9 لکھ نویں ٹیکس فائیلرز دا ٹیکس نیٹ اچ آوݨ حکومت دی پالیسیاں تے عوام دے بھروسے کوں نشابر کریندے، وزیرِ اعظم شہباز شریف

لاہور۔ 1 نومبر (اے پی پی) وزیرِاعظم محمد شہباز شریف مالی سال 2025ء اچ 59 لکھ ریکارڈ ٹیکس گوشوارے جمع تھیوݨ تے ایف بی آر دے حکام دی کارکردگی دی تعریف اَتے ذمہ داری دا ثبوت ݙیوݨ تے عوام دا شکریہ ادا کریندیں ہوئیں آکھیا جو 9 لکھ نویں ٹیکس فائیلرز دا ٹیکس نیٹ اچ آوݨ حکومت دی پالیسیاں تے عوام دے اعتماد دا پتا ݙیندے۔ ہفتے کوں وزیراعظم آفس دے میڈیا ونگ ولوں جاری بیان موجب، وزیراعظم آکھیا جو اللہ دے فضل و کرم نال ٹیکس نظام دی اصلاحات دے چنڳے نتیجے سامݨے آندے پئن، ایف بی آر اچ میرٹ دی بالادستی کوں پہلی ترجیح ݙتی ڳئی اے۔ لائق اَتے محنتی افسراں دی حوصلہ افزائی اَتے ماڑی کارکردگی دی حوصلہ شکنی دے نظام نال ایف بی آر اچ پرفارمنس کلچر شروع کیتا ڳیا۔ وزیرِ اعظم آکھیا جو ایف بی آر دی ڈیجیٹائزیشن دی نگرانی میں آپ ہر اجلاس دی ہفتہ وار صدارت اچ کیتی، ٹیکس گوشواریاں کوں سوکھا اَتے سہل بݨایا ڳیا۔ بندرگاہواں تے خود کار کلیئرنس دے نظام نال بد عنوانی دے خاتمے اَتے کارکردگی دی بہتری کوں یقینی بݨایا ڳیا۔ وزیرِ اعظم آکھیا جو غیر رسمی معیشت ( Informal Economy) کوں مکاوݨ کیتے پوائنٹ آف سیل دی گݨتری اچ وادھے نال سیلز ٹیکس دی چوری کوں روکیا ڳیا۔ ٹیکس آمدن اچ گزریل سال دے مقابلے اچ 9 ارب دا وادھا حکومت دی ایف بی آر اصلاحات دا منہ بولیندا ثبوت اے۔ وزیرِ اعظم آکھیا جو ایف بی آر دے نظام دی ٻئی اصلاحات دا سلسلہ مسلسل جاری اے، بد عنوانی اَتے غیر رسمی معیشت دے مکمل خاتمے کیتے ݙینھ رات لڳے پیسے۔