درخواست گزار آپݨے حج واجبات دی ݙوجھی قسط 6 لکھ 50 ہزار روپے 3 توں 15 نومبر تئیں متعلقہ بنک اچ جمع کرا تے کمپیوٹرائزڈ رسید گھنن، ترجمان وزارت مذہبی امور

اسلام آباد۔ 31 اکتوبر (اے پی پی) وزارت مذہبی امور سرکاری سکیم دے درخواست گزاراں کوں آکھیا جو او آپݨے حج واجبات دی ݙوجھی قسط 6 لکھ 50 ہزار روپے 3 توں 15 نومبر تئیں آپݨے متعلقہ بنک اچ جمع کرا تے کمپیوٹرائزڈ رسید گھنن۔ ݙوجھی قسط ویلھے تے جمع نہ کراوݨ دی صورت اچ حج دی درخواست منسوخ سمجھی ویسی۔ آن لائن ادائیگی کرݨ آلے عازمین معمول موجب آن لائن پورٹل استعمال کر سڳدن۔ جمعہ کوں “اے پی پی” نال خاص گالھ مہاڑ کریندیں ہوئیں وزارت مذہبی امور دے ترجمان عمر بٹ آکھیا جو حج 2026 دے جیہڑے درخواست گزار واجبات دی پہلی قسط جمع کرائی اے ، او ݙوجھی قسط 3 توں 15 نومبر 2025 تئیں جمع کرا سڳدن۔ ایجھے لوک جیہڑے مکۃ المکرمہ اچ ݙبل بیڈ فیملی روم دی سہولت گھنݨ چاہندن، او 2 لکھ روپے فی کس ودھ جمع کریسن، جݙاں جو ٹرپل بیڈ فیملی روم دی سہولت گھنݨ کیتے 67 ہزار روپے فی کس جمع کراوݨے ہوسن۔ اے ݙوہیں سہولتاں صرف مکۃ المکرمہ اچ ہوسن۔ بعد اچ حج پیکج تبدیل کرݨ ممکن نہ ہوسی، ایں سانگے ݙوجھی قسط جمع کریندے ویلھے پیکج دا چݨاؤ کیتا ونج سڳدے۔ انہاں آکھیا جو ݙوجھی قسط جمع کراوݨ توں پہل آپݨی متعلقہ بنک برانچ توں آپݨے کوائف دی درستی کرائی ونج سڳدی اے، گروپ بݨاوݨ دے مسئلیاں اتے شناختی کارڈ نمبر دی درستگی کیتے وزارت دے متعلقہ حج آفیسر، انچارج آئی ٹی سیل کوں تحریری درخواست وی بھیجݨی ہوسی۔ انہاں آکھیا جو ݙوجھی قسط ویلھے تے جمع نہ کراوݨ دی صورت اچ حج دی درخواست منسوخ سمجھی ویسی۔ کہیں وی مرحلے تے حج داخلہ منسوخ کراوݨ دی صورت اچ وزارت مذہبی امور ضابطے دے مطابق کٹوتی کرݨ دی مجاز اے، منسوخ تھیوݨ آلی درخواستاں دی بچی ہوئی رقم درخواست گزار دے متعلقہ بنک اکاؤنٹ اچ واپس بھیجی ویسی۔ عازمین حج کوں وزارت مذہبی امور ولوں اے ہدایت وی کیتی ڳئی اے جو وزارت نال چنڳے رابطے کیتے “پاک حج 2026 موبائل ایپ” استعمال کیتی ون٘جے۔