توانائی دے شعبے کوں جدید طرزتے بݨایا ویندا پئے، پچھلے 18 مہینے وچ بجلی دی قیمت وچ 10.5 فیصد تئیں کمی کیتی ڳئی اے، وفاقی وزیر توانائی سردار اویس لغاری دی پریس کانفرنس

اسلام آباد۔ 3 نومبر (اے پی پی) وفاقی وزیر توانائی سردار اویس احمد خان لغاری آکھیے جو توانائی دے شعبے کوں جدید طرز تے بݨایا ویندا پئے، توانائی دے شعبے دے تکنیکی مسئلیں کوں حل کر تے ارباں روپے دی بچت کیتی، پچھلے 18 مہینے دے اندر بجلی دی قیمت وچ 10.5 فیصد تئیں دی کمی کیتی ڳئی اے، جتھاں موقع ملیا عوام کوں ریلیف ݙیوݨ دی ہر ممکن کوشش کیتی، ہݨ حکومت بجلی مل نہ گھنسی ، ہک سال وچ گردشی قرضے وچ 700 ارب روپے دی کمی گھن آئے، آٹومیٹک میٹرنگ وچ صارفین کوں پری پیڈ دی سہولت مل ویسی۔ اتھاں وزیر خزانہ محمد اورنگزیب، چیئرمین ایف بی آر راشد محمود لنگڑیال اتے وزیر آئی ٹی شزا فاطمہ خواجہ دے نال پریس کانفرنس توں خطاب کریندے وفاقی وزیر آکھیا جو مہانگی بجلی دیاں ٻہوں ساریاں وجوہات ہن، موجودہ پاور جنریشن دے اندر سارے اضافے پچھلے سالاں وچ امریکی ڈالر وچ ہن، روپے دا ریٹ 100 روپے توں 285 تئیں ڳیا، انٹرسٹ ریٹس اُتے ونڄݨ نال کنزیومرز تے ٻوجھ آیا اتے اساݙی کپیسٹی پیمنٹس دے شیئر وچ تقریباً اَٹھ روپے پر یونٹ دا ودھارا تھیا۔انہاں آکھیا جو وزیراعظم محمد شہباز شریف ہدایت کیتی جو صارفین کیتے بجلی دی قیمت کوں گھٹ کیتا ونڄے، پچھلے 18 مہینے دے اندر بجلی دی قیمت وچ تقریباً 10.5 روپے فی یونٹ دی کمی کیتی، انڈسٹری کیتے 26 روپے فی یونٹ بجلی ݙیوݨ شروع کیتی اتے انڈسٹری کیتے تقریباً 16 روپے پر یونٹ دے اندر کمی گھن آیوں ۔انہاں آکھیا جو سی ڈی پی سی ایم کوں آپرینشلائز کرݨ پاکستان دی تاریخ دا ساریں توں وݙا ریفارم ثابت تھیسی، جینکوں جنوری، فروری وچ آپرینشلائز کیتا ویندا پئے جیڑھا جو 20سال توں ہر حکومت کوشش کریندی پئی ہئی، موجودہ کابینہ او ریفارم کرتے ݙکھایا، ایندا مطلب اے جو آندے ویلھے وچ حکومت پاکستان بجلی مل نہ گھن سڳسی۔انہاں آکھیا جو اساں تے ست ارب روپے دا اضافی ٻوجھ ہئی، اساں اضافی تنخواہیں ݙیندے پئے ہاسے، ڈیڈ پلانٹس کوں نیلام کر ݙتا ڳیا، الحمدللہ 17یونٹ نیلام تھی چُکن۔پہلی واری تاریخ دے اندر 1.2کھرب روپے دے سیکولر ڈیٹ کوں ختم کیتا ڳئے، ڈسٹری بیوشن کمپنیاں دے ضیان کوں ہک سال دے اندر193 ارب روپے توں گھٹ کیتا ڳئے، اے او ریفارمز ہن جیڑھے چنڳی گورننس اتے بغیر سفارش دے بورڈ ممبرز کوں انڈکٹ کرݨ نال آئن۔تقریباً80 ارب روپے سالانہ دا نقصان صرف کوئٹہ الیکٹرک کمپنی دا ٹیوب ویلاں توں آندا ہئی، 27 ہزار ٹیوب ویل دے مالک بجلی استعمال کریندے ہن لیکن بِل نہ ݙیندے ہن، وفاقی حکومت ساڈھے 38 ارب روپے لاتے، صوبائی حکومت ساڑھے 16 ارب لاتے اتے ایں سال اساں 40 ارب روپے دی ریکوری ایندے وچوں کرسڳسوں۔آندے ترائے سالاں وچ پاکستان دا پورا لینڈ سکیپ، میٹرائزیشن دا نہ صرف فیڈرز بلکہ ہر ٹرانسفارمر اتے ہر میٹر سنگل فیز ہووے یا تھری فیز، سارے میٹرز دی آٹومیٹک میٹرنگ ہوسی جتھاں اساݙے کنزیومرز کوں پری پیڈ سروسز دی سہولت مل ویسی۔اویس لغاری آکھیا جو توانائی دے شعبے کوں جدید طرز تے بݨایا ویندا پئے، جتھاں موقع ملیا عوام کوں ریلیف ݙیوݨ دی ہر ممکن کوشش کیتی ڳئی اے۔ انہاں آکھیا جو توانائی دے شعبے دے تکنیکی مسئلیں کوں حل کرتے ارباں روپے دی بچت کیتی ڳئی اے، نیٹ میٹرنگ دی قیمت وچ وݙی کمی تے غور کریندے پیوں ۔وفاقی وزیر توانائی دا آکھݨ ہئی جو آئی پی پیز متعلق ٹاسک فورس نمایاں کم کیتا اتے ہݨ حکومت بجلی مل نہ گھنسی ، ایندے علاوہ گردشی قرضے مکاوݨ متعلق مؤثر پلان بݨایا ڳئے، گردشی قرض وچ کمی کیتے 1200 ارب روپے دا قرض معاہدہ کیتا ڳئے، ہک سال وچ گردشی قرضے وچ 700 ارب روپے دی کمی گھن آئی ڳئی اے۔اویس لغاری آکھیا جو آٹومیٹک میٹرنگ وچ صارفین کوں پری پیڈ دی سہولت وی مل ویسی۔ انہاں آکھیا جو پی پی ایم سی کوں ہک ٹیکنیکل ارم ڈکلیئر کیتا ڳیا، چنڳیاں سیلریاں ݙتیاں، پی پی ایم سی دے ادارے دی وجہ نال ہن تئیں اساں کئی سو ارب روپے دی بچت کر چُکیوں ، این ٹی ڈی سی دی این جی سی ہک انڄ کمپنی بݨ چکی اے اتے سارے منصوبیں کوں مقررہ ویلھے تے مکمل کرݨ کوں یقینی بݨیسی