پاکستان دی عوام دی سلامتی قومی ترجیح اے، دہشت گرداں سَمیت انہاں دے اَڈّے اَتے سہولت کاراں کوں مُکاوݨ کیتے ساری شئیں استعمال کیتی ویسن، عطاء اللہ تارڑ

اسلام آباد۔29اکتوبر (اے پی پی) وفاقی وزیر اطلاعات تے نشریات عطاء اللہ تارڑ آکھیا جو افغان طالبان افغانستان دی عوام کوں ہِک بے لوڑھ دی جنگ اِچ پَھڑکاوݨ چاہندِن، پاکستان ہمیشہ افغانستان دی عوام دے امن اَتے خوشحالی کیتے قربانیاں ݙتن، افغان طالبان نال کئی واری گالھ مہاڑ کیتی ڳئی پر افغان فریق پاکستان دے نقصاناں توں بے پرواہ رہیا، چار سال دے لمّبے عرصے واچ جانی اَتے مالی نقصان برداشت کرݨ توں بعد ہݨ پاکستان دے صبر دا پیمانہ بھر ڳئے۔ پاکستان قطر، ترکیہ اَتے ٻئے دوست ملکاں دی مخلصانہ کوششاں تے شکر گزار اے۔ پاکستان دی عوام دی سلامتی قومی ترجیح اے، حکومت پاکستان دہشت گردی دے خلاف ہر ممکن اقدام کَریسی، دہشت گرداں، انہاں دے اَڈّیاں اَتے سہولت کاراں کوں مُکاوݨ کیتے ساری شئیں استعمال کیتی ویسن۔ بُدھ کوں سماجی رابطے دے پلیٹ فارم ”ایکس“ تے اپݨی ہِک پوسٹ اِچ اکتوبر 2025ء اِچ استنبول اِچ پاکستان اَتے افغانستان دے مذاکرات دے بارے ݙسیندیں ہوئیں وفاقی وزیر اطلاعات آکھیا جو کابل اِچ حکومت سنبھالݨ توں بعد پاکستان کئی واری افغان طالبان حکومت نال بھارتی حمایت یافتہ فتنہ الخوارج (ٹی ٹی پی) اَتے بھارتی پراکسی فتنہ الہندوستان (بی ایل اے) وَلُوں مُستقل سرحد پار دہشت گردی دے مسئلے تے گالھ مہاڑ کیتی۔افغان طالبان حکومت کوں وار وار یاد ݙوائی ڳئی جو او دوحہ معاہدے دے ہیٹھ پاکستان اَتے عالمی برادری نال کیتے ڳئے لِکھے ہوئے وعدیاں تے عمل یقینی بݨاوے۔ پر، پاکستان دی مخلص اَتے مسلسل کوششاں ایں کیتے کامیاب نہ تھی سڳیاں جو افغان طالبان حکومت لگاتار پاکستان مخالف دہشت گرد عناصراں دی حمایت کریندی رہی۔ چونکہ طالبان حکومت افغان عوام دے بارے کہیں ذمہ واری دا مظاہرہ نئیں کریندی اَتے جنگی معیشت تے انحصار کریندی اے، ایں کیتے او افغان عوام کوں ہِک بے لوڑھ دی جنگ واچ پَھرکاوݨ چاہندی اے۔ وفاقی وزیر اطلاعات آکھیا جو پاکستان ہمیشہ توں افغانستان دی عوام دے امن اَتے خوشحالی دا خواہاں رہیے، ایں کیتے آواز چاتی اے اَتے ٻہوں ساری قربانیاں ݙتن۔ اِین٘دے نال پاکستان افغان طالبان حکومت نال مذاکرات اَتے گالھ مہاڑ دے انڳݨت دور رکھیے پر افسوس اے جو او ہمیشہ پاکستان دے نقصاناں توں بے تعلق رہیے۔ انہاں آکھیا جو بدقسمتی نال چار سال دے لمّبے عرصے اِچ جانی اَتے مالی نقصان برداشت کرݨ توں بعد ہݨ پاکستان دے صبر دا پیمانہ بھر ڳئے۔ انہاں آکھیا جو امن کوں ہِک ٻیا موقع ݙیوݨ دے ارادے نال، بھرا ملکاں قطر اَتے ترکیہ دی درخواست تے پاکستان افغان طالبان حکومت نال مذاکرات کیتے۔ اے مذاکرات پہلے دوحہ، قطر اِچ اَتے بعد اِچ استنبول، ترکیہ اِچ تھیّے۔ اِیں مذاکرات دا صرف ہِک ایجنڈا اے ہئی جو افغان طالبان حکومت ایں دے عملی اقدامات کرے جِین٘دے نال افغان زمین کوں دہشت گرد تنظیماں دی تربیتی تے لاجسٹک سرگرمیاں اَتے پاکستان دے خلاف دہشت گرد حملیاں دے اَڈّے دے طور تے استعمال تھیوݨ توں روکیا ونڄ سڳے۔ انہاں آکھیا جو پاکستان قطر اَتے ترکیہ دا شکر گزار اے جِن٘ہاں ایں گالھ مہاڑ دے رکھݨ اِچ سہولت ݙتی اَتے افغان طالبان حکومت کوں اِیں گالھ تے قائل کرݨ کیتے مخلصانہ کوششاں کیتی جو او پاکستان دے خلاف دہشت گرد گروپاں کوں ہتھیار دے طور تے استعمال کرݨ توں باز آون۔ انہاں آکھیا جو پاکستان دہشت گردی دے مسئلے دے پرامن حل، ݙوہیں ملکاں اَتے پورے خطے دی خوشحالی اَتے سلامتی کیتے مخلصانہ کوششاں اَتے تعاون تے قطر، ترکیہ اَتے ٻئے دوست ملکاں دی حکومتاں دا دِلوں شُکریہ ادا کریندے۔ آپݨے شہریاں دی سلامتی پاکستان کیتے ٻہوں اہمیت رکھیندی اے۔ اَساں آپݨی عوام کوں دہشت گردی دے ناسور توں محفوظ رکھݨ کیتے سارے ضروری اقدامات چَیسوں اَتے انہاں کوں اے یقین ݙویندوں جو حکومتِ پاکستان دہشت گرداں، انہاں دے ٹکاݨیاں، انہاں دے سرپرستاں اَتے مددگاراں کوں ختم کرݨ کیتے سارے وسائل استعمال کَریسی۔