کنٹرول لائن دے ݙوہیں پاسے اتے پوری دنیا اچ کشمیری اڄ یوم سیاہ منیندے پئن

سرینگر۔27اکتوبر (اے پی پی) کنٹرول لائن دے ݙوہیں پاسے اتے پوری دنیا اچ  کشمیری اڄ 27 اکتوبر کوں یوم سیاہ منیندے پئن۔ جیندا مقصد دنیا کوں ایں ڳالھ دا سنیھا ݙیوݨ اے جو بھارت انہاں دے مادرِ وطن تے غیر قانونی اتے انہاں دی مرضی دے خلاف قبضہ کیتا ہوئے۔ کشمیر میڈیا سروس موجب یوم سیاہ مناوݨ دی اپیل کل جماعتی حریت کانفرنس کیتی اے۔ بھارتی فوج ولوں 27اکتوبر 1947کوں علاقے تے حملے اتے 5 اگست 2019کوں نریندر مودی دی قیادت ہندوتوا حکومت ولوں جموں تے کشمیر دی خصوصی حیثیت دی منسوخی دے خلاف آزاد کشمیر، پاکستان اتے دنیا بھر اچ احتجاجی مارچ، ریلیاں اتے سیمینارز دا انعقاد کیتا ویندا پئے۔ بھارتی فوجیاں 1947کوں اڄ دے ݙینھ تقسیم برصغیر دے منصوبے دی کھلی خلاف ورزی کریندیں ہوئیں جموں تے کشمیر تے فوجی حملہ کیتا اتے کشمیری عوام دی مرضی دے خلاف اوں تے غیر قانونی قبضہ کر ڳھدا ہا۔ کل جماعتی حریت کانفرنس ایں موقع تے عالمی برادری توں مطالبہ کیتا جو او بھارت دے غیر قانونی زیر تسلط جموں و کشمیر دے مظلوم عوام کوں آپݨے مادرِ وطن تے بھارت دا ناجائز قبضہ ختم کراوݨ اچ مدد کرن ۔ حریت کانفرنس آپݨے چیئرمین مسرت عالم بٹ، شبیر احمد شاہ، محمد یاسین ملک، آسیہ اندرابی، ناہیدہ نسرین، فہمیدہ صوفی، نعیم احمد خان، ایاز اکبر، پیر سیف اللہ، راجہ معراج الدین کلوال، بلال صدیقی، مولوی بشیر عرفانی، مشتاق الاسلام، عبدالاحد پرہ، ظفر اکبر بٹ اتے خرم پرویز سودھے غیر قانونی طور تے نظر بند سارے سیاسی قیدیوں دی فوری رہائی دا مطالبہ کیتے۔