سید یوسف رضا گیلانی دی بین الاقوامی پارلیمانی کانفرنس دے موقع تے آذربائیجان دی سپیکر نال ملاقات

باکو/اسلام آباد۔ 28 اکتوبر(اے پی پی) چیئرمین سینیٹ سید یوسف رضا گیلانی آذربائیجان دے آئین دی منظوری دی 30ویں سالگنڈھ دے موقع تے منعقدہ بین الاقوامی پارلیمانی کانفرنس دے موقع تے آذربائیجان دی قومی اسمبلی (ملی مجلس) دی سپیکر صاحبا غفاروا نال باضابطہ ݙو طرفہ ملاقات کیتی۔ چیئرمین سینیٹ آذربائیجان دی قیادت اَتے عوام کیتے نیک خواہشات دا اظہار کریندے پاکستان اَتے آذربائیجان وچال پراݨے، برادرانہ اَتے اعتماد تے مبنی تعلقات دی تعریف کیتی۔ انہاں آکھیا جو امن، سلامتی اَتے خوشحالی دی جدوجہد صرف انفرادی ریاستاں دا ہدف نئیں بلکہ پاکستان اَتے آذربائیجان دا سانجھا مشن اے اَتے ݙوہائیں ملک سانجھی مذہبی، تاریخی اَتے ثقافتی مماثلتاں دے تکڑے رشتے وچ گھنڈئے پئن ۔چیئرمین گیلانی سپیکر صاحبا غفاروا نال ولا ملاقات تے خوشی دا اظہار کیتا اَتے آکھیا جو کجھ ݙینھ پہلے اسلام آباد وچ تھیوݨ آلی ملاقات دے بعد ولا باکو آوݨ خوشی دی ڳالھ اے ۔ انہاں اسلام آباد وچ ہݨے ای منعقدہ پاکستان، آذربائیجان اَتے ترکی وچال سہ فریقی پارلیمانی کانفرنس کوں علاقائی پارلیمانی تعاون وچ ہِک سنگ میل قرار ݙتا۔چیئرمین سینیٹ آکھیا جو پاکستان اَتے آذربائیجان دے تعلقات صرف سفارتی نی بلکہ صدیاں تے محیط تہذیبی، ثقافتی اَتے تاریخی رابطیں تے مبنی ہِن۔ انہاں باکو دے تاریخی “ملتان کاروان سرائے” دا حوالہ ݙیندے آکھیا جو اے 14ویں صدی دی یادگار انہاں تجارتی رابطیں دی علامت اے جیڑھے برصغیر دے شہر ملتان نال تعلق رکھݨ آلے تاجراں کوں آذربائیجان نال جوڑیندن۔ چیئرمین سینیٹ آکھیا جو انہاں دے وَݙکے دا تعلق وی ملتان توں اے جیں نال انہاں تعلقات وچ ذاتی وابستگی دا رنگ وی شامل اے۔ انہاں سپیکر صاحبا غفاروا کوں ملتان دے دورے دی دعوت وی ݙتی۔آپݨے بطور وزیراعظم پاکستان دے دور اقتدار دی یاد تازہ کریندے یوسف رضا گیلانی ݙسایا جو 2012ء وچ ورلڈ اکنامک فورم، ڈیووس دے موقع تے انہاں صدر الہام علییف نال ملاقات کیتی ہئی جیندے وچ توانائی، انفراسٹرکچر اَتے زرعی شعبیں وچ تعاون ودھاوݨ تے ڳالھ مہاڑ تھئی ہئی۔ انہاں آکھیا جو ایں ویلھے طے تھیوݨ آلے اقدامات اڄ وی ݙو طرفہ تعلقات کوں تکڑی بنیاد ݙیندن۔چیئرمین یوسف رضا گیلانی آذربائیجان کوں خطے وچ امن و استحکام دے ودھارے تے مبارخ ݙیندے آکھیے جو آرمینیا نال اڄوکے مفاہمتی اقدامات خطے وچ ترقی و امن دے نویں رستے کھولیسن۔ انہاں آذربائیجان دی قیادت کوں اسلام آباد وچ 10 توں 12 نومبر 2025ء تئیں تھیوݨ آلی “انٹر پارلیمنٹری سپیکرز کانفرنس” (آئی ایس سی) وچ شرکت دی باضابطہ دعوت ݙتی۔ انہاں آکھیا جو اے کانفرنس علاقائی امن، سلامتی اَتے ترقی تے جامع ڳالھ مہاڑ کیتے ہِک اہم پلیٹ فارم ݙیسی اَتے بین‌الپارلیمانی تعلقات کوں مزید تکڑا بݨیسی۔چیئرمین سینیٹ آذربائیجان نال پاکستان دی کثیرالجہتی پلیٹ فارمز جیویں “ایشیائی پارلیمانی اسمبلی” (اے پی اے)، “انٹر پارلیمنٹری یونین” (آئی پی یو) اَتے “نان الائنڈ موومنٹ پارلیمانی نیٹ ورک” (این اے ایم پی این) وچ فعال شرکت دا وی ذکر کیتا۔ انہاں آذربائیجان کوں این اے ایم دے پارلیمانی ڈھانچے وچ ولا انتخاب تے مبارخ ݙتی اَتے آکھیا جو ایں تسلسل نال تنظیمی استحکام اَتے رُکن ملکاں وچال پارلیمانی رابطے مزید مستحکم تھیسن۔سپیکر صاحبا غفاروا چیئرمین سینیٹ دا پرتپاک خیر مقدم کیتا اَتے آکھیا جو ہِک مہینے دے دوران ݙوہیں رہنماواں دی اے ݙوجھی ملاقات ݙو طرفہ تعلقات دی مضبوطی دی علامت اے۔ انہاں پاکستان دے دورے دے دوران ݙتی ڳئی میزبانی تے شکریہ ادا کیتا اَتے چیئرمین یوسف رضا گیلانی دا “سال آئین و ریاست” دی تقریباں وچ شرکت تے شکریہ ادا کیتا جیڑھا جو صدر الہام علییف کاراباخ ریجن تے مکمل خودمختاری دے بعد منَاوݨ دا اعلان کیتا ہئی۔سپیکر غفاروا آرمینیا نال جاری امن و ترقیاتی اقدامات دا یوسف رضا گیلانی کوں ݙسایا اَتے آکھیا جو ݙوہیں ملکاں وچال پارلیمانی تعاون دے ودھارے کیتے مزید اقدامات دی لوڑھ اے۔ ݙوہیں رہنماواں آپت دے رابطیں، پارلیمانی وفد دے تبادلے اَتے سانجھے ترقیاتی و عوامی منصوبیں دے ذریعے تعاون کوں مزید ودھاوݨ دے عزم دا اعادہ کیتا۔