پاکستان اَتے سعودی عرب اقتصادی تعاون فریم ورک دے تحت توانائی، صنعت، کان کنی، آئی ٹی، سیاحت، زراعت اَتے غذائی تحفظ سودھے ترجیحی شعبیں وچ تعاون ودھیسن، وزیراعظم شہباز شریف، ولی عہد محمد بن سلمان دی ملاقات دا مشترکہ اعلامیہ

ریاض۔ 28 اکتوبر(اے پی پی) پاکستان اَتے سعودی عرب اقتصادی تعاون دا ہِک فریم ورک شروع کرݨ تے متفق تھی ڳئِن جیں دے تحت اقتصادی، تجارتی، سرمایہ کاری اَتے ترقیاتی شعبیں وچ کئی سٹریٹجک اَتے اُچے اثرات دے حامل منصوبیں تے ڳالھ مہاڑ کریندے توانائی، صنعت، کان کنی، انفارمیشن ٹیکنالوجی، سیاحت، زراعت اَتے غذائی تحفظ سودھے ترجیحی شعبیں وچ تعاون ودھایا ویسی۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف اَتے سعودی ولی عہد / وزیراعظم شہزادہ محمد بن سلمان بن عبدالعزیز آل سعود وچال ملاقات دے بعد جاری مشترکہ اعلامیہ وچ ݙسایا ڳیا جو اقتصادی تعاون دا فریم ورک شروع کرݨ تے سعودی عرب اَتے اسلامی جمہوریہ پاکستان وچال 27 اکتوبر 2025ء کوں ریاض وچ تھیوݨ آلی ملاقات دے دوران اتفاق تھیا۔ اے پیشرفت سعودی عرب اَتے اسلامی جمہوریہ پاکستان وچال تقریباً اَٹھ ݙھاکیں تے محیط تاریخی شراکت دی مضبوطی اَتے ݙوہائیں ملکاں دی قیادت کوں ہِک کرݨ آلے بھرپی اَتے اسلامی یکجہتی دے تکڑے رشتے کوں ظاہر کریندی اے ۔ بیان وچ آکھیا ڳئے جو اے فریم ورک ݙوہائیں ملکاں دے سانجھے اقتصادی مفادات تے مبنی اَتے انہاں دی تکمیل کیتے تجارت اَتے سرمایہ کاری دے تعلقات کوں تکڑا بݨاوݨ کیتے ݙوہائیں ملکاں دی آپت دی خواہش دا اعادہ اے۔ فریم ورک دے تحت اقتصادی، تجارتی، سرمایہ کاری اَتے ترقیاتی شعبیں وچ کئی سٹریٹجک اَتے اُچے اثرات دے حامل منصوبیں تے ڳالھ مہاڑ کیتی ویسی جیڑھے جو ݙوہائیں ملکاں وچال تعاون کوں تکڑا بݨاوݨ، نجی شعبے دے اہم کردار کوں ودھاوݨ اَتے تجارتی تبادلے کوں ودھاوݨ وچ مددگار ثابت تھیسن۔ فریم ورک دے ترجیحی شعبیں وچ توانائی، صنعت، کان کنی، انفارمیشن ٹیکنالوجی، سیاحت، زراعت اَتے غذائی تحفظ شامل ہِن۔ اعلامیہ موجب پاکستان اَتے سعودی عرب ایں ویلھے کئی مشترکہ اقتصادی منصوبیں دے حوالے نال تعاون تے کم کریندے پئِن جنہاں وچ سعودی عرب اَتے پاکستان وچال بجلی دی ترسیل (الیکٹریسٹی انٹر کنکشن) دے منصوبے کیتے مفاہمتی یادداشت اَتے ݙوہائیں ملکاں وچال توانائی دے شعبے وچ تعاون دی مفاہمتی یادداشت تے دستخط وی شامل ہِن۔ بیان وچ آکھیا ڳئے جو اے فریم ورک آپت دے برادرانہ تعلقات کوں تکڑا بݨاوݨ کیتے ݙوہائیں ملکاں دے اقدامات دی عکاسی اَتے اقتصادی، تجارتی اَتے سرمایہ کاری دے شعبیں وچ پائیدار شراکت داری دی تعمیر کیتے سانجھے وژن دی توثیق کریندے۔ فریم ورک ݙوہائیں ملکاں دی قیادت اَتے بھرا عوام دیاں اُمیداں دی ترجمانی اَتے آپت دے مفادات دے حصول دی تکمیل دی خواہش کوں ظاہر کریندے ۔ اعلامیہ وچ آکھیا ڳئے جو ݙوہائیں ملکاں دے رہنما سعودی پاکستانی سپریم کوآرڈینیشن کونسل دے اجلاس دے انعقاد دے وی منتظر ہِن