وفاقی وزیر ڈاکٹر مصدق ملک دی سی وی ایف وفد نال ملاقات

اسلام آباد۔ 3نومبر(اے پی پی) وفاقی وزیر موسمیاتی تبدیلی اتے ماحولیاتی ہم آہنگی سینیٹر ڈاکٹر مصدق ملک، کلائمیٹ وَلنریبل فورم (CVF-20) دے وفد نال ملیے، جئیں اچ پاکستان دے مجوزہ کلائمیٹ پراسپرٹی پلان تے ڳالھ مہاڑ کیتی ڳئی۔ اے منصوبہ اڳوں آلی ماحولیاتی کانفرنس کوپ 30 اچ پیش کیتا ویسی۔ وزارتِ موسمیاتی تبدیلی اتے ماحولیاتی ہم آہنگی وَلوں جاری بیان موجب، وفد وفاقی وزیر کوں منصوبے دے بنیادی مقصداں توں آگاہ کیتا جیڑھا جو پاکستان کوں ہک ماحولیاتی لحاظ نال مضبوط، گھٹ کاربن اتے ہر شئے کوں شامل کرݨ آلی معیشت دی طرف منتقلی دا روڈ میپ ݙیندے۔ملاقات اچ پاکستان اچ جاری گرین ترقیاتی منصوبیں اتے ماحولیاتی لچک پیدا کرݨ دے قدماں تے وی کھلی گالھ مہاڑ تھئی۔ ݙوہیں فریقاں سرمایہ کاری ودھاوݨ، جاری منصوبیں دی رفتار تکھی کرݨ اتے تکنیکی تعاون، جدت اتے علم دے تبادلے دے ذریعے سانجھے اہداف دے حصول تے اتفاق کیتا۔ایں موقع تے وفاقی وزیر ڈاکٹر مصدق ملک اتے سی وی ایف وفد، اڳوں آلے کوپ-30 دے مذاکرات دے دوران پاکستان دی ماحولیاتی ترجیحات اتے ٻئے کمزور ملکاں دے مفاد کوں عالمی سطح تے مؤثر طریقے نال اجاگر کرݨ کیتے نیڑے دے تعاون تے وی اتفاق کیتا۔