی دی بنیاد اے، وفاق دی روح آپسی قربانی اتے بھائی چارے اچ پوشیدہ اے، گزریل ݙہاکیاں اچ بلوچستان کوں نظر انداز کرݨ خود احتسابی دا لمحہ ہے۔ انہاں آکھیا جو کراچی توں چمن روڈ کوں خونی روڈ آکھیا ویندے، بے تحاشا حادثے تھیندن، پیٹرولیم مصنوعات دی قیمتاں اچ ڳھٹکی تھئی تاں اوندا فیدہ براہِ راست عوام کوں منتقل کرݨ دے بجائے ساݙھے ترائے سو ارب روپے دے تخمینے نال ایں شاہراہ کوں ݙو رویہ بݨاوݨ دا فیصلہ کیتا ڳیا، اساں چاہندوں جو خونی روڈ کوں امن دی سڑک اچ بدل ݙتا ویسے، امن، اتحاد اتے بھائی چارہ ترقی دی ضمانت اے۔ انہاں آکھݨ ہا جو پاکستان دے سارے صوبے ہک خاندان ہن، ”پاکستان فیملی “، محبت، اخوت اتے یقین نال اساں کوں رل تے رہݨا پوسی ، اتحاد، محبت اتے عزم نال بلوچستان توں پشاور تئیں ترقی ممکن اے۔ وزیر اعظم محمد شہباز شریف آکھیا جو مسائل اڄ وی ہن اتے ولا وی ہوسن، پاکستان اساݙا گھر اے، امن اتے ترقی کوں مشعلِ راہ بݨاوݨے، یکجہتی، ایثار اتے قربانی توں کَم ڳھن تے پاکستان کوں عظیم ملک بݨاوݨے۔