پاکستان اَتے ترکیہ دے تعلقات تزویراتی شراکت داری دے ہِک نویں دَور اچ داخل تھی ڳئن، وزیراعظم شہباز شریف

اسلام آباد ۔29اکتوبر (اے پی پی) وزیراعظم محمد شہباز شریف، ترک صدر رجب طیب اردوان اَتے ترکیہ دی بھرا عوام کوں ترکیہ دے یوم جمہوریہ تے مبارک ڈیندیں ہوئیں آکھیا جو پاکستان اَتے ترکیہ دے تعلقات تزویراتی شراکت داری دے ہِک نویں دَور اچ داخل تھی ڳئن۔ ترکیہ دے 102ویں یوم جمہوریہ دے موقعے تے اپݨے سنیھے اِچ وزیراعظم آکھیا جو او ایں خوشی دے موقعے تے اپݨے پیارے بھرا صدر رجب طیب اردوان اَتے ترکیہ دی بھرا عوام کوں آپݨی اَتے پاکستانی عوام وَلُوں مبارک پیش کریندن۔ وزیراعظم آفس دے میڈیا وِنگ وَلُوں بُدھ کوں جاری بیان موجب وزیراعظم آکھیا جو گزریل ݙہاکیاں اچ صدر اردوان دی جرات مند اَتے متحرک قیادت اچ ترکیہ دی شاندار تبدیلی اَتے معاشی بحالی کوں عالمی کامیابی مِلی اے۔ وزیراعظم آکھیا جو اساکوں اپݨے ترک بھراواں دی کامیابیاں اَتے کارنامیاں تے فخر اے اَتے ترقی دے ایں پندھ اِچ اَساں انہاں دے پکے ساتھی ہیسے۔ وزیراعظم آکھیا جو پاکستان اَتے ترکیہ دے تعلقات، جغرافیے اَتے وقت توں اُتے، سانجھے عقیدے، تاریخ اَتے بھراوَل دے بنیاد تے بݨیے ہوئن۔ انہاں آکھیا جو اساݙے تعلقات صدر اردوان دی سمجھدار رہنمائی اِچ تزویراتی شراکت داری دے ہِک نویں دَور اِچ داخل تھی ڳئن، کیوں جو اَساں سانجھے مفاد دے سارے شعبیاں اِچ ہر ویلھے دی آزمائش توں لنگھدے ہوئیں پکے تعلقات کوں ودھاوݨ کیتے رَل تے کوشش کریندے پئیوں۔