چیئرمین سینیٹ ولوں گلگت بلتستان دے 78ویں یومِ آزادی تے لوکاں کوں مبارکباد

اسلام آباد۔ 1 نومبر (اے پی پی) چیئرمین سینیٹ سید یوسف رضا گیلانی گلگت بلتستان دے 78ویں یومِ آزادی دے موقع تے اُتھاں دے لوکاں کوں مبارکباد پیش کریندیں ہوئیں آکھیا جو گلگت بلتستان دے لوکاں ݙوگرہ حکومت دے خلاف بہادری اَتے پکے ارادے دی لازوال مثال قائم کیتی۔ اُنہاں آکھیا جو 1 نومبر 1947 گلگت بلتستان دی آزادی دی جدوجہد دا اُو تاریخی ݙینھ اے جݙاں اُتھاں دے لوکاں آپݨی قربانیاں اَتے مسلسل کوششاں نال آزادی حاصل کریندیں ہوئیں پاکستان نال الحاق دا تاریخی فیصلہ کیتا۔ چیئرمین سینیٹ تحریکِ آزادیِ گلگت بلتستان دے شہیداں، غازیاں اَتے اُنہاں ساریاں محسنّاں کوں خراجِ عقیدت پیش کیتا جِنہاں خطے دی آزادی اَتے پاکستان نال جُڑݨ کیتے آپݨی جاناں ݙتّی۔ چیئرمین سینیٹ آکھیا جو گلگت بلتستان دے لوکاں ہر دور اچ ملکی ترقی، سلامتی اَتے دفاع اچ اہم کردار ادا کیتے۔ اُنہاں آکھیا جو پارلیمنٹ ہمیشہ توں گلگت بلتستان دے لوکاں دی بھلائی، معاشی مضبوطی اَتے ترقی کیتے پُرعزم رہی اے اَتے مستقبل اچ وی ہر ڄاہ تے تعاون جاری رکھیا ویسی۔ چیئرمین سینیٹ گلگت بلتستان اچ تعلیم، صحت اَتے روزگار دے چنڳے موقع ݙیوݨ کوں ریاست دی پہلی ترجیح اچ شامل قرار ݙیندیں ہوئیں آکھیا جو نینگراں کوں بااختیار بݨاوݨ ملک دے سوہݨے مستقبل دی ضمانت اے۔ اُنہاں دعا کیتی جو اللہ تعالیٰ پاکستان اَتے گلگت بلتستان کوں ٻئی ترقی، امن اَتے خوشحالی نال نوازے اَتے قومی یکجہتی اَتے اتحاد دا جذبہ ہمیشہ قائم رہے۔