وفاقی وزیراورنگزیب خان کھچی دا سابق ڈائریکٹر پرفارمنگ آرٹس سید عارف جعفری دے انتقال تے ݙکھ تے افسوس

اسلام آباد۔ 28 اکتوبر(اے پی پی) وفاقی وزیر قومی ورثہ و ثقافت اورنگزیب خان کھچی سابق ڈائریکٹر پرفارمنگ آرٹس نیشنل آرٹ کونسل سید عارف جعفری دے انتقال تے ݙکھ اَتے افسوس کیتے۔آپݨے تعزیتی بیان وچ وفاقی وزیر آکھیا جو سید عارف جعفری پاکستان وچ موسیقی دے ودھارےکیتے چنڳی خدمات انجام ݙتن، انہاں دا شمار ملک دے معروف بانسری نوازاں وچ تھیندا ہئی، مرحوم موسیقی دی اُچی تعلیم ٻاہرلے ملک توں حاصل کیتی اَتے آپݨی فنی مہارت دے ذریعے نوجوان نسل کوں متاثر کیتا۔ اورنگزیب خان کھچی آکھیا جو مرحوم دیاں فنی خدمات ہمیشہ یاد رکھیاں ویسن۔ وزارتِ قومی ورثہ و ثقافت سید عارف جعفری دیاں خدمات کوں خراجِ عقیدت پیش کریندی اے۔ انہاں آکھیا جو سید عارف جعفری دا انتقال فنونِ لطیفہ دے شعبے کیتے وݙا ضیان اے۔ مرحوم سید عارف جعفری معروف مصنف وی ہن اَتے انہاں دی تصنیف “ایشیَن میوزک” موسیقی دے طالبِ علماں اَتے ماہرین کیتے قیمتی اثاثہ سمجھی ویندی اے۔