انسانی ترقی اتے فلاح و بہبود کیتے عالمی اشتراک ضروری، ماحولیاتی تبدیلی دی تباہی نال نبڑن واسطے قرضے مسئلے دا حل نیئں، عالمی برادری کوں آپنڑی ذمہ داری پوری کرݨی چاہیدی اے، وزیر اعظم شہباز شریف

ریاض۔ 28 اکتوبر(اے پی پی)وزیر اعظم محمد شہباز شریف انسانی ترقی تے فلاح و بہبود واسطے عالمی اشتراک دی لوڑھ تے زور ݙیندے آکھیے جو امن، خوشحالی اتے ترقی ترجیح اے، جدید ٹیکنالوجی، علم و تجربہ کوں استعمال کرݨا ہوسی، ماحولیاتی تبدیلی دی تباہی نال نبڑن واسطے قرضے مسئلے دا حل نیئں، عالمی برادری کوں آپنڑی ذمہ داری پوری کرݨی چاہیدی اے، اے ڳالھ انہاں اسلام آباد اچ فیوچر انویسٹمنٹ انیشیٹیو کانفرنس اچ اعلیٰ سطح گول میز مباحثے نال خطاب اچ آکھی۔ وزیر اعظم محمد شہباز شریف سعودی ولی عہد شہزادہ محمد بن سلمان دے ترقی دے وژن دا خیرمقدم کریندے آکھیے جو پاکستان قدرتی وسائل نال مالا مال ملک اے، ساں 78 سال اچ جیہڑیاں غلطیاں کیتیاں ہن اونہاں توں سبق سِکھ تے اڳوں تے ودھدے پئے ہیں، حکومتِ پاکستان بہتری، وݙیاں تبدیلیاں اتے اصلاحات واسطے وڈے اقدامات کیتن، مختلف شعبیاں اچ اصلاحات دا عمل جاری اے، ایف بی آر اچ اصلاحات کر تے مکمل ڈیجیٹلائزڈ کر ݙتا گئے، ایںدے نال کرپشن اچ خاطر خواہ کمی آئی اے۔ انہاں آکھیا جو پاکستان دی 60 فیصد آبادی نویں نسل تے مشتمل اے، ایہہ وڈا چیلنج وی اے اتے موقع وی، انہاں کوں ہنر تے تربیت ݙے تے معاشرے دے فیدہ مند شہری بݨیدے پئے ہیں تاں جو او آپنڑاں روزگار کماوݨ دے قابل تھی سگسن۔ وزیر اعظم ماحولیاتی تبدیلی دے مسئلے کوں اڳونہا کریندے آکھیا جو پاکستان موسمیاتی تبدیلی توں شدید متاثرہ 10 ملکاں اچ شامل اے ٻھل اساڈا ماحولیاتی وگاڑ اچ حصہ نہ ہووݨ دے برابر اے۔ ماحولیاتی تبدیلی پاروں پاکستان کوں سیلاب اتے بادل پھٹن جِھیں قدرتی آفتاں دا سامݨا رھندے۔ 2022ء اتے ایں سال وی قدرتی آفتاں دے نتیجے اچ پاکستان کوں ارباں ڈالر دا نقصان تھئے۔ لکھاں گھر اتے لکھاں ایکڑ تے کھڑیاں فصلاں تباہ تھی گئن۔ تعمیر نو اتے بحالی دے عمل واسطے ودھ فنڈز دی لوڑھ ہوندی اے ٻھل قرضے ایںدا حل نیئں۔ مسلسل قرضیاں نال ملکی معیشت کمزور تھی ویندی اے۔ ایہہ عالمی انسانی مسئلہ اے جیندے کیتے عالمی برادری کوں آپنڑی ذمہ داری محسوس کرݨی چاہیدی اے اتے اڳو تے آوݨا چاہیدے۔ وزیر اعظم انسانیت کوں درست سمت ٹورݨ واسطے مختلف شعبیاں اچ برابری دے تعاون تے زور ݙیندے آکھیا جو ھک ٻئے نال مختلف شعبیاں اچ تعاون نال اڳو تے ودھیا ونڄ سڳدے، ترقی پذیر ملکاں واسطے موقع ودھاوݨے ہوسن۔ انہاں آکھیا جو پاکستان اے آئی سودھا جدید ٹیکنالوجی دے حصول دو تیزی نال ودھدا پئے، آپنڑی نویں نسل اتے وسائل کوں ترقی واسطے استعمال کریسن۔ وزیر اعظم آکھیا جو مصنوعی ذہانت توں فیدہ چاوݨ کیتے سارے وسائل لائے ویسن، زرعی شعبہ اتے صنعتاں اچ نویں چیزاں کیتے اے آئی توں فیدہ چاتا ویندا پئے۔ زرعی شعبے دی ترقی واسطے نویں نسل کوں جدید ٹیکنالوجی نال جڑیندے پئے ہیں۔ انہاں گلوبل نارتھ دے گلوبل سائوتھ دے نال ترقی واسطے اشتراک دی لوڑ تے زور ݙیندے آکھیا جو آپݨے علم اتے تجربات کوں انسانیت دی ترقی تے فلاح واسطے استعمال کرݨا ہوسی۔ ہک سوال دے ولدے اچ وزیر اعظم آکھیا جو پاکستان ٻہوں وݙی آبادی آلا ملک اے، 24 کروڑ عوام واسطے وڈے چیلنج ہن ٻھل اساں آپݨے لوکاں دی ترقی و خوشحالی اتے امن واسطے ہر ویلے متحرک اتے بیدار ہیں اتے میکرو لیول تے استحکام ڳھنݨ کرݨ اچ کامیاب تھی گئے ہیں، بھاویں ایہہ کافی نیئں ٻھل اساں پرامید ہیں جو اساں ݙینھ رات محنت نال آپݨے مسئلیاں تے قابو پا ڳھنسوں۔ وزیر اعظم آکھیا جو مضبوط ارادے اتے عزم و حوصلے نال کوئی کامیابی ناممکن نئیں۔