چیئرمین سینیٹ سید یوسف رضا گیلانی اتے تاجکستان دی اسمبلی دے چیئرمین دی ملاقات

باکو۔ 31 اکتوبر (اے پی پی) پاکستان اتے تاجکستان ݙو پاسے دے تعلقات اتے بین الپارلیمانی تعاون کوں ٻیا مضبوط بݨاوݨ دے پکے ارادے دا اعادہ کیتے، ݙوہیں بھرا ملکاں وچال تریخی، ثقافتی اتے سیاسی رشتے کوں ٻیا ودھاوݨ تے اتفاق کیتا ڳیا ۔ اے اتفاقِ رائے چیئرمین سینیٹ سید یوسف رضا گیلانی اتے تاجکستان دی مجلس نمائندگان دے چیئرمین فیزالی ادیزودا وچال باکو اچ تھیوݨ آلی ملاقات اچ تھیا۔ جمعہ کوں سینیٹ سیکرٹریٹ ولوں جاری بیان موجب ݙوہیں رہنماواں ایں ڳالھ تے زور ݙتا جو پاکستان اتے تاجکستان دی دوستی ہک ݙوجھے دی عزت، سانجھے مذہبی قدراں اتے امن، ترقی اتے خوشحالی دے سانجھے مقصداں تے مبنی اے۔ چیئرمین سینیٹ آکھیا جو ݙوہیں ملکاں وچال تجارتی، توانائی، رابطیاں اتے عوامی سطح تے تعلقات کوں ٻیا ودھاوݨ دی لوڑھ ہے تاںجو آپس دے تعاون دے نویں راہ کُھل سڳن۔ انہاں پارلیمانی رابطے ودھاوݨ تے زور ݙیندیں ہوئیں آکھیا جو مؤثر بین الپارلیمانی تعاون آپس دا بھروسہ ودھاوݨ، بہتر قانون سازی اتے عوامی فائدے تے مبنی پالیسی بݨاوݨ کیتے ضروری اے۔دہشت گردی اتے انتہاپسندی: چیئرمین سینیٹ دہشت گردی اتے انتہاپسندی دے خلاف سانجھی کوشش کیتے خطے دے تعاون تے مبنی فورمز جیڑھا جو شنگھائی تعاون تنظیم (ایس سی او) اتے اجتماعی سلامتی معاہدہ تنظیم (سی ایس ٹی او) دے تحت تعاون جاری رکھݨ دی لوڑھ تے زور ݙتا۔ چیئرمین سینیٹ آپݨے تاجک ہم منصب کوں پاکستان اچ 10 توں 12 نومبر 2025ء کوں تھیوݨ آلی بین الپارلیمانی سپیکرز کانفرنس (آئی ایس سی) اچ شرکت دی دعوت وی ݙتی۔چیئرمین سینیٹ تاجکستان دے علاقائی امن تے استحکام اچ چنڳے کردار اتے وسطی ایشیا دی ترقی تے خوشحالی کیتے انہاں دی تعمیری کوششاں دی تعریف کیتی۔