آزادی دی آواز چاوݨآلے کشمیری اڄ وی بھارتی جیلاں اچ قید ہن، پاکستان ہر فورم تے کشمیری عوام دے حق خودارادیت دی ڳالھ کریندا رہسی، وفاقی وزیر انجینئر امیرمقام

اسلام آباد۔27اکتوبر(اے پی پی) وفاقی وزیر امور کشمیر، گلگت بلتستان و سیفران انجینئر امیرمقام آکھیے جو بھارت دے غیر قانونی زیرِ تسلط جموں و کشمیر اچ کئی ݙہاکیں توں ظلم و بربریت جاری اے، آزادی دی آواز اُچی کرݨ آلے کشمیری اڄ وی بھارتی جیلاں اچ قید ہن، اساں کشمیریاں دی سیاسی، سفارتی اتے اخلاقی مدد جاری رکھیسوں، افواجِ پاکستان دے کردار توں کشمیر کاز کوں عالمی سطح تے نویں تقویت ملی اے۔ اے ڳالھ انہاں اسلام آباد اچ حریت رہنماواں دے نال یوم سیاہ کشمیر دی مرکزی تقریب توں خطاب کریندے آکھی ۔ کشمیریاں نال اظہار یکجہتی کیتے ریڈیو پاکستان توں ڈی چوک تئیں ریلی کڈھی ڳئی جیندی قیادت وفاقی وزیر امیر مقام کیتی۔ ریلی اچ سیکرٹری خارجہ آمنہ بلوچ، ترجمان دفتر خارجہ طاہر اندرابی، جموں و کشمیر لبریشن سیل، حریت رہنماواں عبدالحمید لون، فاروق رحمانی، چیئرمین کشمیر کمیٹی رانا قاسم نون اتے پاکستان بیت المال دے سرپرست اعلیٰ زمرد خان، سرکاری افسران وزارتِ اطلاعات اتے وزارتِ خارجہ دے نمائندیں اتے ٻئے حریت رہنماواں شرکت کیتی۔ ریلی اچ مختلف سیاسی و سماجی رہنماواں اتے مختلف سکولاں و کالجاں دے طالب علماں وی شرکت کیتی۔ شرکا پلے کارڈز اتے بینرز چاتے ہوئے ہن، اُنہاں کشمیری عوام دے حق اچ نعرے لاتے۔ ریلی توں خطاب کریندے ہوئیں وفاقی وزیر سارے شرکا دا شکریہ ادا کریندے آکھیا جو اڄ27 اکتوبر او ݙینھ اے جݙاں بھارت کشمیر تے غیر قانونی قبضہ کیتا، بھارت دے غیر قانونی زیرِ تسلط جموں کشمیر اچ کئی ݙہاکیں توں بھارتی ظلم و بربریت جاری اے، کشمیری عوام دے جذبے اتے عزم کوں سلام پیش کرینداں، کشمیری عوام آج وی آزادی کیتے اُوہو جذبہ رکھیندن جیہڑا 1947 اچ ہئی، لکھاں کشمیری آزادی کیتے آپݨیاں جاناں دے نذرانے پیش کر چکن، آزادی دی آواز اُچی کرݨ آلے ہزاراں کشمیری اڄ وی بھارتی جیلاں اچ قید ہن۔ اُنہاں آکھیا جو بھارتی حکومت یاسین ملک کوں پھاسی ݙیوݨ دی منصوبہ بندی کریندی پئی اے ، ست ہزار توں ودھ کشمیری قیدی بھارتی جیلاں اچ شہید تھی چکن، ہک لکھ توں ودھ ٻال یتیم اتے ہزاراں تریمتاں بیوہ تھی ڳئن، سینکڑاں کشمیری خانداناں دے گھراں کوں مسمار کر ݙتا ڳئے، 9 لکھ توں ودھ بھارتی فوجی جموں و کشمیر اچ تعینات ہن، اُتھاں میڈیا تے مکمل پابندی اے۔ وفاقی وزیر امیرمقام آکھیا جو کشمیر اچ انٹرنیٹ بند کرتے کشمیریاں دی آواز دنیا توں لکائی ویندی پئی اے، حریت قیادت اوکھی حالت دے باوجود مسئلہ کشمیر کوں زندہ رکھیا۔ اُنھاں ایں مظلوماں کوں سلام پیش کیتا جِتھاں انہاں قربانیاں ݙے تے آزادی دی جدوجہد جاری رکھی۔ اُنھاں قید و بند دیاں صعوبتاں برداشت کرݨ آلے کشمیریاں دے حوصلے کوں خراجِ عقیدت پیش کریندے آکھیا جو حریت کانفرنس دے رہنماواں دی موجودگی کشمیریاں دے عزم دی عکاسی اے، پاکستان اتے دنیا اچ کشمیری عوام اڄ وی آزادی دی جنگ لڑدن، حریت قیادت دیاں قربانیاں اساݙے کیتے مشعلِ راہ ہن، بھارتی ظلم دے باوجود کشمیری عوام دے حوصلے بلند ہن، آزادیٔ کشمیر کیتے ہر پاکستانی کشمیری عوام دے نال کھڑے، اڄ دا ݙینھ اساں کوں یاد ݙویندے جو کشمیر دی جدوجہد بدستور جاری اے ۔ انجینئر امیر مقام آکھیا جو بھارت آپݨیاں سازشاں اچ ناکام تھی ڳئے، پاکستان ہمیشہ کشمیریاں دی آواز چاتی اے، پاکستان کل وی، اڄ وی اتے آئندہ وی کشمیریاں دے نال رہسی، اساں کشمیری عوام دی آزادی کیتے آواز چیندے رہسوں، پاکستان ہر فورم تے کشمیری عوام دے حق خودارادیت دی ڳالھ کریندا رہسی، جِتنی دیر اقوامِ متحدہ دیاں قرارداداں تے عمل نی تھیندا، جدوجہد جاری رہسی۔ اُنہاں آکھیا جو بھارت طاقت دے زور تے کشمیریوں کوں دٻا نی سڳدا، اساں کشمیریاں دی سیاسی، سفارتی اتے اخلاقی مدد جاری رکھیسوں، وزیراعظم شہباز شریف ہر عالمی فورم تے کشمیر دا مقدمہ بھرپور انداز اچ پیش کریندن، نائب وزیراعظم و وزیر خارجہ اسحاق ڈار  وی کشمیر کاز دی مؤثر نمائندگی کیتی۔ وفاقی وزیر امیرمقام آکھیا جو پاکستان اقوام متحدہ اتے امتِ مسلمہ اچ کشمیریاں دا مؤقف واضح طور تے چاتے، بھارت دے اڄوکے اقدامات دے بعد دنیا وی ایں حقیقت کوں تسلیم کیتے جو کشمیر کاز اچ ہک نویں روح اتے عزم پیدا تھی ڳئے، افواجِ پاکستان فیلڈ مارشل عاصم منیر دی قیادت اچ بھرپور کردار ادا کیتا۔ اُنہاں آکھیا جو بری، بحری اتے فضائی افواج مادرِ وطن دے دفاع اچ قابلِ فخر خدمات انجام ݙتیاں، افواجِ پاکستان دے کردار توں کشمیری کاز کوں عالمی سطح تے نویں تقویت ملی، دنیا تے واضح تھی ڳئے جو خطے دے امن کیتے مسئلہ کشمیر دا حل لازمی اے، پاکستان کوئی نواں مطالبہ نی کریندا پیا ، صرف اقوامِ متحدہ دیاں قرارداداں تے عمل چاہندے۔ وفاقی وزیر آکھیا جو کشمیر دا حق خودارادیت کوئی احسان نی بلکہ بین الاقوامی وعدہ اے، اقوام متحدہ اتے عالمی برادری تے کشمیر دے حوالے نال قرارداداں تے عملدرآمد دی ذمہ واری لڳدی اے ، بدقسمتی نال بھارت نے نہ صرف قرارداداں دی خلاف ورزی کیتی بلکہ آپݨے آئین توں وی مُکر ڳئے، بھارت آرٹیکل 370 اتے 35A ختم کرتے آپݨی ھی آئینی ضمانت بھن ݙتی۔ انہاں آکھیا جو ایں بھارتی اقدام عالمی قانون، اقوامِ متحدہ دے چارٹر اتے انسانی حقوق دے منافی اے، بھارت کشمیریاں دی شناخت، زمین اتے حق آزادی کھسݨ دی کوشش کریندا پئے ، پاکستان ہر سطح تے بھارتی مظالم کوں بے نقاب کریندا رہسی، اساں کشمیری عوام دے شانہ بشانہ کھڑن، کشمیر دے بغیر جنوبی ایشیا اچ پائیدار امن ممکن کائنی۔ وفاقی وزیر عالمی برادری توں اپیل کیتی جو او اقوام متحدہ دیاں قرارداداں تے عمل یقینی بݨاوے، انڈیا سارے مظالم دے باوجود ہمیشہ ناکام تھئے۔ معرکہ حق دے بعد بھارت دی حقیقت پوری دنیا ݙٹھی اے، فیلڈ مارشل سید عاصم منیر دی قیادت اچ افواجِ پاکستان اساݙا سَر فخر نال اُچا کیتے ، معرکہ حق دی وجہ توں کشمیر دے مسئلے اچ نویں روح آئی۔ وفاقی وزیر آکھیا جو اقوام متحدہ دی ذمہ واری اے جو آپݨیاں قرارداداں تے عملدرآمد کراوے، بھارت کشمیر دے حوالے نال آپݨے ھی قوانین کوں ختم کیتا اتے بھارت توں لوکاں کوں گھن آتے کشمیر اچ وسیندا پئے۔ ساݙا اڄ وی اُوہو ھی نعرہ اے جیہڑا بانی پاکستان دا نعرہ ہئی جو کشمیر پاکستان دی شہ رڳ اے۔ بھارت کنے او جذبہ نی جیہڑھا افواجِ پاکستان دی قیادت اتے پاکستانیاں اچ اے۔ میں آزاد کشمیر اچ مختلف جہیں تے ڳیا اُتھاں دے لوک پاک فوج نال محبت کریندن۔ اُنہاں آکھیا جو بھارت آپݨے غیر قانونی زیرِ تسلط جموں و کشمیر دی ڈیموگرافی بدلݨ دی کوشش کیتی لیکن پاکستان ہمیشہ ایں ڈیموگرافک تبدیلی کوں مسترد کیتے اتے اڄ وی مسترد کریندے، اساں اُنھاں بھارتی کوششاں کوں کݙاھیں تسلیم نہ کریسوں جیڑھے مسئلہ کشمیر دے منصفانہ حل دے بغیر خطے اچ پائیدار امن ممکن کائنی، کشمیریاں دی رائے دے بغیر کوئی حل قابلِ قبول نی۔ اڄ پورے ملک، گلگت بلتستان اتے آزاد کشمیر اچ یوم سیاہ منایا ویندا پئے ۔ امیرمقام آکھیا جو وزارتِ خارجہ دے ذریعے ٻاہرلے ملک پاکستانی مشنز اتے قونصل خانے وی یوم سیاہ منیندے پئن ، پوری دنیا کوں پیغام ݙیتا ویندا پئے جو مسئلہ کشمیر بین الاقوامی نوعیت دا مسئلہ اے، مسئلہ کشمیر دے بغیر خطے اچ پائیدار امن ناممکن اے۔ اساں کوں فخر اے جو کشمیری عزم و حوصلے نال کھڑن۔ انہاں آکھیا جو بھارت اساں کوں کم تر سمجھیا لیکن دنیا حقیقت ݙٹھی اے، بھارت کوں اندازہ ہووے جو امن کیتے مسئلہ حل کرݨا ہوسی۔ امیر مقام افواجِ پاکستان اتے فیلڈ کمانڈز دیاں قربانیاں دی تعریف کریندے آکھیا جو افواجِ پاکستان دی کارکردگی توں کشمیر دے مقدمے کوں تقویت ملی اے۔ اُنھاں فلسطینیاں اتے کشمیریاں دے حوصلیں کوں مثالی اتے پاکستانی عوام اتے افواج دے عزم کوں قوم دا اثاثہ قرار ݙتا۔ انہاں آکھیا جو اساں اقوامِ متحدہ دیاں قرارداداں دے عملی نفاذ تئیں پچھوں نہ ہٹسوں، اساݙا مطالبہ اے جو کشمیر بارے اقوام متحدہ دیاں قرارداداں تے عمل درآمد کیتا ونڄے۔ اُنہاں آکھیا جو کشمیری بھیݨ بھراویں دے حق کوں بحال کیتا ونڄے، اساں حق کیتے لڑدے رہسوں اتے کشمیریوں دا ساتھ ݙیسوں۔ ریلی توں خطاب کریندے ہوئے حریت رہنما فاروق رحمانی حکومتِ پاکستان، وزیراعظم، وزارتِ امور کشمیر اتے وزیر خارجہ دا شکریہ ادا کیتا اتے آکھیا جو حکومتِ پاکستان یومِ سیاہ بھرپور انداز اچ منائے۔ فاروق رحمانی آکھیا جو ملک دے مختلف شہراں اتے قصبیں اچ وی یومِ سیاہ دیاں تقریبات جاری ہن، فاروق رحمانی انجینئر امیر مقام اتے وزارتِ کشمیر و گلگت بلتستان دیاں کاوشاں دی تعریف کیتی آکھیا جو وزارتِ خارجہ اتے وزیراعظم سیکرٹریٹ ایں حوالے نال نہایت اہم کردار ادا کیتا۔ اُنہاں آکھیا جو افواجِ پاکستان دے سربراہ فیلڈ مارشل سید عاصم منیر دیاں ہدایت قابلِ تحسین قرار ݙیو، پاکستان کشمیر دے حق خودارادیت کیتے سنجیدہ اے، پاکستان دی حکومت اتے ادارے کشمیری عوام دی جدوجہد دے نال کھڑن۔ فاروق رحمانی تقریب اچ شریک طالبعلماں دا شکریہ ادا کیتا اتے سویٹ ہوم دے ٻالاں اتے زمرد خان دی شرکت دی تعریف کیتی ۔ سویٹ ہومز دے چیئرمین زمرد خان سارے شرکا دا شکریہ ادا کریندے ہوئیں آکھیا جو کشمیری ٻالاں دی قربانی اساں نی بھُل سڳدے ، اڄ سویٹ ہوم دے ٻال پُڄ تے ایں پیغام ݙیندن جو اساں کشمیر دے نال ہیسے، کشمیر اتے پاکستان دا پرچم ہمیشہ اُچا رہسی۔ اُنہاں آکھیا جو اڄ سارے کشمیری ݙیکھدے پئن اساں کِیویں اُنھاں دے نال کھڑوں ، آزادی دا جذبہ کݙاھیں دفن نی تھیوݨا چاہیدا۔ ریلی توں ٻئے مقررین وی خطاب کیتا