پاکستان توں پولیو دا خاتمہ حکومتِ پاکستان دی پہلی ترجیح اے، وفاقی وزیر قومی صحت

اسلام آباد۔ 28 اکتوبر (اے پی پی) وفاقی وزیر قومی صحت سید مصطفیٰ کمال آکھیا جو پاکستان توں پولیو دا خاتمہ حکومتِ پاکستان دی پہلی ترجیح اے۔ وزیرِاعظم دی قیادت اچ پاکستان توں پولیو کوں پورَے طور تے مُکاوِ دا پکا عزم کیتا گئے۔ وزارت قومی صحت دے جاری کر دہ بیان موجب اے ڳالھیں انہاں چیئرمین پولیو اوور سائیٹ بورڈ ڈاکٹر کرس ایلس اَتے ڈبلیو ایچ او دے ریجنل ڈائریکٹر ڈاکٹر حنان بلخی نال ملاقات اچ کیتی۔ انہاں پولیو دے خاتمے کیتے کیتے وَنجݨ آلے اقدامات تے گالھ مہاڑ کیتی۔ سارَے ملک اچ پولیو مخالف مہمات دی کامیابی کیتے ہِک مربوط اَتے اثر دار حکمت عملی بݨائی گئی اے۔ وفاقی وزیر آکھیا جو سارَے ملک اچ چنڳی معیار دی پولیو مخالف مہمات دا انعقاد کیتا ویندا پئے۔ جنوبی خیبرپختونخوا، وچلا پاکستان اَتے کراچی سودھے ہائی رسک ضلعیاں تے خاص توجہ ݙتی ویندی پئی اے۔ انہاں آکھیا جو مذہبی اَتے سماجی رہنماواں دی مدد نال انکاری کیسز ڳھٹ تھیندے پئن۔ پولیو پروگرام اَتے حفاظتی ٹیکہ جات دے پروگرام اچ ہم آہنگی کوں ٻیا ودھایا ویندا پئے۔ حکومت پاکستان حفاظتی ٹیکہ جات دی کوریج کوں مضبوط بݨاوݨ کیتے مؤثر اقدامات کریندی پئی اے۔ ایں موقع تے چیئرمین پولیو اوور سائیٹ بورڈ، ڈاکٹر کرس ایلس، پولیو دے خلاف پاکستان دے اقدامات دی تعریف کریندیں ہوئیں آکھیا جو پاکستان توں پولیو دے پورَے خاتمے کیتے ہر سطح تے پورا تعاون جاری رکھیسی۔