افغانستان کوں آپݨی زمین پاکستان دے خلاف دہشت گردی کیتے استعمال تھیوݨ توں روکݨی چاہیدی اے، ول جارحیت تھئی تاں تکلڑا ولدا ݙتا ویسی، ترجمان دفتر خارجہ طاہرحسین اندرابی دی پریس بریفنگ

اسلام آباد۔ 31 اکتوبر(اے پی پی)پاکستان واضح کیتے جو پاکستان افغانستان نال ڄھیڑا ودھاوݨ نئیں چاہندا، افغانستان کوں آپݨی زمین پاکستان دے خلاف دہشت گردی کیتے استعمال تھیوݨ توں روکݨی چاہیدی اے، ول جارحیت تھئی تاں تکلڑا ولدا ݙتا ویسی۔ ترجمان دفتر خارجہ طاہرحسین اندرابی جمعہ کوں پریس بریفنگ اچ آکھیا جو پاکستان کوں امید اے جو افغان طالبان نال مذاکرات دا اَڳلا دور 6 نومبر توں شروع ہوسی اَتے پاکستان اِیں عمل اچ مصروف راہسی اَتے چنڳے نتیجیاں دی امید کریندے۔ ترجمان آکھیا جو قطر اَتے ترکیہ اچ تھیوݨ آلے جنگ بندی دے حالیہ مذاکرات اچ پاکستان ٻہوں مثبت انداز نال شرکت کیتی۔ پاکستان اَتے افغان طالبان وچال مذاکرات دا ݙوجھا دور گزریل شام استنبول اچ مُکیے، جیندے اچ پاکستان صاف آکھیے جو افغانستان کوں آپݨی زمین پاکستان دے خلاف دہشت گردی کیتے استعمال کرݨ توں روکݨی چاہیدی اے۔ انہاں آکھیا جو استنبول مذاکرات اچ پاکستان چنڳے جذبے اَتے مثبت نیت نال شرکت کیتی اَتے شروع دے ݙو ݙینہہ دے بدلے چار ݙینہہ تئیں سنجیدگی نال مذاکرات جاری رکھین۔ پاکستان واضح موقف تے سمجھوتہ کیتے بغیر آکھیے جو افغان سرزمین پاکستان دے خلاف دہشت گردی کیتے استعمال نئیں تھیوݨی چاہیدی۔ ترجمان آکھیا جو پاکستان دشمنی ودھاوݨ نئیں چاہندا، ٻھل افغان طالبان دی حکومت توں توقع اے جو او عالمی برادری نال کیتے ڳئے وعدے پورے کریسی اَتے فتنہ الخوارج اَتے فتنہ الہندوستان سودھا دہشت گرد تنظیماں دے خلاف ٹھوس اَتے قابل تصدیق کارروائیاں کر تے پاکستان دے جائز سکیورٹی خدشے دور کریسی۔ انہاں آکھیا جو گزریل چار سالاں توں پاکستان طالبان حکومت تے زور ݙیندا پئے، پر دہشت گردانہ حملیاں اچ ودھارا تھیندا پئے۔ ترجمان ݙسیا جو گزریل چار سالاں توں افغان طالبان دی حکومت پاکستان دے جائز سکیورٹی خدشیاں کوں مسلسل نظر انداز کیتا، اَتے 11، 12، 14 اَتے 15 اکتوبر کوں فتنہ الخوارج دی حمایت نال تھیوݨ والی بلا اشتعال جارحیت پاروں بین الاقوامی سرحد پار پُرتشدد کاروائی تھئی، جیندا پاکستان فیصلہ کن جواب ݙتا، مستقبل اچ اشتعال انگیزی جاری رہی تاں پاکستان بھرپور جواب ݙیسی۔ ترجمان آکھیا جو پاکستان ہمیش توں ہک پرامن، مستحکم اَتے خوشحال افغانستان چاہندے، اَتے اگست 2021ء اچ کابل تے طالبان دے قبضے نال امید کیتی ڳئی ہئی جو اے وژن پورا تھیسی۔ سکیورٹی خدشیاں دے باوجود پاکستان اِیں سال افغانستان دی مدد کیتے اقدامات کیتے، جیویں جو ٹرانزٹ ٹریڈ کیتے کئی رعایتاں ݙتݨ۔ انہاں آکھیا جو اساں افغانستان نال آپݨی سفارتی نمائندگی کوں ناظم الامور توں سفیر دی سطح تئیں ودھا ݙتا اَتے سی پیک کوں افغانستان تئیں ودھاوݨ تے وی اتفاق کیتا۔ نائب وزیراعظم اَتے وزیر خارجہ ازبکستان-افغانستان-پاکستان ریلوے منصوبے دے فزیبلٹی سٹڈی دے معاہدے تے دستخط کرݨ سودھا ترائے واری کابل دا دورہ کیتا۔ ترجمان آکھیا جو پاکستان دی حکومت اَتے مسلح افواج پاکستان دی خودمختاری اَتے لوکاں دے تحفظ کوں یقینی بݨاوݨ کیتے ہر ممکن قدم چاوݨ کیتے تیار ہن، اَتے 6 نومبر دے مذاکرات دے مثبت نتیجیاں دی امید کریندن۔ پاکستان برادر ملکاں قطر اَتے ترکیہ دے تعمیری کردار کوں سراہندے