صدر مملکت آصف علی زرداری دی ترکیہ دے یوم جمہوریہ دے موقع تے ترک حکومت اَتے عوام کوں مبارخ

اسلام آباد۔ 28 اکتوبر(اے پی پی) صدر مملکت آصف علی زرداری ترکیہ دے 102ویں یوم جمہوریہ دے خوشی دے موقع تے ترک حکومت اَتے بھرا عوام کوں مبارخ ݙیندے آکھیے جو اے ݙینھ عالمی تاریخ دے ہِک اہم لمحے دی نشاندہی کریندے جݙاں مصطفٰی کمال اتاترک دی بصیرت انگیز قیادت دی رہنمائی وچ مضبوط ترک قوم اصلاح، ترقی اَتے تجدید دی راہ تے ٹُری۔ ایوان صدر دے پریس ونگ توں جاری بیان موجب صدرمملکت اے ڳالھ ترکیہ دے یوم جمہوریہ دے موقع تے آپݨے سنھیے اچ آکھی ۔ انہاں آکھیا جو ترکیہ دے لوکاں جیں حوصلے اَتے عزم نال آپݨی تقدیر بݨائی اے او دنیا دیاں نسلاں کوں متاثر کریندا رہ ویسی، علامہ اقبال اَتے قائداعظم ترک جمہوریہ دے قیام وچ ترکیہ دے عوام دی بہادر قیادت اَتے انقلابی اصلاحات دی تعریف کیتی جنہاں ترکیہ کوں اقوام عالم وچ قابلِ رشک قوم بݨا ݙتا۔ صدر مملکت آصف علی زرداری آکھیا جو پاکستانی عوام دے دل وچ ترکیہ ہِک خاص مقام رکھیندے، ݙوہائیں قوماں وچال گھاٹے رشتے سانجھی تاریخ، عقیدے اَتے آپت دے احترام نال جُڑئے ہوئن۔ انہاں آکھیا جو ݙوہیں قوماں ہر اوکھے ویلھے ھک ݙوجھے نال غیر متزلزل اَتے تکڑی چٹان وانڳوں کھڑیاں رہیِن، زندگی دے سارَے شعبیں وچ ترکیہ نال ادارہ جاتی تعلق مضبوط اَتے متحرک اے۔ صدر مملکت اُمید ظاہر کیتی جو جیویں جیویں اساں اڳوں وَدھسوں اے تکھے ترقی کریسی۔ انہاں فخر اَتے جشن دے ایں ݙینھ دے موقع تے ترکیہ نال پاکستان دی مستقل یکجہتی دا اعادہ کریندے ایں یقین دا اظہار کیتا جو اساݙی دوستی آندے سالاں وچ مزید تکڑی تھیندی رہ ویسی۔ صدر مملکت دعا کیتی جو اللہ تعالیٰ جمہوریہ ترکیہ کوں دیرتئیں امن، ترقی اَتے خوشحالی نال نوازے۔