جمہوریت دی بقا کارکردگی، نمائندگی اَتے شفافیت نال مشروط اے، عوام دی خدمت اَتے اعتماد دی بحالی دے بغیر جمہوری نظام تکڑا نی تھی سڳدا، احسن اقبال

اسلام آباد۔ 28 اکتوبر(اے پی پی) وفاقی وزیر منصوبہ بندی، ترقی اَتے خصوصی اقدامات پروفیسر احسن اقبال آکھیے جو جمہوریت دی بقا کارکردگی، نمائندگی اَتے شفافیت نال مشروط اے، عوام دی خدمت اَتے اعتماد دی بحالی دے بغیر جمہوری نظام مضبوط نی تھی سڳدا۔ او قومی کانفرنس بعنوان ’’سوشل ڈیموکریسی: مقامی اَتے عالمی جہت‘‘ توں خطاب کریندے پئے ہن۔ انہاں آکھیا جو اڑان پاکستان وژن ملک کوں معاشی طور تے مضبوط، جدید اَتے پائیدار ترقی دے رستے تے ٹورݨ دا منصوبہ اے۔ وفاقی وزیر آکھیا جو مقامی حکومتاں کوں بااختیار بݨائے بغیر جمہوریت مستحکم نی تھی سڳدی، اختیارات دی تلویں سطح تئیں منتقلی دے بغیر عوامی شمولیت ممکن کائنی۔ انہاں آکھیا جو تِریمتاں اَتے نوجواناں کوں ترقی دے برابر دے موقع ݙیوݨ حکومت دی پہلی ترجیح اے، کیوں جو ایہے طبقے ملک دے مستقبل دی قیادت کریسن۔ پروفیسر احسن اقبال ایں ڳالھ تے زور ݙتا جو شفاف احتساب دا نظام جمہوریت دا مستقل اَتے لازمی جُز اے۔ انہاں آکھیا جو احتساب سیاسی انتقام نئیں بلکہ ادارہ جاتی شفافیت اَتے اعتماد دی بنیاد ہووݨا چاھیدے۔ وزیر منصوبہ بندی آکھیا جو ڈیجیٹلائزیشن دے ذریعے گورننس وچ شفافیت اَتے کارکردگی کوں چنڳاں بݨایا ویندا پئے۔ انہاں پہلی ڈیجیٹل مردم شماری کوں ’’ای-پاکستان‘‘ دے سنگ میل منصوبے دے طور تے قرار ݙتا جیڑھا جو شفاف پالیسی سازی کیتے بنیادی حیثیت رکھیندے۔ احسن اقبال آکھیا جو جمہوری نظام کوں اَکوِیویں صدی دی تکھی رفتار دی سماجی اَتے ٹیکنالوجیکل تبدیلیاں نال ہم آہنگ کرݨ ویلھے دی لوڑھ اے۔ انہاں آکھیا جو 20ویں صدی دا جمہوری ماڈل دنیا دے مختلف حصیں وچ فیل تھیندا پئے، ایں کیتے جمہوریت کوں نویں چیلنجز موجب جدید خطوط تے بݨاوݨ ٻہوں ضروری اے۔ انہاں آکھیا جو عوام پہلے توں زیادہ باخبر اَتے بااختیار تھی چُکِن، ایں کیتے ہݨ پالیسیاں اَتے اداریں وچ عوامی شمولیت اَتے اصلاحات ضروری ہِن۔ وفاقی وزیر پروفیسر احسن اقبال آکھیا جو جرمنی نال مضبوط شراکت داری پاکستان دی قومی پالیسی دا حصہ اے اَتے ݙوہائیں ملک سماجی جمہوریت، اقتصادی تعاون اَتے پائیدار ترقی کیتے آپت دے تعلقات کوں مزید ودھیندے پئن