صدر مملکت آصف علی زرداری کل دوحہ وچ سماجی ترقی دے عالمی سربراہی اجلاس توں خطاب کریسن

اسلام آباد۔ 3 نومبر (اے پی پی) صدر مملکت آصف علی زرداری کل دوحہ قطر وچ سماجی ترقی دے عالمی سربراہی اجلاس توں خطاب کریسن۔ ترجمان دفتر خارجہ توں جاری بیان موجب، صدر آصف علی زرداری سنوار توں ٻدھ تئیں سماجی ترقی دے عالمی سربراہ اجلاس وچ شرکت کیتے قطر دے دارالحکومت دوحہ دے سرکاری دورے تے ہن۔ اے اجلاس قطر دی میزبانی وچ تھیندا پئے جیندے وچ کئی سربراہانِ مملکت و حکومت شامل تھیسن۔اجلاس دا مقصد پائیدار ترقی دے 2030 ایجنڈے کوں حاصل کرݨ کیتے عالمی کوششاں کوں مزید تکڑا کرݨ اے۔ اجلاس دے مُکݨ تے دوحہ سیاسی اعلامیہ منظور کیتا ویسی۔بیان موجب، صدر آصف علی زرداری 4 نومبر کوں اجلاس توں خطاب کریسن جیندے وچ اوسماجی انصاف، مساوات اتے انسانی وقار دے ودھارے کیتے عالمی تعاون وچ ودھارے دی لوڑھ تے زور ݙیسن۔سماجی ترقی، خاص طور تے ترقی پذیر ملکاں دی حمایت کیتے جامع اتے اصلاح شدہ عالمی مالیاتی ڈھانچے دی اہمیت کوں وی اُجاگر کریسن۔صدر مملکت آپݨے خطاب وچ غربت مکاوݨ ، صحت، تعلیم اتے پائیدار ترقی دے شعبیں وچ پاکستان دیاں کامیابیاں تے روشنی پیسن۔ اجلاس دے موقع تے صدر آصف علی زرداری مختلف عالمی رہنماواں نال ݙو طرفہ ملاقاتاں وی کریسن