جموں تے کشمیر اچ بھارتی اقدامات اقوام متحدہ دے چارٹر، سلامتی کونسل دی قرارداداں اتے چوتھے جنیوا کنونشن دی کھلی خلاف ورزی ہن، نائب وزیر اعظم تے وزیر خارجہ سینیٹر اسحاق ڈار دا سنیھا

اسلام آباد۔27اکتوبر (اے پی پی) نائب وزیر اعظم اتے وزیر خارجہ سینیٹر محمد اسحاق ڈار کشمیری عوام دے عزم و استقلال کوں خراج تحسین پیش کریندیں ہوئیں آکھیا جو کشمیر دی خصوصی حیثیت دی منسوخی، کالے قوانین دا نفاذ، غیر مقامی افراد کوں ڈومیسائل جاری کر تے آبادیاتی ڈھانچے اچ تبدیلی اتے کشمیری قیادت کوں قید و بند اچ رکھݨ اقوام متحدہ دے چارٹر، سلامتی کونسل دی قرارداداں اتے چوتھے جنیوا کنونشن دی کھلی خلاف ورزی اے۔ بدترین پابندیاں اتے چیلنجز دے باوجود کشمیریوں دی جدوجہد دلیری، وقار اتے ثابت قدمی دی شاندار مثال اے۔ یوم سیاہ کشمیر دے موقع تے آپݨے خصوصی سنیھے  اچ انہاں آکھیا جو 27 اکتوبر 1947 او سیاہ ݙینھ اے جݙاں بھارتی فوج سری نگر اچ داخل تھی تے جموں و کشمیر تے غیر قانونی قبضہ کیتے۔ پچھلے 78 سالیں توں بھارت دے غیر قانونی زیرِ تسلط جموں تے کشمیر دی عوام بھارتی قابض افواج دے ظلم، جبر اتے استبداد دا شکار ہن ۔ انہاں آکھیا جو اقوام متحدہ دی سلامتی کونسل آپݨی کئی قرارداداں اچ واضح طور تے طے کیتا ہا جو جموں و کشمیر دے مستقبل دا فیصلہ اقوام متحدہ دی نگرانی اچ آزادانہ اتے غیر جانبدارانہ رائے شماری نال تھیسی لیکن بھارت ایں قرارداداں دی مسلسل خلاف ورزی کریندیں ہوئیں طاقت اتے جبر دے بل تے تسلط قائم رکھیا ہویا اے۔ انہاں آکھیا جو پاکستان ہمیشہ ایں قرارداداں دی حرمت اتے مرکزیت دا پابند رہیے اتے عالمی برادری تے مسلسل زور ݙیندا آئے تاںجو ایں تنازع دا منصفانہ اتے مستقل حل ممکن تھی سڳے۔ انہاں آکھیا جو پنج اگست 2019 دے غیر قانونی اتے یکطرفہ بھارتی اقدامات دے بعد بھارت دے غیر قانونی زیر تسلط جموں تے کشمیر اچ انسانی المیہ ٻئیا سنگین تھی ڳئے ۔ کشمیر دی خصوصی حیثیت دی منسوخی، کالے قوانین دا نفاذ، غیر مقامی افراد کوں ڈومیسائل جاری کر تے آبادیاتی ڈھانچے اچ تبدیلی اتے کشمیری قیادت کوں قید و بند اچ رکھݨ اقوام متحدہ دے چارٹر، سلامتی کونسل دی قرارداداں اتے چوتھے جنیوا کنونشن دی کھلی خلاف ورزی اے۔ انہاں پہلگام واقعے دے بعد بھارتی حکام ولوں مقبوضہ جموں و کشمیر اچ کریک ڈاؤن، بے گناہ کشمیریوں دی گرفتاریاں، پچھ گچھ اتے گھریں کوں مسمار کرݨ جیسے اقدامات تے شدید تشویش دا اظہار کیتے۔ نائب وزیر اعظم تے وزیر خارجہ عالمی برادری توں مطالبہ کیتا جو او بھارت دے غیر قانونی زیر تسلط جموں و کشمیر دے مظلوم عوام دی تکلێفاں دے خاتمے کیتے مؤثر کردار ادا کرن ۔ انہاں ایں عزم دا اعادہ کیتا جو پاکستان کشمیری عوام دی منصفانہ جدوجہد کیتے آپݨی سیاسی، اخلاقی اتے سفارتی حمایت جاری رکھیسی اتے ہر بین الاقوامی فورم تے اُنھاں دے حقِ خودارادیت کیتے آواز چیندا رہسی۔