وفاقی وزیرِ داخلہ محسن نقوی دا گوجرانوالہ اچ نادرا سنٹر دا اچانک دورہ، شہریاں دے مسئلے جلدی حل کرݨ دا حکم

گوجرانوالہ ۔ 28 اکتوبر (اے پی پی) وفاقی وزیرِ داخلہ محسن نقوی گوجرانوالہ دے نادرا سنٹر دا اچانک دورہ کیتا، جتھ انہاں شناختی کارڈز اَتے بئے کاغذ پتّر بݨواوݨ دے کَم دا جائزہ گھِدا۔ وزیرِ داخلہ محسن نقوی سنٹر اچ موجود شہریاں نال ملاقات کیتی اَتے انہاں دی مشکلاں سݨیاں۔ شہریاں نادرا سنٹر دی کارکردگی تے اطمینان دا اظہار کریندیں ہوئیں آکھیا جو انہاں کوں ودھ انتظار نئی کرݨا پوندا اَتے عملہ تعاون کریندے۔ دورے اچ کجھ کاؤنٹرز تے رش ݙیکھ تے وزیرِ داخلہ عملے کوں ہدایت کیتی جو شہریاں دے کَم کوں جلدی نال نبیڑیا ون٘ڄے تانجو کہیں کوں دیر نہ تھیوے۔ محسن نقوی مختلف کاؤنٹرز تے ڳئے، عملے نال رِل تے انہاں کوں محنت، ذمہ داری اَتے خوش اسلوبی نال فرض سرانجام ݙیوݨ دی نصیحت کیتی۔ انہاں موقعے تے ای انچارج نادرا سنٹر کوں شہریاں دے مسئلیاں دے فوری حل دے حکم جاری کیتے۔ وفاقی وزیرِ داخلہ محسن نقوی آکھیا جو میکوں خوشی اے جو شہری نادرا سنٹر دی کارکردگی توں مطمئن ہن، رش دے باوجود عملے دا کَم اچ مصروف رہݨ تعریف دے قابل اے۔ محسن نقوی زور ݙتا جونادرا سنٹر آوݨ آلا ہر شہری وی آئی پی اے، اوںدا کَم ہکے ݙینہہ کیتا ون٘ڄے اَتے مقررہ مدت اچ دستاویزات ݙتی ون٘ڄن۔ شہریاں وزیرِ داخلہ دے موقعے تے حکم جاری کرݨ تے شکریہ ادا کیتا اَتے آکھیا جو نادرا سنٹر اچ مجموعی طور تے خدمتاں دا معیار اطمینان بخش اے۔