اساں بیانیہ دی جنگ لڑدے پیوں ، اساݙا بیانیہ ہک بھرپور جواب دی صورت وچ اے، اساݙا ہدف ملک وچ ٻاہرلی سرمایہ کاری کوں ودھاوݨ اے، وفاقی وزیر اطلاعات عطاء اللہ تارڑ دا سیمینار توں خطاب

اسلام آباد۔ 3 نومبر (اے پی پی) وفاقی وزیر اطلاعات و نشریات عطاء اللہ تارڑ آکھیے جو اساں بیانیہ دی جنگ لڑدے پیوں ، اساݙا بیانیہ ہک بھرپور جواب دی صورت وچ اے، ہک پاسے کوڑا بیانیہ کھنڈایا ڳیا جݙاں جو ݙوجھے پاسے واضح حقیقتاں دنیا دیاں اکھیں کھول ݙتیاں، وزیراعظم دے دورہ سعودی عرب وچ معاشی سٹریٹجک فریم ورک دا اجرا ٻہوں اہم قدم اے، ہݨ اساݙا ہدف ملک وچ ٻاہرلی سرمایہ کاری کوں ودھاوݨ اے۔اے ڳالھ انہاں اتھاں مقامی ہوٹل وچ انسٹیٹیوٹ آف ریجنل سٹڈیز دے تحت “پاکستان دی سفارتی کامیابیاں” دے موضوع تے تھیوݨ آلے سیمینار توں خطاب کریندے آکھی۔وفاقی وزیراطلاعات آکھیا جو دنیا پاکستان دیاں سفارتی کامیابیاں کوں منیندی اے، کوشش اتے محنت نال اساں سفارتی محاذ تے نمایاں کامیابیاں حاصل کیتن۔ انہاں آکھیا جو پاکستان کیتے سفارتی محاذ تے کم کرݨ آلے لوکاں دیاں خدمتاں کوں ہمیشہ یاد رکھیا ویسی۔عطاء اللہ تارڑ آکھیا جو دنیا منیندی اے جو پاکستان دی فارن سروس ساریں توں بہترین اے، اساݙی فارن سروس روایتاں کوں چنڳے طریقے نال اڳوں ودھیندی پئی اے جیں تے اساکوں ماݨ اے۔انہاں آکھیا جو فارن سروس دے افسراں ہمیشہ پاکستان دا ناں عالمی سطح تے روشن کیتے، سفارت کاری ہک فن اے جیڑھا صرف سکھݨ نال نی بلکہ تجربے اتے محنت نال آندے۔وفاقی وزیر اطلاعات آکھیا جو پاکستان دہشت گردی دے خلاف ٻہوں قربانیاں ݙتن، دہشت گردی دی وجہ توں ساریں توں ودھ ضیان وی پاکستان چاتے۔انہاں آکھیا جو مئی 2025ء وچ پاکستان تے دہشت گردی کوں ودھاوݨ دا کوڑا الزام لاتا ڳیا۔ پہلگام واقعہ دے فوراً بعد پاکستان تے الزام لاتا ڳیا جݙاں جو حقیقت وچ پاکستان خود دہشت گردی دا ساریں توں وݙا شکار اے۔انہاں آکھیا جو وزیراعظم بھارت کوں پہلگام واقعہ دی آزادانہ تحقیقات دی پیشکش وی کیتی ہئی۔انہاں آکھیا جو جݙاں دشمن اساں تے جنگ مسلط کیتی تاں اساݙی مسلح افواج ایندا منہ بھن جواب ݙتا۔ فیلڈ مارشل عاصم منیر دی قیادت وچ اساں آپݨے توں چار گنا وݙی طاقت کوں فاش شکست ݙتی۔ انہاں آکھیا جو معرکہ حق وچ اساݙی فضائیہ دا کردار سنہری حروف وچ لکھیا ویسی۔وفاقی وزیر آکھیا جو دوست ملکاں وی پاکستان دے موقف دی حمایت کیتی جݙاں جو اساݙی سفارتی کوششاں پاروں پوری دنیا توں اساکوں بھرپور حمایت ملی۔انہاں آکھیا جو بھارت ہمیشہ دی طرح جارحیت کریندا رہیا اے اتے ہݨ تئیں پاکستان دے خلاف سازشاں وچ مصروف اے۔انہاں ݙسایا جو پاکستان کوسٹ گارڈ بھارت کیتے جاسوسی کرݨ آلے ملاح کوں گرفتار کیتا جیں بھارتی ایجنسیاں دے ہتھوں استعمال تھیوݨ دی پوری کہانی دنیا دے سامݨے رکھ ݙتی۔جݙاں بھارتی میڈیا کوڑا پروپیگنڈا کریندا پیا ہئی تاں پاکستان وچ ذمہ دارانہ رپورٹنگ دنیا دی توجہ حاصل کیتی۔عطاء اللہ تارڑ آکھیا جو معرکہ حق وچ کامیابی دے بعد ہر پاکستانی دا سِر فخر نال اُچا تھیا۔وزیراعظم دے دورہ سعودی عرب دے حوالے نال وفاقی وزیر اطلاعات آکھیا جو معاشی سٹریٹجک فریم ورک دا اجرا ٻہوں اہم پیشرفت اے، ہݨ اساݙا ہدف ملک وچ ٻاہرلی سرمایہ کاری کوں ودھاوݨ اے۔انہاں آکھیا جو سول اتے عسکری قیادت وچ ہم آہنگی اے، ایں وجہ نال پاکستان ہر میدان وچ کامیابیاں حاصل کریندا پئے۔عطاء اللہ تارڑ آکھیا جو وچ ایشیائی ریاستاں نال مضبوط تعلقات اتے تجارت کیتے پاکستانی بندرگاہواں دا استعمال اساݙی ترجیح اے، اساں معاشی میدان وچ نویاں بلندیاں تے پڄݨا اے اتے دوست ملکاں نال اقتصادی و تجارتی رابطے مزید تکڑے بݨاوݨے ہن