پاکستان سودھا  پورے ڄڳ اچ یوم سیاہ کشمیر منایا ڳیا

اسلام آباد۔ 27 اکتوبر(اے پی پی)پاکستان اتے دنیا بھر اچ پاکستانی سفارتخانیاں اچ جموں و کشمیر اتے بھارت دے 78 سالہ غیر قانونی قبضے دی مذمت اتے کشمیری عوام دی منصفانہ جدوجہد دی حمایت دے حوالے نال پاکستان دے عزم دی تجدید کیتے یوم سیاہ کشمیر منایا ڳیا۔ ترجمان دفتر خارجہ ولوں جاری بیان دے مطابق پورے ملک اتے بیرون ملک پاکستانی مشنز اچ سیمینارز، ویبینارز، پینل ڈسکشن اتے تصویری نمائشاں سودھا مختلف تقریبات تھئن۔ انہاں سرگرمیاں اچ معصوم کشمیریاں دی حالت زار ݙسیندے ہوئے دنیا دی توجہ بھارتی قابض افواج دے مظالم اتے بربریت دو ݙیوائی ڳئی اے۔ ایں موقع تے آپݨے خصوصی پیغامات اچ صدر، وزیراعظم اتے نائب وزیراعظم و وزیر خارجہ کشمیری عوام دی منصفانہ جدوجہد دی اخلاقی، سفارتی اتے سیاسی حمایت جاری رکھݨ دے پاکستان دے عزم دا اعادہ کیتا۔ انہاں بین الاقوامی برادری تے زور ݙتیا جو او بھارت تے جموں و کشمیر تے آپݨا غیر قانونی قبضہ ختم کرݨ، انسانی حقوق دی سنگین خلاف ورزیاں کوں روکݨ اتے کشمیری آبادی دے خلاف سارے جابرانہ اقدامات بند کرݨ کیتے آپݨا بھرپور کردار ادا کرے۔ نائب وزیراعظم و وزیر خارجہ اقوام متحدہ جنرل اسمبلی دے صدر، اقوام متحدہ سلامتی کونسل دے صدر، اقوام متحدہ دے سیکرٹری جنرل، اقوام متحدہ دے ہائی کمشنر برائے انسانی حقوق اتے اسلامی تعاون تنظیم دے سیکرٹری جنرل دے ناں خطوط ارسال کیتن، جیندے اچ انہاں بھارت دے غیر قانونی زیرِ تسلط جموں و کشمیر اچ انسانی حقوق دی سنگین صورتحال دا ݙسائے۔ نائب وزیراعظم و وزیر خارجہ آکھیے جو بھارت پچھلے ست ݙھاکیاں توں ودھ عرصے توں بین الاقوامی قانون اتے سلامتی کونسل دیاں متعلقہ قرارداداں دی کھلی خلاف ورزی کریندے ہوئے کشمیری عوام دے بنیادی انسانی حقاں توں مسلسل انکار کریندا آندے۔ انہاںچ تاوݨی ݙتی جو بھارت دیاں انہاں ذمہ داریاں دے تسلسل توں انکار اتے اوندی قیادت دے متشدد اتے غیر ذمہ دارانہ بیانات نال، خطے اچ کشیدگی ودھدی پئی اے اتے علاقائی امن و استحکام دا تے لڳی ہوئی اے۔ وزارت خارجہ ولوں ہک خصوصی واک برائے کشمیر وی کیتی قئی جیندے اچ وزارت دے افسران اتے ملازماں شرکت کیتی۔ وزارت خارجہ اسلام آباد اچ سفارتی برادری دے اراکین کیتے ہک خصوصی بریفنگ وی ݙتی۔ سفارت کاراں کیتے بھارت دے زیر قبضہ جموں و کشمیر اچ بھارتی مظالم دی عکاسی کرݨ والی ہک مختصر دستاویزی فلم وی ݙکھائی گئی۔ 27 اکتوبر یوم سیاہ دے طور تے مناوݨ جموں و کشمیر تے بھارت دے غیر قانونی حملے دی ہک تلخ یاد دہانی کرویندے۔ اے انہاں کشمیری عوام دے عزم و استقلال کوں خراج تحسین پیش کرݨ دا ݙینھ وی اے جیڑھے ݙھاکیاں دی جبری پالیسی دے باوجود حق خودارادیت دی آپݨی جدوجہد اچ ثابت قدم ہین۔