وزیراعلیٰ پنجاب دے چھل بحالی پروگرام دے تحت 95 فیصد سروے مکمل تھی ڳئے، عظمیٰ بخاری

لاہور۔27اکتوبر (اے پی پی) وزیر اطلاعات و ثقافت پنجاب عظمیٰ بخاری آکھیے جو وزیراعلیٰ پنجاب دے چھل بحالی پروگرام دے تحت 95 فیصد سروے مکمل تھی ڳئے اتے مریم نواز سروے مکمل تھیوݨ دا انتظار کیتے بغیر متاثرین وچ امداد دی تقسیم شروع کر ݙتی اے۔ اُنہاں آکھیا جو چھل توں متاثرہ خانداناں دی بحالی حکومت پنجاب دی پہلی ترجیح اے، اتے ایں مقصد کیتے ہݨ تئیں ݙڈھ ارب روپے دی مالی امداد متاثرہ فیملیز وچ تقسیم کیتی ڳئی اے ، جݙاں جو 50 ہزار توں ودھ چھل بحالی کارڈز متاثرین تئیں پُڄا ݙتے ڳئن۔ عظمیٰ بخاری ٻیا ݙسایا جو 28 اکتوبر توں ٻئے اضلاع اچ کیمپ سائٹس فعال کیتیاں ونڄݨیاں ہن تاں جو امداد دی بروقت اتے شفاف تقسیم کوں یقینی بݨایا ونڄ سڳے۔ اے ڳالھ انہاں ننکانہ صاحب اچ چھل متاثرین وچ امدادی چیکس تقسیم کرݨ دی تقریب توں خطاب اچ اکھی۔ انہاں آکھیے وزیراعلیٰ پنجاب مریم نواز صوبے دی تاریخ دے ساریں توں وݙی چھل کوں ھک چیلنج دے طور تے قبول کیتا اتے خود بحالی آپریشن دی نگرانی کیتی۔ دریاواں اچ کٹھے آوݨ آلے سیلاب دے دوران لکھاں لوک اتے 21 لکھ توں ودھ مویشیاں کوں وقتی ریسکیو کیتا ڳیا، جݙاں جو انتظامیہ فیلڈ اچ متحرک رہی۔ عظمیٰ بخاری آکھیا جو وزیراعلیٰ پنجاب دی ہدایت تے متاثرہ خانداناں دی امداد اتے بحالی کیتے چھل بحالی پروگرام تکھے جاری اے ۔ متاثرہ خانداناں کوں پنجاہ ہزار بحالی کارڈز ݙتے ڳئن جِنہاں دے ذریعے اُو بینک آف پنجاب توں مالی امداد گھندے پئن ۔وزیراعلیٰ پنجاب متاثرین کیتے امدادی رقم اچ ودھارا کرݙتے اتے جِنہاں دے گھر متاثر تھئن اُنھاں کوں پنج لکھ روپے تئیں دی مالی امداد ݙتی ویندی پئی اے۔ ایں پروگرام پاکستان دی تاریخ دا ساریں توں شفاف اتے تکھا بحالی پروگرام اے۔ حکومت پنجاب دا مقصد ہک ہک متاثرہ خاندان تئیں امداد پُڄاوݨ اتے انہاں کوں آباد کرݨ اے۔