وزیرِاعظم محمد شہباز شریف ولوں گلگت بلتستان دے لوکاں کوں یومِ آزادی دے موقع تے مبارکباد

اسلام آباد۔ 1 نومبر (اے پی پی) وزیرِاعظم محمد شہباز شریف گلگت بلتستان دے لوکاں اَتے ساری قوم کوں گلگت بلتستان دے یومِ آزادی دے خوشی دے موقع تے دلوں مبارکباد ݙتی اے۔ آپݨے مبارکباد دے سنیھے اچ وزیراعظم آکھیا جو 1 نومبر 1947 کوں گلگت بلتستان دے بہادر لوکاں ہمت، یکجہتی اَتے وطن نال محبت دا مظاہرہ کریندیں ہوئیں ݙوگرہ راج توں آزادی حاصل کیتی اَتے پاکستان نال الحاق دا تاریخی فیصلہ کیتا۔ اے ݙینھ اُوں وݙی قربانی، پکے ارادے اَتے وطن نال محبت دی یاد ݙیویندے جئیں خطے دی تاریخ بدل ݙتی۔ ہفتے کوں وزیر اعظم آفس دے میڈیا ونگ توں جاری بیان موجب، وزیر اعظم آکھیا جو وفاقی حکومت گلگت بلتستان دی ترقی، خوشحالی اَتے نینگراں دے چنڳے مستقبل کیتے پُرعزم اے۔ سیاحت، توانائی، بنیادی ڈھانچے اَتے تعلیم دے شعبیاں اچ جاری منصوبے گلگت بلتستان دی ترقی اچ وݙا کم ݙیسن۔ گلگت بلتستان دے لوکاں کوں ترقی دے سارے موقع ݙتے ویسن تاں جو او قومی دھارے اچ پُورا کردار ادا کر سڳن۔ اڄ دا ݙینھ اساکوں ایں عہد دی تجدید دا سنیھا ݙیندے جو اساں آپݨی آزادی، اتحاد اَتے ترقی دے پندھ کوں نویں توانائی اَتے جذبے نال جاری رکھوں۔ وزیر اعظم محمد شہباز شریف آپݨے سنیھے اچ دعا کیتی جو اللہ تعالیٰ گلگت بلتستان اَتے پاکستان کوں امن، ترقی اَتے خوشحالی نال نوازے۔