آر ایل این جی نال گھریلو صارفین کوں معیاری ایندھن دی فراہمی ممکن تھیسی، وزیراعظم محمد شہباز شریف دا گھریلو کنکشنز دے اجراء دی تقریب توں خطاب

اسلام آباد۔26اکتوبر (اے پی پی) وزیراعظم محمد شہباز شریف آکھیا جو آر ایل این جی توں گھریلو صارفین کوں معیاری ایندھن دی فراہمی ممکن تھیسی، ملک بھر اچ لکھاں صارفین گیس کنکشنز دے منتظر ہن ، انہاں دی حکومت ملک اچ ݙینھ بجلی دی لوڈ شیڈنگ دا مسئلہ وی حل کیتا ہا، پاکستان دی ترقی کیتے ݙینھ رات محنت کرݨی پوسی ۔ اے ڳالھیں انہاں اتوار کوں ری گیسیفائیڈ لیکویفائیڈ نیچرل (آر ایل این) گیس دے گھریلو کنکشنز دے اجراء دی تقریب توں خطاب کریندیں ہوئیں کیتی۔ ایں موقع تے نائب وزیر اعظم تے وزیر خارجہ اسحاق ڈار، وفاقی وزراء، ارکان اسمبلی، ایس این جی پی ایل تے اعلیٰ سرکاری حکام وی موجود ہن اے۔ وزیر اعظم آکھیا جو گیس کنکشنز دی فراہمی بہت وݙا عوامی مطالبہ ہا ۔ 2022 اچ حکومت سنبھالی تاں گیس کنکشنز دی فراہمی دا بہت دباؤ ہا، سپلائی گھٹ، منگ ودھ ہئی، لکھاں لوک گیس کنکشنز دی فراہمی کیتے انتظار اچ ہن، جِتھ پائپ لائنز وچھا ݙتی ڳئن اُتھاں وی گیس فراہمی ممکن نہ ہئی کیوں جو گیس موجود ای نہ ہئی، اساں ایں مسئلے تے توجہ ݙتی اے۔ اڄ گھریلو صارفین کیتے معیاری ایندھن دستیاب تھی ڳئے، ایں سابق وزیر اعظم میاں نواز شریف دے عوامی خدمت دے اقدامات دا تسلسل اے، 2013 اچ تریجھی واری وزیراعظم منتخب تھیوݨ دے بعد انہاں ملک اچ اٹھاراں اٹھاراں ڳھنٹے ݙینھ دی لوڈ شیڈنگ دا مسئلہ حل کیتا ہا ۔ آج گیس دا مسئلہ وی مسلم لیگ ن، پیپلز پارٹی، ایم کیو ایم سودھے اتحادی جماعتاں تے مشتمل پی ڈی ایم دی حکومت حل کیتے جِتھ میں ساریاں کوں مبارکباد ݙین٘داں۔ انہاں آکھیا پاکستان دی ترقی کیتے اساں کوں ݙینھ رات محنت کرݨی اے اتے آپݨے ملک کوں اڳوں ودھاݨا اے۔ وزیراعظم ایں توں پہلے تختی دی نقاب کشائی کر دے آر ایل این جی کنکشنز دی فراہمی دا افتتاح کیتا ۔ وفاقی وزیر توانائی تے پٹرولیم ڈویژن علی پرویز ملک آکھیا جو وزیراعظم دی ہدایت تے حکومت قطر تے ٻئے ملکاں نال رَل تے توانائی دا مسئلہ حل کرݨ تے توجہ ݙتی تاںجو ایں مسئلے دا مستقل حل کیتا ونڄے۔ 2026 تئیں مقامی ایندھن دے کھوہ وی چالو کریسوں اتے عوام کوں سستا اتے معیاری ایندھن ݙیسوں۔ انہاں آکھیا جو ہݨ گھریں اچ گیس سلنڈر نہ رکھݨے پوسن۔ انہاں آکھیا جو ہک سال اچ ایس این جی پی ایل 29 ارب منافع کمائے، لائن لاسز گھٹ تھی تے 4.93 فیصد تے آگئے ، آر ایل این جی محفوظ اتے ماحول دوست ایندھن اے، گیس کنکشنز دی فراہمی ہݨ سوکھی تھی ڳئی اے۔