ہارون اختر خان دی اڳواݨی اچ لیوگونگ ایگریکلچرل مشینری دے سی ای او اَتے معروف ملکی ٹریکٹر مینوفیکچررز نال اجلاس

اسلام آباد۔ 29 اکتوبر(اے پی پی) وزیراعظم دے معاون خصوصی برائے صنعت و پیداوار ہارون اختر خان دی زیر صدارت اسلام آباد اچ لیوگونگ ایگریکلچرل مشینری دے سی ای او فرینک وانگ اَتے پاکستان دے معروف ٹریکٹر مینوفیکچررز نال ہک اجلاس تھیا۔ اجلاس اچ جدید ٹریکٹر ٹیکنالوجی متعارف کراوݨ، گنے دی کٹائی کیتے مشینری اَتے پاکستان اچ زرعی آلات دی مقامی تیاری کوں ودھاوݨ تے تفصیلی ڳالھ مہاڑ کیتی ڳئی۔ فرینک وانگ اجلاس دے شرکا کوں لیوگونگ کمپنی دے کم بارے ݙسدے ہوئیں آکھیا جو کمپنی وݙی مشینری جیویں کرینز، لوڈرز، ایکسکیویٹرز، ٹریکٹرز اَتے بلڈوزرز بݨیندی اے، لیوگونگ اپݨے شراکت داراں کوں زرعی مشینری، شوگر کین ہارویسٹنگ اَتے جدید ٹیکنالوجی دے حوالے نال تربیت وی ݙیندی اے۔ ہارون اختر خان آکھیا جو جدید ٹیکنالوجی، زراعت اَتے مقامی مینوفیکچرنگ سیکٹر کوں نیڑے گھن آوݨ، مقامی پیداوار دی صلاحیت ودھاوݨ اَتے ٹیکنالوجی دے تبادلے کیتے اے سانجھ ضروری اے۔