ملکی دفاع مضبوط ہتھاں اچ اے، مثبت خارجہ پالیسی پاروں ساوے پاسپورٹ دی عزت ودھی اے، مسلح افواج دی پیشہ ورانہ صلاحیتاں تے ماݨ اے ، کھیݙ اچ سیاست نی تھیوݨی چاہیدی، عطا اللہ تارڑ

لاہور۔26اکتوبر(اے پی پی) وفاقی وزیراطلاعات و نشریات عطا اللہ تارڑ آکھیے جو ملک دا دفاع مضبوط ہتھاں اچ اے، مثبت خارجہ پالیسی پاروں ساوے پاسپورٹ دی عزت ودھی اے، مسلح افواج دی پیشہ ورانہ صلاحیتاں تے ماݨ اے ، کھیݙ اچ سیاست نی تھیوݨی چاہیدی، نوجواناں کوں ودھ توں ودھ سہولتاں ݙیوݨ ترجیح اے۔ اے ڳالھ انہاں اتھاں پنجاب پیڈل ایسوسی ایشن دے زیرِ اہتمام منعقدہ پہلی پنجاب پیڈل چیمپیئن شپ 2025 دی اختتامی تقریب توں خطاب کریندے آکھی ۔ وفاقی وزیر اطلاعات آکھیا جو پاکستان اچ بے پناہ ٹیلنٹ موجود اے، ضرورت صرف ایں ٹیلنٹ کوں کم اچ گھݨ آوݨ دی اے۔ اساݙی قومی ذمہ واری اے جو اساں نوجواناں کوں ٻیاں سہولتاں ݙیوں، ایں حوالے نال حکومت دی پہلی ترجیح اے جو نوجواناں کوں ودھ توں ودھ سہولتاں ݙتیاں ونڄن۔ اُنہاں آکھیا جو سی ڈی اے کھیݙاں دیاں بہترین سہولتاں ݙتن اتے اسلام آباد سپر مارکیٹ اچ پیڈل کورٹس بݨائے ڳئن۔ وفاقی وزیر آکھیا جو پاکستان کھیݙ دے شعبے اچ کئی کامیابیاں حاصل کیتن، کھیݙ اچ سیاست نی تھیوݨی چاہیدی، نوجوان نسل کوں مثبت سرگرمیاں آلے پاسے راغب کرݨا چاہیدے۔ اُنہاں آکھیا جو پیڈل کوں ملک دے اندر مقام ملدا پئے، پبلک پرائیویٹ پارٹنر شپ دے تحت پیڈل دی پروموشن کیتے کم کرݨا چاہیدا اتے نوجواناں کوں کھیݙ دے ودھ توں ودھ موقع ݙیوݨے چاہیدن۔ ایں سلسلے اچ نجی شعبے کوں کھیݙاں دے ودھارے کیتے اڳوں آوݨا چاہیدے۔ ہک سوال دے جواب اچ عطا اللہ تارڑ آکھیا جو وطن عزیز ول کوئی میلی اَکھ نال نی ݙیکھ سڳدا، ملکی دفاع مضبوط ہتھاں اچ اے، مسلح افواج ہمیشہ کہیں وی جارحیت دا منہ بھن جواب ݙتا، پاک فوج دی پیشہ ورانہ صلاحیتاں تے ماݨ اے۔ وفاقی وزیر اطلاعات آکھیا جو حکومت ملکی ترقی کیتے ݙینھ رات کوششاں کریندی پئی اے جیندے کیتے بھرپور اقدامات چاتےویندے پئن، کامیاب سفارت کاری پاروں پاکستان کوں دنیا بھر اچ پذیرائی ملدی پئی اے اتے اساݙے اقوام عالم نال تعلقات اچ بہتری آئی اے، صدر ٹرمپ نے فیلڈ مارشل جنرل عاصم منیر اتے وزیراعظم محمد شہباز شریف دی امن کیتے کیتی ونڄݨ آلی کوششاں دی تعریف کیتی اے، حکومت دی مثبت خارجہ پالیسی دی بدولت ساوے پاسپورٹ دی عزت ودھی اے۔ انہاں آکھیا جو وزیراعظم محمد شہبازشریف سعودی ولی عہد شہزادہ محمد بن سلمان دی دعوت تے ترائے ݙینھ دے دورے تے سعودی عرب روانہ تھیندے پئن ، ایں دورے اچ سعودی عرب دے نال تجارت، سرمایہ کاری، انسانی وسائل سَمیت مختلف شعبیں اچ تعاون دے بارے اچ ڳالھ تھیسی، ایں دورہ ݙوہیں ملکاں وچال اسٹریٹیجک تعلقات دا عکاس اے۔ اُنہاں آکھیا جو وزیراعظم محمد شہباز شریف دی قیادت اچ ملکی معیشت بہتری ول ویندی پئی اے، آوݨ آلے ݙینھاں اچ ٻیاں خوشخبریاں ملسن