وزیراعظم دے لائق طلبہ کیتے لیپ ٹاپ سکیم 2025ء دا افتتاح کر ݙِتا، طلبہ کیتے جتنے وی وسیلے ہوئے خرچ کریسوں، شہباز شریف

اسلام آباد۔ 30 اکتوبر(اے پی پی)وزیراعظم محمد شہباز شریف لائق طلبا و طالبات کیتے لیپ ٹاپ سکیم 2025ء دا افتتاح کریندے آکھیے جو اڄکل اے آئی (AI)، آئی ٹی (IT)، نویں مہارتاں اَتے ٹیکنالوجیز ساری دُنیا اچ آپݨاں ناں مَنویندیاں پئن، سعودی عرب پاکستان دے نینگراں کُوں اے آئی اَتے آئی ٹی اچ مُفت تربیت ݙیوݨ دی پیشکش کیتی اے، اَساں سعودی ویژن 2030ء اَتے فیفا ورلڈ کپ کیتے تربیت یافتہ نینگراں کُوں سعودی عرب بِھجویسُوں، سعودی عرب دے معاشی پیکج تے عملدرآمد پاروں پاکستان دی معیشت ترقی کریسی۔ طلبا و طالبات کیتے جِتنے وی وسیلے خرچ کرݨے پَوون، کریسوں۔ قوم دے وَݙے پُتراں اَتے دھیاں دی تعلیم، ہُنر اَتے اُنہاں کُوں وَݙا پاکستانی بݨاوݨ کیتے 50 ارب کیا 500 ارب وی خرچ تھی ونجن تاں کوئی پرواہ کائنی۔ اُنہاں اے ڳالھ پرائم منسٹر یوتھ لیپ ٹاپ سکیم 2025ء دی افتتاحی تقریب نال خطاب اچ آکھی۔ وزیراعظم آکھیا جو اے خوشی دی ڳالھ اے جو ہِک واری ول اللہ تعالیٰ میکوں موقع ݙِتے جو قوم دے ٻہوں قابل اَتے لائق ٻالاں اے اڳو کھڑاں، جیڑھے والدین اَتے استاداں دی محنت اَتے دُعاواں دے پاروں قوم دے وَݙے معمار بݨدے پئن، آپݨی اَتے آپݨی حکومت ہی نئیں ساری قوم دے پاسوں اُنہاں کُوں سلام پیش کرینداں۔ وزیراعظم آکھیا جو لیپ ٹاپ دے پروگرام اِچ کُجھ تأخیر تھی ڳئی اے کیونجو جَݙاں اے لیپ ٹاپ پاکستان پُجّے تاں اُنہاں تے جیڑھا لوگو لَڳیا ہویا ہا، او کہیں ذاتی تشہیر لڳدا ہا ٻھل میں اے لوڳو ہٹوا ݙتے، مُلگ دے نینگر اتے دھیاں لیپ ٹاپ گھن تے پاکستان کُوں وَݙا بݨیسن۔ اے میرٹ اَتے ݙینھ رات دی محنت دا امتحان اے، سارے مُلک اچ ہِک لَکھ لیپ ٹاپ میرٹ تے وَنڈّیے ویندے پئن۔ وزیراعظم آکھیا جو 2011ء توں اے پروگرام شروع تھیا، ڄیکر ساریاں دی قیمت لائی ونڄے تاں نیڑے تیڑے 40، 50 ارب روپے خرچ تھی چُکے ہوسن پر قوم دے وَݙے پُتراں اَتے دھیاں دی تعلیم، ہُنر اَتے اُنہاں کُوں وَݙا پاکستانی بݨاوݨ کیتے 50 ارب کیا 500 ارب وی خرچ تھی ونجن تاں کوئی پرواہ کائنی۔ وزیراعظم آکھیا جو ہݨ لیپ ٹاپ توں ڳالھ ٻہوں اَڳوں نِکَل ڳئی اے، اڄ اے آئی، آئی ٹی، نویں مہارتاں اَتے ٹیکنالوجیز دُنیا اچ آپݨاں لوہا منویندیاں پئن۔ سعودی عرب اے آئی اَتے انفارمیشن ٹیکنالوجی تے ارباں ڈالر خرچ کریندا پئے اَتے اُنہاں ارباں ڈالر دا روڈ میپ اَتے انفراسٹرکچر بݨائے، سعودی عرب پاکستان دے نینگراں کُوں اے آئی اَتے آئی ٹی اچ مُفت تربیت ݙیوݨ دی پیشکش کیتی اے، ہِک نویں راہ کُھل ڳئی اے، سعودی عرب اَتے پاکستان ݙو وَݙے ٻھرا مُلک ہین، او آھدن جو اساݙا جیڑھا کُڄھ وی اے، او پاکستان دے کروڑاں ٻھراواں اَتے بھیݨیں کیتے اے۔ سعودی عرب پاکستان کیتے سَب کُڄھ کرݨ کیتے تیار اے، وزیراعظم آکھیا جو اُنہاں پاکستان کیتے معاشی پیکج ݙیوݨ تے سعودی ولی عہد اَتے وزیراعظم شہزادہ محمد بن سلمان دا ہِک واری ول شکریہ ادا کیتے، میکوں پوری اُمید اے جَݙاں اساں سَب رَل تے ایںدے تے عمل کریسوں تاں زراعت، معدنیات، کان کَھݨݨ اَتے آئی ٹی سودھا پاکستان دی معیشت ترقی کریسی۔ سعودی عرب اِچ 2030ء اچ ہِک بین الاقوامی نمائش تھیندی پئی اے، اُتّے 2034ء اچ فیفا کپ کرایا ویندا پئے، ایندے کیتے سعودی عرب کُوں نہ صرف ارباں ڈالر دی تعمیرات کرݨیئن ٻھل اُنہاں کُوں ہزاراں، لَکھاں ٻہوں مہارت آلے نینگراں دی طاقت دی ضرورت اے۔ وزیراعظم آکھیا جو اُنہاں دی پوری کوشش ہوسی اَتے ایڑی چوٹی دا زور لا تے ہزاراں لَکھاں ہُنرمند ٻالاں کُوں سعودی عرب بِھجویسُوں اَتے پاکستان کُوں وَݙا بݨیسُوں۔ وزیراعظم آکھیا جو لیپ ٹاپ گھنݨ آلے طلبا طالبات ݙینھ رات محنت کر تے اے مقام حاصل کیتے۔ نینگر ذاکر اللہ ٻہوں سوہݨی اُردو اَتے عربی اچ ڳالھ کیتی، مَیں عربی ٻولݨ اچ اُوندا مقابلہ نئیں کر سڳدا۔ وزیراعظم آکھیا جو اِتّھاں قوم دے ہِک شہید دا پُتّر سٹیج تے آیا، اُوندے والد صاحب قوم دے ٻالاں کُوں یتیم تھیوݨ توں بچاوݨ کیتے آپݨاں خون پاکستان کُوں ݙِتا اَتے شہادت دا جام پیتا، شہید آپݨے پُتّر کُوں یتیم کر ݙِتا پر قوم دے لَکھاں کروڑاں پُتراں اَتے دھیاں کُوں یتیم تھیوݨ توں بچایا، اے شہادت، جُرأت، محنت، امانت اَتے دیانت دا سفر اے۔ وزیراعظم لیپ ٹاپ سکیم دی تقریب کُوں کامیاب بݨاوݨ تے وزیراعظم یوتھ پروگرام دے چیئرمین رانا مشہود احمد خان اَتے وفاقی وزیر اطلاعات و نشریات عطا اللہ تارڑ اَتے اُنہاں دی ساری ٹیم کُوں سراہیا۔ وزیراعظم آکھیا ڄے تئیں اُنہاں کولو ذمہ داری اے، او مُلک دی نینگر نَسَل دی بہتری، اعلیٰ تعلیم اَتے پیشہ ورانہ تربیت کیتے جِتنے وی وسیلے ضروری ہوسن، اُنہاں دی فراہمی کُوں یقینی بݨیسَن۔ اُنہاں آکھیا جو اساں مُلک کُوں قرضیاں توں نجات ݙیواوݨی اے، مُلکی وسیلیاں کُوں استعمال کر تے رَل تے پاکستان کُوں قائد اعظم اَتے علامہ محمد اقبال دے خواباں دے مطابق ہِک وَݙا مُلک بݨیسُوں۔ وزیراعظم یوتھ پروگرام دے چیئرمین رانا مشہود احمد خان آکھیا جو اڄ ہِک تاریخی ݙینھہ اے، وزیراعظم محمد شہباز شریف بطور وزیراعلیٰ 2010ء اچ نینگراں دی ترقی کیتے منصوبے شروع کیتن، وَݙے وَݙے چیلنجز آئے، سیلاب دی صورتحال دا سامݨاں کرݨاں پیا ٻھل محمد شہباز شریف آکھیا جو ہِک پیسے دی وی فنڈز اچ کٹوتی نا کریسوں، ساکوں ماݨ اے جو پاکستان اُنہاں کڄھ مُلکاں اچ اے جِتھاں آرٹیفیشل انٹیلی جنس دی پالیسی ݙِتی ڳئی اے۔ اڄ پاکستان دے ٻالاں دا مستقبل وزیراعظم محمد شہباز شریف اَتے فیلڈ مارشل سید عاصم منیر محفوظ بݨیندے پئن۔ ایں موقع تے وزیراعظم لیپ ٹاپ سکیم بارے نینگراں آپݨے تاثرات ݙتن اَتے وزیراعظم لیپ ٹاپ سکیم کُوں سراہیا۔ بین الاقوامی اسلامی یونیورسٹی توں ایم فل کرݨ آلے طالب علم ذاکر اللہ آکھیا جو اے لیپ ٹاپ میکوں ٻہوں سہارا ݙِتے، لیپ ٹاپ سکیم نینگراں دے مستقبل تے سرمایہ کاری اے، اے لیپ ٹاپ صِرف ہِک مشین نئیں ٻھل ڄیوݨ بَݙلݨ آلی ڈیوائس اے۔ بلوچستان دے ضلع نصیر آباد توں تعلق رکھݨ آلے طالب علم کامران خان آکھیا جو اساں سَت بھیݨ ٻبرا ہِیں اَتے الحمدللہ سَب تعلیم حاصل کریندے پئے ہِیں، پاکستان نال محبت اَتے مُلک و قوم دی حفاظت اساں ساریاں دا فرض اے اَتے اے سبق مَیں آپݨے والد صاحب توں سِکّھیے، میݙے والد بلوچستان پولیس اچ اے ایس آئی ہِن اَتے او آپݨی زمین دی حفاظت کیتے ہمیشہ فرنٹ لائن تے تیار رہندن۔ اُنہاں کُوں پولیس یونیفارم اچ ݙیکھ تے نِکّپن توں ہی اے ارادہ کر گھِدّا ہا جو مَیں وی سی ایس ایس کر تے آپݨے مُلک دی خدمت کریساں اَتے آپݨے مُلک دا محافظ بݨساں۔ ساݙے گھر دے وسیلے محدود ہین ٻھل خواب وَݙے ہِن، بلوچستان دے نینگراں تئیں وزیراعظم یوتھ لیپ ٹاپ سکیم دا پُجݨاں کہیں معجزے توں گَھٹ کائنی پر جَذبہ سَچّا ہووے تاں اللہ تعالیٰ دی مدد تہاݙے تئیں پُج ویندی اے۔ میݙی 90 فیصد پڑھائی ایں لیپ ٹاپ دی مدد نال ہی تھیندی اے، اے لیپ ٹاپ صِرف تعلیمی مقاصد کیتے ہی نئیں، ایں میݙے کیریئر اچ وی ٻہوں مدد کیتی، ایں دی مدد نال آپݨے آپ کُوں مالی طور تے خود مختار بݨایا۔ وزیراعظم شہباز شریف دے ویژن کُوں سلام پیش کرینداں۔ 2023ء اچ لیپ ٹاپ گھنݨ آلی بی بی دُرجان آکھیا جو مَیں خواب ݙیکھیا ہا جو مَیں ڈاکٹر بݨاں، اِیہ لیپ ٹاپ میݙی تعلیم دا حصہ ہی نئیں بلکہ میݙیاں دُعاواں دا جواب وی ہے۔ وزیراعظم لیپ ٹاپ سکیم میݙے خواباں کُوں حقیقت وِچ بَݙلیا۔ نیت صاف ہووے اَتے جَذبہ سَچّا ہووے تاں منزل دُور کوئی رہندی۔ وزیراعظم نال بیٹّھݨ میݙے کیتے فخر دی ڳالھ اَتے ہِک اعزاز ہے۔ اڄ مَیں بلوچستان اَتے پاکستان دی دھی اِتّھاں کَھڑی ہاں۔ وزیراعظم بلوچستان دی دھی دُرجان کُوں آپݨی سیٹ تے بِٹھا ݙِتا اَتے اُندی ٻہوں حوصلہ افزائی کیتی، ایں موقع تے سارا ہال تاڑیاں نال گونج اُٹھیا۔ خیبر پختونخوا توں تعلق رکھݨ آلے 2024ء وِچ لیپ ٹاپ گھنݨ آلے محمد رفیق آفریدی آکھیا جو میکوں فخر ہے جو مَیں ہِک شہید دا پُتّر ہاں، شہید والد دے مشن کُوں پورا کرݨ وِچ وزیراعظم شہباز شریف مَیݙا ساتھ ݙِتا ہے۔ لیپ ٹاپ سکیم تعلیم حاصل کرݨ وِچ سہولت ݙِتی۔ میکوں لیپ ٹاپ پُورا پُورا میرٹ تے مِلیا۔ ائر یونیورسٹی دی طالبہ عرشیہ گل آکھیا جو اِیہ ٻہوں ضروری سکیم ہے، اینکُوں جاری رہݨاں چَہیدے ہے۔ یونیورسٹی آف انجنیئرنگ اینڈ ٹیکنالوجی ٹیکسلا دی طالبات سمیہ ضیاء اَتے عائشہ ضیاء وی وزیراعظم لیپ ٹاپ سکیم دی تعریف کیتی اَتے اینکُوں لائق طالب علم طالبات کیتے ہِک تاریخی قدم قرار ݙِتا۔ تقریب وِچ وزیراعظم محمد شہباز شریف لائق طالب علم طالبات وِچ لیپ ٹاپ وی وَنڈّیے۔ وزیراعظم دی ہدایت تے پولیس دے چاق و چوبند دستے لیپ ٹاپ گھنݨ آلے لائق طلبا طالبات کُوں گارڈ آف آنر پیش کیتا۔ تقریب اچ وزیراعظم یوتھ پروگرام اَتے لیپ ٹاپ سکیم بارے ہِک ڈاکو منٹری وی ݙِکھائی ڳئی۔