اُڑان پاکستان وژن معیشت کوں علم اتے جدت دی بنیاد تے اڳو تے ودھیسی، احسن اقبال

اسلام آباد۔ 27 اکتوبر(اے پی پی)وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال آکھیے جو اُڑان پاکستان وژن معیشت کوں علم اتے جدت دی بنیاد تے اڳو تے ودھیسی۔ نیشنل سینٹر آف فزکس اسلام آباد اچ بین الاقوامی سمپوزیم برائے ایڈوانسڈ میٹریلز نال الیندے انہاں آکھیا جو پاکستان کوں ترقی یافتہ قوماں اچ کھڑا کرݨ کیتے معیشت کوں علم، تحقیق اتے جدت دی بنیاد تے اچا کرݨ ضروری اے، اسلام جدید علم حاصل کرݨ اتے ایندے ودھارے دا آہدے، ساکوں آپݨی نوجوان نسل کوں جدید سائنسی علوم اتے ٹیکنالوجی نال لیس کرݨا ہوسی تاں جو ملک کوں عالمی مقابلے اچ اڳوانہا مقام ݙیوایا ونڄے۔ احسن اقبال آکھیا جو دنیا دی 70 فیصد تجارت میٹریل تے مبنی مصنوعات آلی اے، جیندے کیتے میٹریل سائنس کوں نویں عالمی معیشت دی ریڑھ دی ہڈی آکھیا ویندے، اُڑان پاکستان وژن دے تحت حکومت 2035 تئیں پنڄ قومی ریسرچ اینڈ ڈویلپمنٹ کلسٹرز ٻݨاوݨ دا ہدف رکھیے تاں جو پاکستان کوں میٹریل انوویشن اتے ٹیکنالوجی اچ خودکفیل بݨایا ونڄے۔ انہاں آکھیا جو ایں مدت اچ 100 یونیورسٹی-انڈسٹری شراکت داریاں ٻݨایاں ویسن اتے 5 ہزار خصوصی تربیت یافتہ سائنسدان اتے انجینیئر ٻݨائے ویسن۔ احسن اقبال آکھیا جو حکومت دا مقصد پاکستان کوں میٹریل انوویشن دے میدان اچ دنیا دیاں ٹاپ 30 قوماں اچ شامل کرݨے۔ اُنھاں آکھیا جو جدید ٹیکنالوجی، علم اتے تخلیق دی صلاحیتاں تے مبنی ترقی ھی پاکستان دے روشن مستقبل دی ضمانت اے۔