وزیراعلیٰ پنجاب دی صدارت اجلاس، ملکی تاریخ اچ پہلی واری پنجاب دے 65 ہزار امام مسیتاں کیتے وظیفہ مقرر کرݨ دا فیصلہ

لاہور۔27اکتوبر (اے پی پی) وزیراعلیٰ پنجاب مریم نواز ملکی تاریخ اچ پہلی واری پنجاب دی 65 ہزار مسیتاں دے امام کیتے وظیفہ مقرر کرݨ دا فیصلہ کیتے۔ وزیراعلیٰ مریم نواز دی زیر صدارت امن و امان تے مسلسل پنجواں اجلاس منعقد تھیا۔ اجلاس اچ وزیراعلیٰ آکھیا جو امام مسجد معاشرے دا قابلِ احترام فرد اے۔ محلے اچ چندہ کٹھا کر تے امام مسجد کوں ادائیگی نامناسب امر اے۔ حکومت پنجاب ضرورتاں کیتے امام مسجد دی معاشی معاونت کریسی۔ اجلاس اچ ݙسایا ڳیا جو مساجد دیاں تعمیر و مرمت دے پراجیکٹس سالانہ ترقیاتی پروگرام اچ شامل ہن۔ اُنہاں مساجد دیاں تعمیر و مرمت دے پراجیکٹ دی وقتی تکمیل کیتے اقدامات دی ہدایت کیتی۔ وزیراعلیٰ دی ہدایت تے اجتماع کیتے رائے ونڈ دیاں رابطہ سڑکاں دی تعمیر و مرمت مکمل کرݙتی ڳئی اے۔ رائے ونڈ دیاں سڑکاں تے مرمت کر تے کھݙے وی پُر کر ݙتے ڳئن۔ رائے ونڈ تبلیغی اجتماع کیتے خصوصی بساں وی ٹوریاں ویسن۔ وزیراعلیٰ دی ہدایت تے رائے ونڈ اجتماع کیتے سیکورٹی دے فول پروف انتظامات کیتے گئن۔ وزیراعلیٰ ڈپٹی کمشنر اتے اسسٹنٹ کمشنر ز کوں آئمہ کرام دے کول خود ونڄݨ دی ہدایت کیتی۔ ایں موقع تے پنجاب اچ سائبر کرائم سیل تشکیل ݙیوݨ دا اصولی فیصلہ کیتا ڳئے۔ وزیراعلیٰ لاوڈ سپیکر دے غیر قانونی استعمال تے کارروائی یقینی بݨاوݨ دی ہدایت کیتی۔ بریفنگ اچ ݙسایا ڳیا جو پنجاب بھر دیاں ساریاں مسیتاں اچ نماز جمعہ اتے ٻئیاں نمازاں باجماعت ادا کیتیاں ویندیاں پئن ۔ مسجد اللہ تعالیٰ دا گھر اے، مسجد دا تقدس برقرار رکھݨ ہر مسلمان تے فرض اے۔