وفاقی وزیرجام کمال خان دی صدارت اچ پاکستان اَتے ملائیشیا وچال گوشت دے شعبے وچ تعاون بارے اجلاس

اسلام آباد۔ 28 اکتوبر (اے پی پی) وفاقی وزیر تجارت جام کمال خان دی صدارت اچ پاکستان اَتے ملائیشیا وچال گوشت دے شعبے وچ تعاون ودھاوݨ دے حوالے نال اجلاس وزارتِ تجارت وچ تھیا۔ اجلاس وچ پاکستان دی ملائیشیا کوں گوشت دی برآمدات ودھاوݨ اَتے ایں شعبے کیتے جامع پالیسی فریم ورک تیار کرݨ تے پیشرفت دا جائزہ ڳھدا ڳیا۔ اجلاس وچ وفاقی وزیر نیشنل فوڈ سکیورٹی اینڈ ریسرچ رانا تنویر حسین، وزیراعظم دے معاون خصوصی صنعت ہارون اختر خان، متعلقہ وزارتاں دے سینئر حکام اَتے نجی شعبے دے نمائندیں شرکت کیتی۔ وفاقی وزیر تجارت جام کمال خان آکھیا جو حکومت پاکستان دے گوشت دی برآمدات دی بنیاد کوں تکڑا بݨاوݨ اَتے بین الاقوامی منڈیاں خاص کر ملائیشیا تئیں زیادہ رسائی کوں یقینی بݨاوݨ کیتے پرعزم اے۔ انہاں آکھیا جو وزیراعظم کمیٹی کوں ایں حوالے نال جامع پالیسی تیار کرݨ دا کم ݙتے جیڑھی جو گھٹ ویلھے دے برآمدی چیلنجز اَتے لمبے ویلھے دی سیکٹرل اصلاحات ݙوہائیں کوں حل کرݨ کیتے بݨائی ڳئی اے۔ جام کمال آکھیا جو پالیسی وچ جانوراں وچ بیماریاں تے قابو پاوݨ، حلال سرٹیفیکیشن،صوبائی حکومتاں اَتے نجی شعبے نال رَل تے انفراسٹرکچر دی بہتری تے توجہ ݙتی ویسی۔اجلاس توں خطاب کریندے وزیراعظم دے معاون خصوصی ہارون اختر آکھیا جو ملائیشیا کوں گوشت دی برآمدات کیتے پاکستان دی موجودہ صلاحیت تقریباً 200 ملین امریکی ڈالر اے، لیکن ایں ہدف کوں حاصل کرݨ کیتے جانوراں وچ پیر اَتے مُنہ دی بیماری (ایف ایم ڈی) اَتے ہَݙّی وچ گوشت دی برآمدات تے پابندی جیھاں رکاوٹاں کوں مُکاوݨ کیتے وقتی کارروائی دی لوڑھ اے۔ انہاں وضاحت کیتی جو پاکستان دی مسابقت متاثر تھیندی اے کیوں جو ہندستانی برآمد کنندگان جانوراں دے ہَݙّیاں وچ بھرئے گوشت کوں استعمال کر سڳدن جݙاں جو پاکستان کوں ایف ایم ڈی دی پابندیاں پاروں بغیر ہَݙّی آلا گوشت برآمد کرݨا پوندے۔وفاقی وزیررانا تنویر حسین جانوراں وچ بیماریاں تے قابو پاوݨ اَتے لائیو سٹاک دے معیار کوں چنڳا بݨاوݨ کیتے وزارت نیشنل فوڈ سکیورٹی اینڈ ریسرچ ولُوں پورے تعاون دا یقین ݙیوائے۔ انہاں اجلاس کوں ݙسایا جو پنجاب وچ ایف ایم ڈی کنٹرول اَتے فیڈ لاٹ فیٹننگ کیتے پہلے ای اہم اقدامات چاتے ڳئن اَتے ایں طرح دے اقدامات کوں ݙوجھے صوبیں تئیں وی ودھایا ویسی۔مؤثر کوآرڈینیشن اَتے فالو اپ کوں یقینی بݨاوݨ کیتے چار کمیٹیاں بݨائیاں ڳئن جنہاں وچ بیماریاں تے قابو پاوݨ، نسل دی بہتری، فیڈلوٹ فربہ کرݨ اَتے حکومتی سہولت کاری دے اقدامات سودھے اہم شعبیں کوں حل کیتا ڳئے۔ کمیٹی حلال سرٹیفیکیشن اَتے بین الاقوامی معیار موجب تھیوݨ کوں یقینی بݨاوݨ کیتے سائنس اَتے ٹیکنالوجی دی وزارت دی شمولیت تے وی ڳالھ مہاڑ کیتی۔ گوشت دی برآمدات کیتے کراچی دی بندرگاہ دیاں سہولتاں دی اہمیت کوں ݙیکھدے سندھ حکومت وی ایں سلسلے وچ کم کریسی۔ جام کمال خان ساریاں متعلقہ وزارتاں اَتے سٹیک ہولڈرز کوں مقررہ ٹائم لائنز دے اندر آپݨے آپݨے ان پٹ کوں حتمی شکل ݙیوݨ دی ہدایت کریندے اجلاس دا اختتام کیتا۔ انہاں تحقیق تے مبنی منصوبہ بندی، پبلک پرائیویٹ تعاون اَتے تعمیل دے چنڳے معیاراں دے ذریعے برآمدات کوں ودھاوݨ دے حکومتی عزم دا اعادہ کیتا۔