وزیراعظم چترال اچ دانش سکول دا منݙھ ٻڈھ ݙتے، گیس پلانٹ لاوݨ، اپر چترال کیتے بجلی ٹیرف دا مسئلہ حل کرݨ، یونیورسٹی، ہسپتال اَتے سڑکاں بݨاوݨ دے منصوبیاں دا اعلان

چترال۔ 31 اکتوبر(اے پی پی)وزیراعظم محمد شہباز شریف مُلکی ترقی، لوکاں دی خوشحالی، دہشت گردی اَتے بدامنی کوں مُکاوݨ کیتے ساریاں کوں رَل مِل تے ٹُرݨ دی دعوت ݙیندے آکھیے جو خیبر پختونخوا دے لوکاں جیہڑیاں قربانیاں پاکستان کیتے ݙتین، او بھلائیاں نئیں ونج سڳدیاں۔ اساں نوجواناں کوں علم اَتے ہُنر نال تیار کریسوں اَتے انہاں کوں مُلکی ترقی کیتے رلیسوں، چترال اچ دانش سکول وفاقی حکومت دا تحفہ اے، گیس پلانٹ فی الفور لایا ویسی، اپر چترال اچ ہسپتال بݨایا ویسی اَتے بجلی دے ٹیرف دا معاملہ حل کیتا ویسی۔ او جمعہ کوں چترال اچ دانش سکول دا سنگ بنیاد رکھݨ دی تقریب نال خطاب کریندے پئے ہن۔ ایں موقع تے وفاقی وزراء عطاء اللہ تارڑ، انجینئر امیر مقام اَتے وݙے وفاقی اَتے صوبائی حکام وی موجود ہن۔ وزیراعظم آکھیا جو چترال خیبرپختونخوا دا خوبصورت علاقہ اے، صوبے دے بہادر اَتے غیرت مند لوکاں پاکستان کیتے ٻہوں قربانیاں ݙتین، انہاں دی حب الوطنی بے مثال اے اَتے انہاں دی ترقی اَتے یکجہتی کیتے کیتیاں ڳئیاں کوششاں ہمیش یاد رہسن۔ انہاں آکھیا جو گھٹ تعلیمی سہولتاں دے باوجود چترال دے لوک پڑھے لکھے اَتے مہذب ہن۔ دانش سکول نال اینڄھے دور دراز علاقیاں اچ بہترین اَتے نویاں تعلیمی سہولتاں مِلسن، اے منصوبہ انہاں دا تحفہ اے۔ وزیراعظم آکھیا جو دانش سکول نال ہوشیار ٻالاں کوں بہترین، جدید اَتے مفت تعلیمی سہولتاں مِلسن، اے ریاست دا فریضہ اے، کہیں تے احسان نئیں، دانش سکولاں اچ ایچی سن دے معیار دی تعلیم ݙتی ویندی پئی اے اَتے غریب، یتیم اَتے عام آدمی دے ٻال وی مفت پڑھ سڳدن۔ اگلے سال چترال اچ دانش سکول دا افتتاح تھیسی۔ وزیر اعظم آکھیا جو گزریل ݙینھ میرٹ تے ہک لکھ لیپ ٹاپ ݙیوݨ دی سکیم شروع کیتی ڳئی اے، جیڑھے چترال دے لائق طالب علماں کوں وی مِلسن۔ وزیراعظم آکھیا جو انہاں سہیل آفریدی کوں وزیراعلیٰ خیبرپختونخوا بݨݨ تے فون تے مبارکباد ݙتی اَتے رَل مِل تے ترقی، خوشحالی اَتے دہشت گردی مکاوݨ کیتے کم کرݨ دی پیشکش کیتی، اَتے امید کیتی اے جو وزیر اعلیٰ اے پیشکش قبول کریسن۔ انہاں آکھیا جو پاکستان قدرتی وسائل اَتے نوجوان افرادی قوت نال مالا مال اے، انہاں کوں تعلیم اَتے ہُنر ݙے تے مُلکی ترقی اچ نال رلیسوں۔ وزیراعظم 27 اکتوبر کوں تھیوݨ آلی چار ݙینہہ دی جنگ دا ذکر کریندے آکھیا جو پاکستان بھارت کوں شکست فاش ݙتی اَتے فیلڈ مارشل سید عاصم منیر دی قیادت اچ مسلح افواج آپݨیاں صلاحیتاں دا لوہا منوایا، اَتے امریکی صدر ڈونلڈ ٹرمپ جنگ روکݨ اچ اہم کردار ادا کیتا۔ وزیراعظم ساریاں کوں امن، ترقی اَتے دہشت گردی دے خاتمے کیتے رَل مِل تے کم کرݨ دی دعوت ݙیندے ہوئیں آکھیا جو مُلکی ترقی کیتے اساں کوں ہک تھیوݨا ہوسی۔ وزیراعظم عوامی مطالبے تے اہم اعلانات کیتے جیندے اچ اپر چترال اچ تیکھے ہسپتال بݨاوݨ، چترال کیتے گیس پلانٹ لاوݨ، اپر چترال کیتے بجلی دے ٹیرف دا معاملہ حل کرݨ، شاہراہواں دی تعمیر، چترال بونی شندور 153 کلومیٹر روڈ مکمل کرݨ شامل اے۔ چترال ایون 46 کلومیٹر روڈ اگلے سال مئی تئیں پوری تھی ویسی۔ لواری ٹنل دی شمالی رَسائی دا 7 کلومیٹر حصہ وی مکمل تھی چُکیے۔ انہاں اپر چترال کیتے وفاق ولوں یونیورسٹی بݨاوݨ دا وی اعلان کیتا۔

ایں توں پہلے وزیراعظم تختی دی نقاب کشائی کر تے دانش سکول دا سنگ بنیاد رکھیا۔ وفاقی وزیر انجینئر امیر مقام آکھیا جو چترال اچ دانش سکول بݨاوݨ وزیراعظم دا وژن اے اَتے اے صوبے دے 36 ضلعیاں اچوں ساریاں توں پہلا دانش سکول ہوسی۔ وزیراعظم کوں دانش سکول بارے بریفنگ ݙتی ڳئی، جیندے اچ ݙسیا ڳیا جو اِتھاں 500 توں 700 دے نیڑے طلباء کیتے تعلیم، رہائشی سہولتاں، کھیل دے میدان، ای لائبریری، سائنس لیبارٹریز اَتے آڈیٹوریم دی سہولت ہوسی۔