صدرِ آصف علی زرداری دا بلوچستان اچ ‘فتنہ الہندوستان’ دے 18 دہشت گرداں دی ہلاکت تے سکیورٹی فورسز کوں خراج تحسین

اسلام آباد۔ 30 اکتوبر (اے پی پی) صدرِ مملکت آصف علی زرداری، بلوچستان اچ سکیورٹی فورسز دے ݙو آپریشنز اچ بھارتی پراکسی ‘فتنہ الہندوستان’ دے 18 دہشت گرداں دی ہلاکت تے سکیورٹی فورسز کوں خراجِ تحسین پیش کیتے۔ خمیس کوں ایوانِ صدر دے پریس ونگ توں جاری بیان موجب، صدرِ مملکت چلتن پہاڑ کوئٹہ اچ خفیہ اطلاع تے کارروائی اچ بھارتی سرپرستی یافتہ 14 دہشت گرداں دے مارݨ کوں سکیورٹی فورسز دی وݙی کامیابی قرار ݙتا۔ صدرِ مملکت کیچ دے علاقے بلیدہ اچ دہشت گرداں دے ٹھکانے تے آپریشن اچ چار دہشت گرداں دے انجام کوں پڄݨ تے سکیورٹی فورسز دی جرأت و بہادری کوں وی سراہیا۔ انہاں آکھیا جو سکیورٹی فورسز ولوں علاقے دی کلیئرنس دہشت گردی دے مکمل خاتمے دے عزم دی عکاسی کریندی اے۔ صدرِ آصف علی زرداری آکھیا جو سکیورٹی فورسز اتے قانون نافذ کرݨ آلے ادارے ’’عزمِ استحکام‘‘ دے تحت دہشت گردی دے مکمل خاتمے کیتے پُر عزم ہن۔